¿Mbaʼépa ojapo vaʼerã tuvakuéra?
SY HA TÚVA rupive ningo ikatu onase peteĩ mitã. Pe mitãraʼy oñeforma ha okakuaa ohóvo isy retepýpe ha upéi onase. Upéva ningo tuichaiterei mbaʼe ha ojeʼe voi haʼeha peteĩ “milágro”.
Tuvakuéra oreko peteĩ rresponsavilida tuichaitereíva pe mitã oñepyrũ guive okakuaa isy retepýpe. Jaikuaaháicha onase ramóme pe mitã ndaikatúi ojapo mbaʼeve ijehegui, upévare oñeñatende vaʼerã hese opa mbaʼépe. Péro okakuaavévo ohóvo oikotevẽ hína hetave mbaʼe. Tuvakuéra ohekomboʼe vaʼerã chupe, tekotevẽ ohasa hendive tiémpo ha ohendu umi mbaʼe opensáva ha oñandúva. Avei oipytyvõ vaʼerã ifamíliape oikuaa ha ohayhu hag̃ua Ñandejárape.
Pe mitã ningo oñandu vaʼerã ituvakuéra ohayhuha chupe. Upévare iporã peje pene famíliape pehayhuha, péro upéva pehechauka vaʼerã avei umi mbaʼe pejapóvare hesehápe. Pe mitã ohecha vaʼerã pemoĩha ehémplo porã. Upéicha avei, michĩete guive tekotevẽ oñemboʼe chupe mbaʼépa oĩ porã ha mbaʼépa oĩ vai. Tárdema pejapórõ upéva, upéi ikatu oiko heta mbaʼe pembyasýva.
Umi konsého iporãvéva oĩ hína Ñandejára Ñeʼẽme. Upévare peiporúramo la Biblia pehekomboʼe hag̃ua pene famíliape, haʼe ohechakuaáta umi konsého oĩva pype ouha Ñandejáragui ha ndahaʼéi yvypóragui. Ha ohechakuaávo upéva ojaposevéta umi mbaʼe oaprendéva.
La Biblia omokyreʼỹ tuvakuérape oñehaʼãmbaite hag̃ua ohekomboʼe porã ifamíliape. Péro ijetuʼu jepi upéva tuvakuérape umi mitã tuichavévo ohóvo. Upévare ojejapo ko lívro hérava Ñaaprende mboʼehára guasúgui. Ipype petopáta informasión oĩva Ñandejára Ñeʼẽme ha ikatútava pelee pene famíliandi. Ko lívro tuicha penepytyvõta peñemongeta hag̃ua hendive pestudiakuévo.
Oñemoĩ hína heta porandu pene família ombohovái hag̃ua. Káda páhinape oñemoĩ umi porandu ha ijykére oreko mbohapy púnto (...), umi pártepe pepytaʼimi vaʼerã ikatu hag̃uáicha pe mitã heʼi la opensáva. Umi mitãme ogustave ikatúramo oñeʼẽ, síno pyaʼeterei ikaigue.
Umi porandu ningo penepytyvõta peikuaa hag̃ua mbaʼépa opensa pene família. Sapyʼánte ikatu ojavy ha nombohovaiporãi. Péro umi mbaʼe oñemyesãkãva káda porandu rire, oipytyvõta chupe oaprende hag̃ua ohóvo heta mbaʼe iñimportánteva.
Ko lívro iporãiterei orekógui heta divúho, oĩ voi pype doscientos treinta rasa. Káda divúho oreko peteĩ porandu ikatu hag̃uáicha pe mitã heʼi mbaʼépa oaprende. Upévare, pehesaʼỹijókena umi divúho hendive. Upéva ningo oipytyvõta chupe ontende porãve hag̃ua umi mbaʼe oaprendéva pe kapítulope.
Pene família oleekuaa vove, pemokyreʼỹ chupe tolee peẽme ko lívro, ha tojapo avei upéva haʼeñohápe. Upéicha ojapóramo, ndahesaraimoʼãi umi mbaʼe oaprende vaʼekuégui ha opokóta ikorasõre. Péro pejogueraha porã ha pejoayhuve hag̃ua, pestudia meme vaʼerã oñondive ko lívro.
Koʼág̃arupi oĩ heta mbaʼe ikatúva ogueraha vai umi mitãme ha káda día haʼekuéra ombohovái vaʼerã umíva. Por ehémplo: tekokyʼa, espiritísmo ha umícha. Ymave ningo avave nopensái umi mitã ombohovaitaha peichaite peve koʼã mbaʼe. Upévare ko lívro ideprovechoitereíta pene famíliape, oĩgui ipype heta konsého oipytyvõtava chupekuéra ojehekýi hag̃ua umi mbaʼe vaígui. Péro la iñimportantevéva hína oipytyvõta umi mitãme oñemoag̃ui hag̃ua Jehováre, ñande Apohare iñaranduetéva. Pe Mboʼehára Guasu siémpre oipytyvõ vaʼekue umi héntepe ojapo hag̃ua upéva. Hiʼãite ningo oréve ko lívro ideprovécho peẽme ha pene famíliape ikatu hag̃uáicha peiko Jehová oipotaháicha, ha haʼe tapendevendesi.