Emokyreʼỹ ha emombarete umi nerendúvape

JESÚS heʼi vaʼekue: “Pe marandu porã ojekuaauka raẽ vaʼerã opa tetãrupi” (Mar. 13:10). Upévare ñande jaha jave japredika ñañeʼẽ umi héntepe upe notísia porãre. Jesús voi oikuaauka vaʼekue “umi marandu porã oñeʼẽva Ñandejára Rréinore” (Luc. 4:43). Avei umi disípulo opredika jave omombeʼu vaʼekue umi marandu porã oñeʼẽva Ñandejárare ha Crístore (1 Tes. 2:2; 2 Cor. 2:12). Pe mensáhe jaikuaaukáva omokyreʼỹ ha omeʼẽ vaʼerã esperánsa umi héntepe.

Apóstol Juan ohecha vaʼekue peteĩ “ánhel ovevéva yvága mbytére” ha oikuaaukáva marandu porã. Ojapo haguéicha pe ánhel, ñande japredika jave jaʼe avei umi héntepe: “Pekyhyje Ñandejáragui ha pembotuicha chupe” (Apoc. 14:6, 7). Oparupiete jaha ñamombeʼu mávapa hína Ñandejára tee, umi mbaʼe porã haʼe ojapóva, hembipota, ha mbaʼe ovligasiónpa jareko hendive káda uno. Avei ñamombeʼu Jehová ohunditaha umi hénte iñañáva ha ombohasa asýva ótrope. Péro ñande ndajahái ñakondena iñañávape, upéva rangue jaipota haʼekuéra ohendu pe mensáhe oĩva la Bíbliape ha oñarrepenti, upéicharõ ideprovéchota chupekuéra koʼã notísia porã (Prov. 2:20-22; Juan 5:22).

Ani reñeʼẽterei umi mbaʼe vai oikóvare. Jaikuaaháicha, ñane tiémpope manterei ñahendu notísia vai. Ha ikatúramo jepe jaiporu umíva ñañepyrũ hag̃ua ñañemongeta ñande rapichándi, ndovaléi ñañeʼẽterei koʼã mbaʼére, pórke umi hénte ikueráima voi ohendu hague provléma. ¿Mbaʼépa ikatu jajapo upéicharõ? Ñañeʼẽ mbykymínte peteĩ notísiare ha upéi ñamombeʼúma pe esperánsa omeʼẽva la Biblia (Apoc. 22:17). Jajapóramo upéicha, pe ogajára nañanerenduséiramo jepe, opytáta opensa pe notísia porãre ha ág̃a ótrope ikatúma oñatende porãve ñanderehe.

Ha péichante avei rejapo jave diskúrso, ndovaléi rembohysýi atyraite umi provléma. Peteĩ diskursánte oñepyrũramo omombeʼu umi goviérno ndojapoiha mbaʼeve, oĩha hetaiterei mondaha, hekovaíva ha ivioléntova, umi hénte pyaʼeterei oñedesanimáta. Mbykymínte reñeʼẽ vaʼerã koʼã mbaʼére, ikatu hag̃uáicha hesakã porã mbaʼéichapa la Biblia ñanepytyvõ ñambohovái hag̃ua umi provléma. Ani avei remeʼẽ hetaiterei detálle reñeʼẽ jave koʼã provlémare.

Péro koʼã mbaʼe ndeʼiséi ndovaleiha reñeʼẽ ni peteĩ notísia vai rehe. La iñimportánteva hína reiporavo porã mbaʼe mbaʼérehepa reñeʼẽta, ikatu hag̃uáicha ojerresalta pe esperánsa omeʼẽva la Biblia. Por ehémplo, Jesús ojapo vaʼekue upéva pe Sermón del Móntepe. Upérõ haʼe oñemoñeʼẽ umi héntepe ani hag̃ua oiko oñemombaʼeguasu ojapoháicha umi fariséo ha mboʼehára leipegua, ha omombeʼu mbykymi mbaʼéicha javépa haʼekuéra ojapo jepi upéva (Mat. 6:1, 2, 5, 16). Upéicharõ jepe Jesús noñekonsentrái umi mbaʼe vaírente, upéva rangue upe riremi orresalta mbaʼérepa iñimportánte ñantende porã mbaʼépa Ñandejára ohaʼarõ ñandehegui (Mat. 6:3, 4, 6-15, 17-34). Upéicha rupi umi mbaʼe heʼi vaʼekue omokyreʼỹeterei umi héntepe.

