KAPÍTULO 19

¿Mbaʼéichapa ikatu aipuru porã che pláta?

¿Mboy vésepa repensa jepi nanderupytyiha nde pláta?

□ Núnka

□ Sapyʼánte

□ Pyʼỹinte

¿Mboy vésepa rejogua jepi umi kósa hepýva ha noĩriva nde posivilidápe?

□ Núnka

□ Sapyʼánte

□ Pyʼỹinte

¿Mboy vésepa rejogua umi mbaʼe nereikotevẽiva oĩ rupi de ofértante?

□ Núnka

□ Sapyʼánte

□ Pyʼỹinte

¿REPENSA jepi nanderupytyiha nde pláta? Reguerekovérire ikatúta kuri rejogua pe selulár reipotaitéva, térã pe sapatu ndegustaitéva. Ikatu voi oiko nderehe peteĩ mitãkuña hérava Joan omombeʼúva: “Heta vése che amigokuéra cheinvita rosẽ hag̃ua ha umícha jave heta rogasta jepi. Péro, ¿mbaʼéicha piko añenegáta chuguikuéra? Che ajedivertise avei ha ndaigústoi ningo jaʼe: ‘Ndaikatumoʼãi aha pórke chesogue’”.

Rejepyʼapyeterei rangue nandeplátai haguére, iporãvéta reñehaʼãrõ repensa mbaʼéichapa reipuru porãta pe reguerekóva. Ikatu oime ere natekotevẽiha rejapo upéva pórke reiko gueteri nde tuakuérandi. Péro epensamíntena, ¿ndépa rejepoíne peteĩ rrío osyry hatãvape ndereytakuaáiramo? Ikatu upépe reaprende forsadoite, péro ikuentavéta reaprendérõ rejepoi mboyve, ¿ajépa?

Upéicha avei, ikuentavéta reaprende reipuru porã nde pláta reiko aja gueteri nde tuakuérandi. Péicha ifasilvétama ndéve resẽ vove nde rógagui. Rréi Salomón ningo heʼi vaʼekue voi ‘pe pláta ñandeproteheha’ (Eclesiastés 7:12). Péro ikatu hag̃uáicha ndeprotehe, primeroite reaprende vaʼerã reipuru porã. Rekonsegíramo upéva, nde voi rejeroviavéta ndejehe ha nde tuakuéra avei.

Eaprende mbaʼéichapa ikatu reñemantene

¿Reporandúmapa nde tuakuérape mboýpa ogasta jepi káda mes? Por ehémplo, ¿mboýpa opaga hikuái lus, y ha tembiʼúre? Ha oimérõ pereko veíkulo térã peiko alkilérpe, ¿mboýpa opaga umívare? Nemanduʼa vaʼerã nde avei reipuru ha renohẽha provécho umi mbaʼégui, ha resẽrõ nde rógagui ndetéma repaga vaʼerãha umívare. Upévare ifasilvéta ndéve reikuaa porãrõ mboýpa reikotevẽta reñemantene hag̃ua. Ejerurekuaa nde tuakuérape tohechauka ndéve umi rresívo, ha eñatende porã oexplika jave ndéve mbaʼéichapa ojapo hikuái ohupytypa hag̃ua chupekuéra ipláta.

La Biblia heʼi: “Pe persóna iñarandúva ohendu koʼã konsého ha oaprendeseve. Pe iñentendídova oheja ótro ikatupyryvéva oipytyvõ chupe” (Proverbios 1:5). Upéicha ojapo vaʼekue Ana, haʼe omombeʼu: “Che túa chemboʼe aanota vaʼerãha mboýpa agastáta káda mes, ha ahechakuaa upéva tuicha chepytyvõha aipuru porã hag̃ua che pláta”.

Ana omombeʼu isy avei omboʼe hague chupe heta mbaʼe ideprovechoitereíva. Haʼe heʼi: “Che sy chemboʼe akompara hag̃ua umi présio ahecha hag̃ua umi okonvenivétava. Ahecharamoiterei mbaʼéichapa haʼe michĩmi plátare ojogua heta mbaʼe”. ¿Mbaʼéichapa oipytyvõ Ánape ko konsého? Haʼe omombeʼu: “Koʼág̃a aipuru porãve che pláta, ha nañekevrantái pórke ndaikói agastapa rei ni adevepa”.

Ani regastapa rei nde pláta

Ikatu oime reiko gueteri nde tuakuérandi, ha repensa ifasiletereiha rekontrola hag̃ua nde gastokuéra reguereko rupi nde pláta, tahaʼe nde tuakuéra omeʼẽ rupi ndéve térã rembaʼapo rupi. Péro nemanduʼa vaʼerã haʼekuéra opagaha umi gásto tuichavéva oĩva nde rógape, ha upévare ikatuha reipuru nde pláta umi mbaʼe ndegustávape, ha añetehápe igústo jaipuru péicha ñande pláta.

