Jesucristo, ​pe Mesías oñeprometevaʼekue

JAIKUAA hag̃ua mávapa pe Mesías, Ñandejára Jehová oikuaaukavaʼekue umi iprofétape heta mbaʼe pe Mesíasgui, pe livertadór oñeprometevaʼekue. Omombeʼu mbaʼéichapa onaséta, mbaʼépa ojapóta, ha mbaʼéichapa omanóta. Koʼã profesía oñekumplipaite Jesucrístore, ha ndojavýi ni michĩmi. Upéva jahechakuaa umi profesía oñeʼẽva Jesús nasimiéntore ha umi mbaʼe ohasavaʼekuére imitãme.

Pe proféta Isaías heʼivaʼekue pe Mesías ouvaʼerãha pe Rréi David famíliagui (Isaías 9:7). Ha upeichaite, Jesús ouvaʼekue David famíliagui (Mateo 1:​1, 6-17).

Miqueas, Ñandejára proféta avei, heʼivaʼekue ko mitã onasevaʼerãha ‘Belén Efrátape’ ha oikotaha chugui peteĩ mburuvicha (Miqueas 5:2). Jesús onasérõ guare, oĩvaʼekue mokõi táva Israélpe hérava Belén. Peteĩ opytavaʼekue nórte gotyo, Nazaret ypýpe, ha pe ótro katu Judápe, Jerusalén ypýpe. Pe opytáva Jerusalén ypýpe oñehenoivaʼekue yma Efrata. Ha Jesús onase upe távape, pe profesía heʼihagueichaite (Mateo 2:1).

Avei peteĩ profesía heʼivaʼekue Ñandejára ohenoitaha Itaʼýrape ‘Egíptogui’. Imitãrõ guare, Jesúspe ojeguerahavaʼekue Egíptope ha ojegueru jey chupe Herodes omano rire. Upéicha oñekumpli pe profesía (Oseas 11:1; Mateo 2:15).

Pe rrekuádro hérava: “Umi profesía oñeʼẽva pe mesíasgui”, retopáta heʼiha “Profesía”, ha upépe oñemoĩ umi téysto omombeʼúva heta mbaʼe pe Mesíasgui. Ikatu rembojoja koʼã téysto umi oĩva ndive pe heʼihápe “Mbaʼéichapa oñekumpli”. Upéicha rejapóramo regueroviavéta Ñandejára Ñeʼẽ haʼeha pe añetegua.

Ñahesaʼỹijo vove koʼã téysto, ñanemanduʼavaʼerã koʼã profesía ojehaihague heta síglo Jesús onase mboyve. Ha Jesús heʼivaʼekue: ‘Opa mbaʼe ojehaivaʼekue chehegui Moisés léipe ha umi Profétape ha umi Sálmope oñekumplivaʼerã’ (Lucas 24:44). Ha rehechaháicha nde Bíbliape, umi mbaʼe ojehaivaʼekue oñekumplipaite.