Eñeʼẽkena reporomokyreʼỹ hag̃uáicha. Rejapótaramo peteĩ diskúrso reñeʼẽ hag̃ua mbaʼéichapa oiko ha oñekomporta vaʼerã kristianokuéra, ani retaky ni rekritika umi ermanokuérare, síno emombarete chupekuéra. Ha remokyreʼỹtaramo ojejapo hag̃ua peteĩ mbaʼe, nde voi remoĩ vaʼerã ehémplo (Rom. 2:21, 22; Heb. 13:7). Nemanduʼáke remeʼẽ vaʼerãha umi konsého rehayhu rupi ne ermanokuérape, ndahaʼéi ndepochýgui hesekuéra (2 Cor. 2:4). Rejeroviáramo umi ermáno ojaposeha Jehová rembipota, upéva ojekuaáta ne ñeʼẽre, péicha katuete ikyreʼỹta hikuái. Ejesarekomi mbaʼéichapa Pablo ohechauka upéva releévo 1 Tesalonicenses 4:1-12; 2 Tesalonicenses 3:4, 5; ha Filemón 4, 8-14, 21.

Ansianokuéra sapyʼánte ojapo peteĩ diskúrso ha oñemoñeʼẽ umi ermánope ani hag̃ua ojapo peteĩ mbaʼe vai. Tekotevẽ iñumílde hikuái ojapo hag̃ua upéva pyʼaguapýpe. Avei oñeʼẽ lájare ha umi palávra oiporúvare ohechauka vaʼerã orrespetaha entéro ermánope (Gál. 6:1; 1 Ped. 5:2, 3). Umi kuimbaʼe imitãva katu oreko vaʼerã enkuénta ko konsého: “Ani reñeʼẽ pohýi peteĩ kuimbaʼe ijedávape” (1 Tim. 4:12; 5:1, 2; 1 Ped. 5:5). Oporokorrehíta jave térã omeʼẽta jave peteĩ konsého, pe diskursánte omopyenda vaʼerã la Bíbliape opa mbaʼe heʼíva (2 Tim. 3:16). Ndovaléi omyesakã peteĩ téxto chupe ogustaháichante. Ha oporokorrehítaramo jepe, ¿mbaʼépa ikatu ojapo ani hag̃ua omoñeñandu vai umi ermánope? Ikatu orresaltave idiskúrsope mbaʼe mbaʼépa ñamboyke vaʼerã pono jajapo umi mbaʼe vai, mbaʼéichapa ikatu ñambohovái upe provléma, ha mbaʼéichapa ñandeprotehe umi konsého ha léi omeʼẽva Jehová (Sal. 119:1, 9-16).

Repreparávo nde diskúrso repensa vaʼerã mbaʼéichapa remohuʼãta káda púnto prinsipál ha avei nde diskúrso kompletoite. Umi ermáno ningo katuete imanduʼa arevéta umi mbaʼe erévare opakuetévo nde diskúrso, upévare iporãta reñeporandu: “¿Omokyreʼỹtapa chupekuéra umi mbaʼe haʼétava che konklusiónpe?”.

Reñemongeta jave umi ermánondi. Ñande javyʼaiterei ikatu haguére ñañembyaty ha jahasa porã ñane ermanokuérandi rreunionhápe. Avei upépe ñamombarete ñande jerovia ha “ñañomokyreʼỹ” (Heb. 10:25). ¿Mbaʼéichapa jajapokuaa upéva? Ndahaʼéi umi diskúrso ha komentário rupivénte, síno ñañemongetávo ñane ermanokuérandi, oñepyrũ mboyve ha opa rire umi rreunión.

Añetehápe ningo ndaivaíri ñañemongeta umi mbaʼe ñandegusta ha jahasa vaʼekuére upe díape, péro katuete omokyreʼỹvéta ñane ermanokuérape ñañeʼẽramo peteĩ mbaʼe porã jahasa vaʼekuére Ñandejára servísiope, térã predikasiónpe. Tuicha avei ñamombaretéta chupekuéra jahechaukáramo ñañeinteresaha káda únore.

