Ehémplo porã: Lidia

Lidia ojevautisa riremi, ijeheguiete oinvita apóstol Pablo ha iñirũnguérape hógape (Hechos 16:14, 15). Upévare oreko pe priviléhio oikóvo chugui koʼã ermáno amigaite. Ha tiémpo rire Pablo ha Silas osẽ rire kárselgui, primeroite oho jey Lidia rógape (Hechos 16:40).

Ha nde, ¿ikatúpa avei ndejeheguiete reñehaʼã reikuaa porãve nde rapichakuérape ojapo haguéicha Lidia? ¿Mbaʼéichapa ikatu rejapo upéva? Reho vaʼerã hese mbeguekatúpe. Eñehaʼã nde voi eñepyrũ eñemongeta peteĩ persóna diferéntendi káda rreuniónpe. Eñehaʼã nderory ha epukavy. Ha ndereikuaáiramo mbaʼépa eréta, eporandu pe persónape peteĩ mbaʼe térã emombeʼu chupe álgo nde rejapóva. Iñimportánte avei reporohendukuaa. Mbeguekatúpe ndepyʼaguasuvétama rehóvo reñeʼẽ hag̃ua. Nesinséro ha retrata porãrõ umi ótrope, ovyʼáta nendive hikuái (Proverbios 16:24). Lidia iñamávle ha orresivi porã vaʼekue hapichakuérape. Upévare okonsegi iñamigorã ohayhúva Jehovápe ha chupe. ¡Nde avei ikatu rekonsegi upéva resegíramo iñehémplo!