KAPÍTULO 29

¿Mbaʼépa ikatu ajapo anivéma hag̃ua apensa pe séxore?

PETEĨ mitãrusu hérava Miguel omombeʼu mbaʼépa ojehu chupe: “Chéngo tódo el tiémpo apensa umi mitãkuñáre, ha upearã natekotevẽi voi ni ahecha peteĩme ohasávo. Chekuerái upévagui, pórke heta vése ndaikatúi ni añekonsetra la ajapóvare upéicha rupi”.

¿Oikópa avei nderehe upéva? Oĩ heta mitãrusu tódo el tiémpo opensáva umi mitãkuñáre, ha avei mitãkuña tódo el tiémpo opensáva mitãkuimbaʼére. Haʼete voi orekóva hikuái peteĩ gérra iñakãme umi deséo sexuál ndive, ha upévare manterei opensa koʼã mbaʼére. Miguel heʼive: “Peichagua pensamiénto heta vése ojapoka ndéve umi mbaʼe naisentídoiva. Por ehémplo, sapyʼánte aha jave supermerkádope ajere heta vése pe estasionamiéntope térã umi pasíllore ahechaséguinte peteĩ mitãkuña porãme”.

Nemanduʼa vaʼerã umi deséo sexuál jaguerekóva ndaivairiha. Amo ipahápe ningo Ñandejára voi ojapo vaʼekue yvyporakuérape ikatu hag̃uáicha kuña ha kuimbaʼe ojegusta ojuehe, ha umi omendáva ovyʼa hag̃ua oñondive oreko jave rrelasión sexuál. Upéicharõ jepe, umi soltéro lomímonte oguereko jepi avei umi deséo sexuál. Oikóramo nderehe upéva, ndeʼiséi katuete nde haʼeha peteĩ persóna hekovaíva ni hekokyʼáva. Reñehaʼãmbaitéramo, nde ikatu siémpre nderekopotĩ. Péro rekonsegi hag̃ua upéva, reaprende vaʼerã rekontrola umi mbaʼe repensáva. ¿Mbaʼéichapa ikatu rejapo upéva?

Eiporavo porã mávarepa rejeheʼa. Ikatu oime sapyʼánte rehenduse mbaʼépa heʼi ne kompañerokuéra oñeʼẽ jave séxore. Ha ikatu oime sapyʼánte rejapose upéva pono opensa nderehe hikuái nediferenteha chuguikuéra. Péro rejapóramo upéicha, ijetuʼuvéta ndéve rekontrola hag̃ua umi mbaʼe repensáva. Upéicharõ, ¿mbaʼépa rejapo vaʼerã péicha jave? ¿Resẽ reho upégui? Si, upéva la rejapo vaʼerã, ha natekotevẽi retĩ rejapo hag̃ua upéva. Ehónte upégui ejapoʼỹre mbaʼeve oñembohory hag̃ua nderehe hikuái ni rehechaukaségui ndevaleveha chuguikuéra.

Emboykete umi entretenimiénto itieʼỹva. Jaikuaaháicha, ndaiváiri entéro umi pelíkula ha músika oĩva guive. Péro koʼág̃arupi oĩ heta hetave umi ojepreparáva voi omoakãraku hag̃ua la héntepe. ¿Mbaʼe konséhopa jatopa la Bíbliape upévare? “Ñamopotĩ vaʼerã ñande rete ha ñane korasõ. Jahechaukákena jarrespetaha Ñandejárape ha péicha káda día ñanepotĩvéta henondépe” (2 Corintios 7:1). Upéicharõ, emboykete vaʼerã opaichagua entretenimiénto orekóva mbaʼe tieʼỹ.a

Ko provléma káusare oĩ ojejavykýva

Oĩ mitãrusu ha mitãkuña ojejavykýva okalma hag̃ua umi deséo sexuál orekóva. Péro upéva ikatu tuichaiterei operhudika chupekuéra. La Biblia heʼi porã: “Pejukáke umi mbaʼe vai oĩva pende pype, ani hag̃ua penderekovai, penderekokyʼa, peneakãraku vai ha ndapejejokokuaavéi, ani pepensa umi mbaʼe vaíre, ha ani peipotaiterei mbaʼe ahéno” (Colosenses 3:5). Umi ojejavykýva ndojukái umi deséo vai orekóva, upéva rangue pe ojapóva hikuái omoakãrakuve rei chupekuéra.

Oiméramo nde rejejavyky, upéva ojapóta ndehegui peteĩ esklávo umi deséo reguerekóvagui (Tito 3:3). ¿Mbaʼépa rejapokuaa reheja hag̃ua ko vísio? Primeroite, remombeʼu álgienpe la rejapóva. Peteĩ ermáno heta áñore oñehaʼã vaʼekue anivéma hag̃ua ojejavyky heʼi: “Ambyasyete chemitã reheve nañanimái hague amombeʼu ótrope areko hague upe provléma. Upéicha rupi hetaiterei áñore chemolesta che konsiénsia. Ha amo ipahápe ojeperhudikáma pe amista arekóva che rapichakuérandi, ha ivaiveha, ambyai avei kuri che amista Jehovándi”.

¿Mávapepa remombeʼukuaa la ne provléma? Ikatu reñemongeta nde túa térã nde sýndi, osino ikatu avei peteĩ ermáno iñakãguapývandi. Reñepyrũ hag̃ua ikatu ere chupe: “Amombeʼusemi ningo ndéve peteĩ provléma chepyʼapyetereíva”.