Ñañatende vaʼerã ani ova ñanderehe ko múndo opensa lája. Apóstol Pablo oskrivi vaʼekue umi kristiáno Efesoguápe: “Koʼág̃a peipeʼáma rupi pendejehegui opaichagua japu, añeteguánte peje vaʼerã pende rapichápe” (Efes. 4:25). Upéva heʼise ndajaikói vaʼerãha ñamombaʼeterei umi mbaʼe oñembotuicháva ko múndope, por ehémplo pláta, teknolohía ha umi hénte ifamósovape. Jesús ñandeavisa voi ani hag̃ua ‘ñanembotavy pe platarayhu’ (Mat. 13:22). Upévare ñañemongeta jave ñane ermanokuérandi ndajaikói vaʼerã ñañeʼẽterei umi mbaʼerepýre térã jajechaukase umi mbaʼe jarekóvare (1 Tim. 6:9, 10).

Apóstol Pablo heʼi tekotevẽha ñamombarete ñane ermanokuérape ha ani jaapoʼi ni jahusga umi ikonsiénsia kangývape, oiméne haʼekuéra ndohechakuaái gueteri káda uno jarekoha liverta jadesidi hag̃ua heta mbaʼe. Ñamombareteséramo chupekuéra ñane ñeʼẽ rupive, jareko vaʼerã enkuénta umi mbaʼe ohasa vaʼekue hikuái hekovépe ha mbaʼeichaite pevémapa oprogresa Ñandejára servísiope. La Biblia ñanemomanduʼa voi ani hag̃ua “ñamoĩ ñane ermanokuéra renondépe mbaʼeve omoñepysanga vaʼerã chupe ni omokangy vaʼerã chugui ijerovia” (Rom. 14:1-4, 13, 19).

Kongregasiónpe oĩramo ermáno hasykatúva heta tiémporema, ovyʼaitereíta ñañembojáramo hendápe ha ñañemongeta hendive. Koʼãichagua ermáno ojapo jepi heta sakrifísio oho hag̃ua rreuniónpe. Sapyʼánte ñaporanduse chupe mbaʼéichapa oñeñandu, ha ndopytavaíriramo jepe, nañamokyreʼỹmoʼãi chupe ñañeʼẽnteramo mbaʼasýre. Iporãvéta hína jaguerohory umi mbaʼe porã ojapóva, por ehémplo: ¿Rehechakuaápa mbaʼeichaitépa haʼe osegi ojepytaso Jehová ykére ha oaguanta heta sufrimiénto? Térã oiméne ikomentário nemokyreʼỹ ha igustoiterei raʼe. Ñamombareteséramo upe ermánope, ani ñañeʼẽ umi mbaʼe ndaikatúivare ojapo, síno jaguerohory vaʼerã umi mbaʼe porã ojapóva Jehová rehehápe (1 Tes. 5:11).

Avei ñanemanduʼa vaʼerã ñamombarete ha ñamokyreʼỹ hag̃ua ñane ermanokuérape tekotevẽha jareko enkuénta mbaʼépa Jehová opensa upe jaʼévare. ¿Mbaʼérepa jaʼe upéva? Por ehémplo yma umi isrraelíta otaky vaʼekue Moisés ha Aarón rehe ha oñepyrũ ojeplagea pe manáre, ha upéva ombopochyeterei vaʼekue Jehovápe (Núm. 12:1-16; 21:5, 6). Upéicharõ, ñande avei ikatu ñambopochy hína Jehovápe jaikóramo ñañeʼẽ vai umi ansiánore, jajekeha peteĩ mbaʼe ojedesidi vaʼekuére térã nañandegustái rupi peteĩ mbaʼe pyahu osẽva ñane puvlikasionkuérape (1 Tim. 5:17).

Añetehápe ndahaʼéi la hasyetereíva jatopa hag̃ua peteĩ téma iñimportánte ha igústova ñañemongeta hag̃ua ñane ermanokuérandi. Péro sapyʼánte oĩ umi ojepokuaáva okritika ha ojekeha manterei oimeraẽ mbaʼére, péicha jave ñañehaʼã vaʼerã ñambohasa ótro témape.

Upéicharõ, tahaʼe japredika jave, jajapóvo diskúrso térã ñañemongetávo ñane ermanokuérandi, ñañehaʼãkena jaʼe umi mbaʼe omombarete ha ideprovéchotava umi ñanerendúvape (Efes. 4:29).