Péro sapyʼánte oñepyrũ pe provléma ne amigokuéra ndejopýramo regastapa rei hag̃ua. Por ehémplo, Elena orekóva 21 áño heʼi: “Che amigokuéra ningo ohoseterei de kómpra. Ha rosẽ jave, haʼete voi enterovéva opensaha rogasta vaʼerãha rojediverti hag̃ua”.

Katuete ningo reipota ne amigokuéra ndeguerohory, péro eñeporandumína: “¿Che piko agasta arekógui voi, térã ndapytavaiséiguinte che amigokuérandi?”. Oĩ ogastáva ipláta oipotágui ikompañéro térã iñamigokuéra omombaʼe ha orrespeta chupe. Péro, ¿reipotápa ne amigokuéra oĩ nendive ndepláta haguérente térã nderayhu ha ndekuaa porãgui? Ikatu hína reike heta provlémape reikóramo regasta nde pláta rekonsegi hag̃ua amígo, koʼýte oimérõ reguereko tarhéta de krédito o dévito. ¿Mbaʼépa ikatu rejapo ani hag̃ua reʼa upe ñuhãme?

Ekontrola umi mbaʼe regastáva

Reipurupa rangue sapyʼaitépe nde suéldo un mespegua, ikatu rejapo Elena ojapoháicha. Haʼe heʼi: “Asẽta jave che amigokuérandi akalkuláma voi mboýpa agastáta ha upévante la araháva. Ha che suéldo oñemoĩ rupi chéve dirékto pe vánkope, anohẽ pe aipurútava añónte. Avei, aha de kómpra umi ohekakuaávandi umi présio okonvenivétava, ndahaʼéi umi ojoguávandi ojuhu raẽvéva ha ogastapa reíva ipláta”.

Koʼã suherénsia ikatu nepytyvõ oimérõ reguereko tarhéta de krédito:

● Ikatu reanotapaite umi mbaʼe rejoguáva ha avei reñongatukuaa umi rresívo, ha upéi rekompara rehecha hag̃ua noiméipa repaga hína peteĩ mbaʼe nderejoguái vaʼekuére.

● Ani rejeatrasa repaga hag̃ua nde tarhéta de krédito. Ha ijáramo ndéve, epagapaite voi pe reipuru vaʼekue.

● Eñatende vaʼerã emeʼẽtarõ nde tarhéta número térã ifécha de vensimiénto tahaʼe por teléfono térã Internétpe.

● Eñehaʼã ani eipuru nde tarhéta de krédito reguenohẽ hag̃ua pláta umi kahérogui. Normálmente umi vánko okovra hetave interés ojepurúramo peichagua tarhéta upearã.

● Ani reipuruka avavépe, tahaʼe jepe ne amígo.

Péro, ¿ndaifasilvemoʼãi piko rekontrola nde gastokuéra ndeplatavéramo? Añetehápe nahániri. Ñamoĩmína peteĩ ehémplo: epensamína remanehaha rehóvo nde áuto, péro ndaikatuiha rehecha mbaʼeve pórke rejehesajokua, ¿mbaʼépa rejapo vaʼerã pono rechoka? ¿Resolusionánepa remoĩvéramo chupe kombustívle? Upéva ningo naisentidomoʼãi. Upéicha avei, nerekontroláiramo nde gastokuéra, neresolusionamoʼãi mbaʼeve regana haguérente hetave pláta.

Ikatu oime repensa nde reipuru porãha voi la nde pláta. Péro epensamína, ¿mboýpa regasta raʼe pe mes pasádo, ha mbaʼe mbaʼépa rejogua raʼe? Nanemanduʼaporãiramo umívare, ikatu hína oime ofalta remehorave. Ehechamína koʼã konsého nepytyvõtava:

1. Eanota umi mbaʼe regastáva. Un mes aja, eanota mboy plátapa rerresivi ha mbaʼe féchapepa. Eanota avei umi mbaʼe rejoguáva ha mboýpa osẽ káda uno. Upéi fin de méspe, esuma mboýpa erresivi en totál, ha ekompara upe regasta vaʼekuére.

2. Eplanea mbaʼéichapa reipurúta nde pláta. Emaña pe lísta oĩvare páhina 163-pe. Heʼihápe “Pláta arresivíva” eanota mboýpa erresivi jepi un méspe. Pe párte heʼihápe “Mboýpa agastáta”, eanota mbaʼépepa reipuruse hína nde pláta ha mboýpa regastáta káda kósare. Reikuaa hag̃ua mbaʼéichapa rekompletáta koʼã párte ikatu reipuru umi mbaʼe reanotáma vaʼekue heʼiháicha pe primer konsého. Upéi, pe párte heʼihápe “Mboýpa agastáma”, eanota ehóvo mboýpa regasta añetehápe, ha emoĩ avei umi gásto nderekalkulái vaʼekue reguerekotaha.