Peteĩ mitãrusu hérava Andrés odesidi kuri oñemongeta peteĩ ansiánondi. Haʼe heʼi: “Amombeʼu aja chupe la oikóva, haʼe oñepyrũ hesay pororopaite. Upéi oasegura chéve Jehová cherayhuetereiha, ha heʼi oĩha voínte heta mitãrusu ha mitãkuña orekóva ko provléma. Opromete oporandutaha jepi chéve mbaʼetekópa aha hese, ha ohekataha umi informasión chepytyvõtava. Añemongeta rire hendive, ajedesidi nañentregamoʼãiha lomímonte haʼa jeýrõ jepe”.

Mario katu odesidi vaʼekue oñemongetataha itúandi, ha haʼe ohendu porã ha ontende chupe. Itúa omombeʼu voi chupe imitãme oguereko hague avei pe provléma ha ijetuʼu hague chupe ohejaite hag̃ua. Mario heʼi: “Che túa ningo isinseroiterei chendive, ha upéva ojapo porãiterei cherehe. Apensávo haʼe ipuʼaka hague pe vísiore, ahechakuaa che avei ikatutaha akonsegi upéva. Opokoiterei cherehe mbaʼéichapa orreaksiona papa, ha upévare añepyrũ voi cherasẽ”.

Andrés ha Mario ikatu kuri ipuʼaka pe vísiore, ha nde ikatu avei rekonsegi upéva rehekáramo álgien nepytyvõ vaʼerã. Ha sapyʼánte reʼa jeýramo jepe, ¡esegíkena eñehaʼã ha ani eñentrega!b

Ekontrola umi mbaʼe repensáva

Apóstol Pablo heʼi vaʼekue: “Che adomina che rete ha areko che esklávoramo” (1 Corintios 9:27). Upéicharõ, oúramo ne akãme umi pensamiénto tieʼỹ tekotevẽ rejeovliga repensa hag̃ua ótra kósare. ¿Ha mbaʼe rejapokuaa lomímonte resegírõ repensa umívare? Ikatu eho ejapo ehersísio. La Biblia heʼi voi: “Pe ehersísio ojapóva peteĩ persóna omombarete hag̃ua hete, [...] ideprovécho” (1 Timoteo 4:8). Tuichaiterei nepytyvõta reipeʼa hag̃ua ne akãgui umi pensamiénto resẽramo rejapo peteĩ kamináta térã ótro ehersísio.

Péro la iñimportantevéva siémpre ereko vaʼerã enkuénta haʼe mbaʼeichaitépa ikatu nepytyvõ ñande Ru yvagapegua. Peteĩ mitãrusu heʼi: “Sapyʼánte oúramo che akãme umi pensamiénto tieʼỹ, ensegída ajerure asy Ñandejára chepytyvõmi hag̃ua”. Añetehápe Ñandejára ndojapomoʼãi peteĩ milágro ha oipeʼapaite ndehegui umi deséo reguerekóva. Péro haʼe nepytyvõ rupi, rehechakuaáta oĩha hetaiterei mbaʼe porã ikatúvare repensa meme.

[Nóta]

TÉXTO OĨVA LA BÍBLIAPE

“Pesegíkena pejepyʼamongeta [...] entéro mbaʼe iporãvare ha entéro mbaʼe omeresévare ojeguerohory” (Filipenses 4:8).

PETEĨ KONSÉHO

Oimérõ rejejavyky ha reñehaʼã hína reheja ko vísio péro reʼa jey pype, ¡aníkena eñentrega! Epensa umi mbaʼe rejapóvare ha mbaʼérepa reʼa jey, ha anivéma ejapo umíva.

¿REIKUAÁPA RAʼE?

Umi mbaʼe repensáva oafekta umi mbaʼe rejapóva ha avei mbaʼeichagua persónapa nde (Santiago 1:14, 15).

UMI MBAʼE AJAPÓTAVA

¿Mbaʼépa ajapóta ahechakuaáramo añepyrũha apensa mbaʼe tieʼỹre? ․․․․․

¿Mbaʼépa ajapóta che kompañerokuéra oñepyrũramo oñemongeta peteĩ mbaʼe kyʼáre? ․․․․․

¿Mbaʼépa aporanduse che túa térã che sýpe ko témare? ․․․․․

¿NDÉPA MBAʼE ERE?

● ¿Mbaʼérepa ikatu jaʼe umi deséo sexuál ndahaʼeiha katuete siémpre ivaíva?

● ¿Mbaʼérepa reaprende vaʼerã rekontrola umi deséo reguerekóva?

● ¿Mbaʼeichagua entretenimiéntopa ikatu hína omoinge ne akãme umi pensamiénto tieʼỹ?

● ¿Mbaʼérepa iporãta reho ótro ládo oĩramo oñepyrũva oñeʼẽ mbaʼe tieʼỹre?

[Komentário oĩva páhina 240-pe]

“Añepyrũramo apensa umi mbaʼe ikatúvare chemoakãraku, ensegída apensa ótra kósare. Ha añehaʼã chemanduʼa upéicha umi pensamiénto ha deséo opataha ohóvo” (Scott).

[Taʼanga oĩva páhina 239-pe]

¿Ajépa nderehejamoʼãi oike peteĩ vírus ne komputadórape? Upéicha avei, nderehejái vaʼerã umi pensamiénto kyʼa oike ne akãme