KAPÍTULO 34

¿Mbaʼérepa ajapo vaʼerã la Biblia heʼíva?

Eñeimahinamína ko situasión: nde reime hína mokõi ne kompañérandi pe rrekréo aja, ha peichahágui ou peẽ peimeha gotyo pe mitãrusu ova ramóva pende koléhiope.

Peteĩva osẽ heʼi ndéve: “Nde, Sergio ningo itavyete nderehe. Ojekuaa porãiterei upeichaha, pórke tódo el tiémpo omaña nderehe”.

Pe ótra ne kompañéra katu heʼi ndéve mbeguekatumi: “¿Ha eikuaa mbaʼépa? Eaprovecha vaʼerã pórke neʼĩra ichíka”.

Nde repilláma voi haʼe ojegustaha nderehe, pórke neinvita kuri reho hag̃ua hógape peteĩ fiestahápe. Ere kuri chupe ndaikatumoʼãiha reho, péro upéi repyta repensa ikatúne hague igústo rehórire.

Repensa aja koʼã mbaʼére, peteĩva ne kompañéra heʼi:

“¡Ambyasyete piko arekomaha che nóvio! Ndahaʼéirire upéicha, ni napensamoʼãi kuri aasepta hag̃ua Sérgiope”.

Upéi katu omaña nderehe, ha hova vai lénto ndéve. Upépe repilláma mbaʼépa heʼíta ndéve.

“¿Mbaʼére piko nde nandechíkoi?”.

¡Ndekueráima oñeporandu hague ndéve upéva! Reipotáma nde chikorã, péro nde tuakuéra heʼi reime vaʼerãha preparáda remenda hag̃ua, ha upéi ikatuha reñemoĩ de nóvio. Upevaiténte la ndejokóva.

Upépe pe ótra ne kompañéra heʼi ndéve: “¿Anichéne ne rrelihión jeýma la provléma?”.

Ha nde repensa: “Haʼetéma voi, upéva la chejokóva”.

Haʼe katu oñembohory nderehe ha heʼi ndéve: “Ndéngo Biblia, Biblia, Bíbliante voi tódo el tiémpo. ¿Ndaikatúi piko sapyʼapyʼa jepe rejedivertiʼimi?”.

¿OĨPA oñembohorýva nderehe reiko rupi la Biblia heʼiháicha? Upéicharõ, oiméne repensámava la Biblia ndohejaiha voi ni jajediverti. Débora heʼi: “Apensámi umi mbaʼe la Biblia omboʼéva káusare ndaikatuiha ajapo umi mbaʼe chegustáva. Ha haʼetévaicha umi che kompañerokuéra ovyʼaveha pórke ndaipóri mbaʼeve ojokóva chupekuéra”.

¿Añetehápe piko ovyʼave hikuái?

Natekotevẽi rehasa asy reaprende hag̃ua. La Biblia ohechauka iporãvetaha reaprendérõ umi ótro ohasa vaʼekuégui. Upéicha ojapo kuri peteĩ salmísta hérava Asaf, haʼe opensa Jehová ojeruréva ijetuʼuha oñekumplipa hag̃ua. Péro upéi omaña rire mbaʼéichapa oiko umi hénte ndoservíriva Ñandejárape, ohechakuaa añetehápe haʼekuéra oĩha peteĩ situasión ipeligrósovape ojoguáva “peteĩ lugár isỹivape” (Salmo 73:18).

Jahechami mbaʼépa heʼi unos kuánto mitãrusu ha mitãkuña ndosegíri vaʼekue umi konsého bíblico, ha oreko rrelasión sexuál omenda mboyve.

● ¿Mbaʼéicha rupi rekambia?

Débora: “Umi che kompañerokuéra oreko inóvio ha inóvia, ha haʼete kuri chéve ovyʼaitereiha hikuái. Ahechávo oñoañuã térã oñohetũha, aenvidia chupekuéra pórke añeñandu cheaño. Añemoĩmi voi órare apensa peteĩ mitãrusu chegustávare, ha upévare koʼýte aimese hendive”.

