Emyesakã porã pe téma

JAJAPO jave ñane asignasión iñimportánte jareko peteĩ téma ha ñañeʼẽ upévarente. Jajepreparávo jareko vaʼerã enkuénta upe téma ha jaheka informasión omyesakã porãvéva upéva. ¿Mbaʼérepa ideprovécho ñañeʼẽ peteĩ témarente? Pórke ñañeʼẽramo hetaiterei mbaʼére ikatu ñakonfundipa umi héntepe, ha amo ipahápe naimanduʼamoʼãi mbaʼevére.

Por ehémplo, reñeʼẽtaramo Ñandejára Rréinore, la Bíbliare térã pe ñemoingove jeýre, reikuaa vaʼerã mbaʼépa nde remyesakãse koʼã témagui. Tuicha nepytyvõta rehecháramo pe título, upéicha reikuaáta mbaʼéichapa remyesakã vaʼerã pe informasión. Rerekóramo peteĩ título ikatúma repilla mbaʼérehepa reñeʼẽta, por ehémplo: “¿Mbaʼépa hína Ñandejára Rréino?”, “Ñandejára Rréino ojapóta ko yvýgui peteĩ paraíso”, “La Biblia haʼe hína Ñandejára Ñeʼẽ”, “La Biblia ikatu ñanepytyvõ ñambohovái hag̃ua umi provléma”, “¿Ikatúnepa jahecha jey umi omano vaʼekuépe?”, “Jareko rupi esperánsa jaikove jeytaha, ikatu ñaaguanta jajepersegi jave”. Jahechaháicha odepende pe títulore reikuaa hag̃ua mbaʼéichapa remyesakãta pe informasión.

¿Mbaʼe témarepa opredika vaʼekue Jesús oĩrõ guare ko yvy ári? Haʼe heta vése heʼi vaʼekue: “Pe Rréino yvagapegua hiʼag̃uimbaitéma”, ha upe témare pyʼỹinte oñeñeʼẽ la Bíbliape (Mat. 4:17). Umi cuatro lívro oñemombeʼuhápe Jesús rekovekue jatopa haʼe oñeʼẽ hague amo ciento diez véserupi pe Rréinore, ¿mbaʼéichapa haʼe ojapo upéva? Ndahaʼéi orrepetínteva la mísma kósa, síno umi milágro ha ehémplo rupive omyesakã haʼeha Ñandejára Raʼy, pe Mesías oñepromete vaʼekue ha Jehová omoĩtaha ipoguýpe pe Rréino. Avei omombeʼu isakrifísio rupive oñemeʼẽtaha oportunida heta persónape ogoverna hag̃ua hendive yvágape, ha omyesakã mbaʼépa tekotevẽ ojapo hikuái ohupyty hag̃ua upéva. Umi milágro ha heʼíva rupive, Jesús ohechauka mbaʼe iporãvapa ojehupytýta upe Rréino rupive. Ha omosẽvo umi demónio Ñandejára espíritu rupive, ohechauka Ñandejára Rréino og̃uahẽmaha (Luc. 11:20). Upéi omanda avei idisipulokuérape oikuaauka hag̃ua pe Rréino (Mat. 10:7; 24:14).

Ereko enkuénta pe título. Oñemeʼẽ jave ndéve peteĩ asignasión, rereko vaʼerã enkuénta itítulo ikatu hag̃uáicha remyesakã porã pe informasión.

Ndete reiporavótaramo pe título, rehecha raẽ vaʼerã mbaʼépa rehupytyse nde diskúrso rupive. Upéi eiporavo umi púnto prinsipál orekótava nde diskúrso ha ehecha oho porãpa pe témare.

Oimérõ nde diskúrso orekóma voi peteĩ título, ejepyʼamongeta hese repilla peve mbaʼépa ontendekase. Rehekávo informasión ereko enkuénta pe título, péicha reiporavóta umi nepytyvõtava remyesakã porã hag̃ua upéva. Ha oñasignáramo ndéve mbaʼe informasiónpa reiporu vaʼerã reprepara hag̃ua nde diskúrso, ekalkula mbaʼéichapa ikatu remohenda oho hag̃ua pe títulore. Epensa avei mbaʼéichapa pe informasión ideprovéchota umi nerendúvape ha mbaʼépa rehupytyse nde diskúrso rupive, péicha reikuaáta mbaʼe pártepa rerresalta vaʼerã.

Mbaʼéichapa ikatu rerresalta pe téma. Upearã tekotevẽ rereko enkuénta pe título, reiporavo ha remohenda jave pe informasión. Eiporu umi ohóva pe idéa prinsipál rehe, ha eprepara peteĩ voského ojehechaukáma haguéicha ko lívrope. Péicha ndahasymoʼãi ndéve rerresalta hag̃ua pe téma.

Pe téma avei hesakã porãta rerrepetíramo pe idéa prinsipál, ¿mbaʼéicha ikatu rejapo upéva? Epensamína, ¿ajépa ndahasýi jepi japilla hag̃ua mbaʼéichapa héra peteĩ músika? Pe téma ningo ojerrepeti ohóvo pe músika pukukuére. Por ehémplo, peteĩ músika rromántikape pe kantánte oñepyrũ guive opa peve pe músika omombeʼu mbaʼépa oñandu hembiayhúre. Umi diferénte palávra oiporúva haʼete peteĩ ílo ombojoajúva ohóvo káda párte upe músikagui, ha umíva omyesakã porãve pe mborayhu haʼe oñandúva. Nde diskúrsope ikatu avei rejapo upéva hesakã porã hag̃ua pe téma prinsipál, ikatu reiporu diferénte palávra térã ehémplo orresalta porãva ne téma. Péicha umi nerendúva imanduʼa porãta pe idéa prinsipál rehe.

Koʼã konsého ikatu avei resegi rejapo jave estúdio térã repredika jave. Péva katuete oipytyvõta umi nerendúvape imanduʼa porã hag̃ua upe téma peñeʼẽ vaʼekuére. Upéicharõ, reñehaʼãramo reiporavo porã mbaʼe témarepa reñeʼẽta ha remyesakã hekoitépe, ikatúta remboʼe porã Ñandejára Ñeʼẽ.