3. Ekambia tekotevẽramo. Regastáramo hetave pe rekalkula vaʼekuégui ha reñepyrũma redeve, iporãta repagapárõ nde deveha ha eñehaʼã ekambia. Upéicha reipuru porãta nde pláta.

Rehechaháicha, pe pláta ikatu ideprovécho reipuru porãramo. Haimete voi opárupi lénto la hénte oikotevẽ pláta oiko hag̃ua, ha upévare iñimportanteterei enterovéva oaprende mbaʼéichapa ikatu ogana ha oipuru porã la pláta. Péro reñatende vaʼerã avei ani hag̃ua reñekonsentraiterei upévarente. Peteĩ mitãrusu hérava Matthew heʼi: “Ideprovécho ningo añete pe pláta, péro ndahaʼéi upéva la iñimportantevéva. Ni mbaʼevéicharõ ndovaléi ñambotapykue ñane famíliape térã Jehovápe pe pláta káusare”.

TÉXTO OĨVA LA BÍBLIAPE

“Pe pláta ñandeprotehe. Péro reikuaáramo umi mbaʼe iporãva ha nearandúramo, upéva iporãvéntema, pórke nepytyvõta reikove hag̃ua” (Eclesiastés 7:12).

PETEĨ KONSÉHO

Reho mboyve rejogua umi mbaʼe reikotevẽva, emoĩ peteĩ lístape mbaʼe mbaʼépa rejoguáta. Egueraha pe pláta reikotevẽtavante ha ani rejogua ótra kósa ndaipóriva pe lístape.

¿REIKUAÁPA RAʼE?

Reguenohẽramo peteĩ préstamo de 10.000.000 de Gs., ha repaga 60 kuóta de 390.000-pe, ikatúta repagapa la nde déuda 5 áñope ae, ha amo ipahápe repagáta mas de 23.000.000 de Gs.

UMI MBAʼE AJAPÓTAVA

¿Mbaʼépa ikatu ajapo akontrola hag̃ua mboýpa agasta? ․․․․․

¿Mbaʼépa ikatu areko enkuénta aipurútaramo tarhéta de krédito ajogua hag̃ua peteĩ mbaʼe? ․․․․․

¿Mbaʼépa aporanduse che túa térã che sýpe ko témare? ․․․․․

¿NDÉPA MBAʼE ERE?

● ¿Mbaʼérepa iñimportánte reaprende reipuru porã nde pláta reiko aja gueteri nde tuakuérandi?

● ¿Mbaʼérepa sapyʼánte ikatu ijetuʼu reipuru porã hag̃ua nde pláta?

● ¿Mbaʼéichapa ikatu reipuru nde pláta reipytyvõ hag̃ua nde rapichakuérape?

[Komentário oĩva páhina 162-pe]

“Che aanotapáma voi mboýpa agastáta káda mes ha añehaʼã arrespeta, upéicha rupi tuicha orrendive chéve che pláta, pórke ajogua umi mbaʼe aikotevẽvante” (Leah).

[Rrekuádro oĩva páhina 158-pe]

Reipuru lája nde pláta ohechaukáta mbaʼépa remombaʼeve

¿Mbaʼépepa reipuru jepi nde pláta? Reipuru meméramo reipytyvõ hag̃ua ótrope, ojekuaáta nderehe añetehápe reñeinteresaha nde rapichakuérare (Santiago 2:14-17). Avei, rejepokuaáramo rekontrivui Ñandejára organisasiónpe g̃uarã, emombaʼeguasu hína Jehovápe “ha emeʼẽ chupe umi mbaʼe iporãvéva erekóva” (Proverbios 3:9). Péro, ¿mbaʼépa rehechaukáta siémpre reipurúramo nde pláta ndejupe g̃uarãnte?

[Taʼanga ha informasión oĩva páhina 163-pe]

Rekompleta hag̃ua

Mbaʼéicha aipuru che pláta káda mes

Efotokopia ko páhina

Pláta arresivíva

OMEʼẼVA CHÉVE CHE TUAKUÉRA

CHE TRAVAHOHÁPE

ÓTRO

Totál

Gs.․․․․․

Mboýpa agastáta

TEMBIʼU

․․․․․

AO

․․․․․

SÁLDO

․․․․․

DIVERSIÓN

․․․․․

KONTRIVUSIÓN

․․․․․

AÓRRO

․․․․․

ÓTRO

․․․․․

Totál

Gs.․․․․․

Mboýpa agastáma

TEMBIʼU

․․․․․

AO

․․․․․

SÁLDO

․․․․․

DIVERSIÓN

․․․․․

KONTRIVUSIÓN

․․․․․

AÓRRO

․․․․․

ÓTRO

․․․․․

Totál

Gs.․․․․․

[Taʼanga oĩva páhina 160-pe]

Nerekontroláiramo mbaʼéichapa regasta nde pláta, haʼetéta remaneháva peteĩ áuto rehechaʼỹre nde rape