Miguel: “Ajepokuaámi alee umi puvlikasión ha ahecha umi prográma ohechaukáva pe séxo haʼeramoguáicha peteĩ diversión. Che amigokuérandi pyʼỹi roñeʼẽmi upe témare, ha upévare apensa meme igustotaha ikatúramo areko rrelasión sexuál. Ha aime jave cheañoháme peteĩ mitãkuñándi apensámi ikatuha roñohetũ ha ropoko ojuehe rorekoʼỹre rrelasión sexuál”.

Andrés: “Che añenvisia vaʼekue pe pornografíare, ha ahecha meme Internétpe. Avei haʼu rasámi vevída ha aha fiestahápe umi mitãrusu ha mitãkuña ndorrespetáivandi la Biblia heʼíva”.

Teresa: “Aikuaa vaʼekue ndovaleiha peteĩ persóna oreko rrelasión sexuál omenda mboyve, péro vaicha chéve ndahaʼéi la ivaietereíva upéva. Ñepyrũrã ndarekoséi kuri rrelasión sexuál, péro ipahápe ndaikatuvéima ajejoko. Ha tiémpo rire che konsiénsia nachemolestavéima”.

● ¿Nembovyʼápa añetehápe umi mbaʼe rejapo vaʼekue?

Débora: “Ñepyrũrã igústo, pórke che kompañerokuéra cheasepta ha apensa ikatuha ajapo ajaposéva. Péro sapyʼamínte odura. Upéi añandu apytaha chekyʼaiterei, ndavaleiha mbaʼeverã ha ndavyʼavéi. Che nañemantenéi vírhen amenda mboyve, ha koʼág̃a ambyasyeterei la ajapo vaʼekue”.

Andrés: “Saʼi saʼípe ijetuʼuvéma chéve ajejoko ha akontrola hag̃ua umi deséo vai. Péro avei añepyrũ añeñandu vaieterei pórke che konsiénsia chemolesta, ha añedesepsiona chejehegui voi”.

Teresa: “Chemitãme cherekovai kuri, ha upéva tuicha cheperhudika. Che nóvio ha che ropensa vaʼekue rovyʼataha oñondive, péro upéi ndoikói upéva. Mokõivéva hetaiterei rosufri. Heta vése koʼẽmba peve cherasẽ, ha ambyasyeterei ndajapói haguére la Jehová chemboʼe vaʼekue”.

Miguel: “Sinséramente hetaiterei asufri. Umi mbaʼe ajapo vaʼekue operhudika ótrope, ha añehaʼãmbaitérõ jepe pono apensa upévare, siémpre añeñandu vai apensávo oĩ hague ótro osufríva ameʼẽségui gústo chejupe”.

● Oĩramo peteĩ mitãrusu térã peteĩ mitãkuña opensáva la Biblia orekoha hetaiterei léi ndohejáiva javyʼa ni jajediverti, ¿mbaʼe konséhopa remeʼẽne chupe?

Teresa: “Ejapónte umi mbaʼe Jehová heʼíva oĩ porãha, ha ejeheʼa meme umi ojapóvare avei upéva. Upéicharõ ikatúta revyʼa”.

Débora: “Ndaikatúi ñapensa ñandejehénte ha jajapo umi mbaʼe ñandegustávante. Umíva oafekta avei ótrope ha nañapenáirõ Ñandejárare, siémpre jajeperhudikáta”.

Andrés: “Ñanemitãme ñapensa jepi ñane kompañerokuéra ovyʼaveha ojapógui ojaposéva. Opensa lája hikuái ikatu ova ñanderehe. Upévare iñimportánte reiporavo porã ne amigorã. Ejeroviánte Jehováre, upéicha rejehekýita heta mbaʼe nembosufrítavagui”.

Miguel: “Jehová omeʼẽ ñandéve hetaiterei rregálo iporãitereíva, umíva apytépe pe kapasida jadesidi hag̃ua ñañekomporta porãtaha, ha ñanderekopotĩtaha. Jajapórõ peteĩ mbaʼe vai ndaikatúigui jajejoko, jadesperdisia hína koʼã rregálo. Oimérõ ereko peteĩ provléma, emombeʼúkena nde tuakuérape térã peteĩ ne amígo ikatúvape nepytyvõ. Ha rejapórõ peteĩ mbaʼe vai, emombeʼu avei upéva, ha ejapo ikatúva guive resolusiona hag̃ua la oiko vaʼekue. Rejapórõ Jehová heʼíva ñandéve, ikatúta reiko pyʼaguapýpe”.

La Biblia heʼíva siémpre ñandeprotehe

Jehová haʼe ‘Ñandejára ovyʼáva’ ha oipota nde avei revyʼa (1 Timoteo 1:11; Eclesiastés 11:9). Umi mbaʼe la Biblia nemboʼéva siémpre ideprovéchota ndéve. Oĩ opensáva umi léi ha konsého bíblico ojoguaha peteĩ kamísa de fuérsape, pórke heʼi oproiviha ñandehegui heta mbaʼe ha haʼete chupekuéra ñandejokoitereíva. Péro añetehápe la Biblia heʼíva ojogua peteĩ sinturón de seguridápe, pórke ñandeprotehe ani hag̃ua ñañelastima vai.

Añetehápe, siémpre ikatu rejerovia la Bíbliare. Rejapórõ la heʼíva, rembovyʼaitereíta Jehovápe ha katuete resẽ porãta (Isaías 48:17).

TÉXTO OĨVA LA BÍBLIAPE

“Che hína nde Jára Jehová. Umi mbaʼe che romboʼéva ningo ideprovéchota ndéve” (Isaías 48:17).

PETEĨ KONSÉHO

Erekórõ peteĩ ermáno térã ermána imitãvéva ikatu repensa mbaʼéichapa reexplikáta chupe siémpre iporãveha jajapo la Biblia heʼíva. Remombeʼúvo ótrope umi mbaʼe regueroviáva, opytavéta ne korasõme.

¿REIKUAÁPA RAʼE?

Rejapóramo peteĩ mbaʼe vai, sapyʼaitépe ikatu rehundiete ne amista Jehovándi, péro reikotevẽta heta tiémpo reime porã jey hag̃ua hendive.

UMI MBAʼE AJAPÓTAVA

¿Mbaʼépa ikatu ajapo antende hag̃ua mbaʼérepa siémpre iporãve jaiko la Biblia heʼiháicha? ․․․․․

¿Mbaʼépa ikatu ajapo añepyrũramo aenvidia oiko lája umi hénte ko múndope? ․․․․․

¿Mbaʼépa aporanduse che túa térã che sýpe ko témare? ․․․․․

¿NDÉPA MBAʼE ERE?

● ¿Mbaʼérepa nde ere natekotevẽiha rehasa asy reikuaa hag̃ua iporãveha neñeʼẽrendu Jehovápe?

● ¿Mbaʼépa reaprende raʼe umi mbaʼe heʼi vaʼekuégui Débora, Miguel, Andrés ha Teresa?

● ¿Mbaʼére oĩ heta opensáva umi mbaʼe heʼíva la Biblia ojoguaha peteĩ kamísa de fuérsape, ha mbaʼére ikatu jaʼe tuichaiterei ojavyha hikuái?

[Komentário oĩva páhina 285-pe]

“Añetehápe hasy jajekorrehíramo, péro reñehaʼãramo remokañy la rejapo vaʼekue hetaitereive resufríta” (Sandra).

[Nóta oĩva taʼanga ndive páhina 288]

La Biblia ningo ndoipeʼái ndehegui nde liverta, upéva rangue siémpre ndeprotehe