Kárta omboúva pe Kuérpo Governánte

Ore ermáno rohayhuetéva:

Eñeimahinamína nde haʼeha peteĩva umi apóstol ha reĩha hína pe Sérro Olivotýpe. Peichaháguinte Jesús ojaparese upépe ha oho mboyvemi yvágape heʼi peẽme: “Oñemeʼẽta peẽme podér pe espíritu sánto ou vove pende ári, ha oikóta pendehegui che testígo Jerusalénpe, oparupiete Judéape, Samáriape ha umi lugár mombyryvehápe jepe ko yvy ape ári” (Hech. 1:8). ¿Mbaʼéichapa nde reñeñandúne raʼe ehendu rire upéva?

Posívlemente eñemondýita kuri ha eñepyrũta ejepyʼapy pórke epilla hetaitereitaha la traváho. Upéi katu eñepyrũma epensa ha ere: “¿Mbaʼéicha piko ore ropredikáta mombyryvehápe ko yvy ape ári? Ore ningo oresaʼieterei”. Upéi katu oúma ndéve ne akãme la Jesús heʼi vaʼekue peẽme pe pyhare omano mboyve: “Peteĩ esklávo ndaikatúi iñimportanteve ipatróngui. Chéve chepersegíramo hikuái, peẽme avei pendepersegíta, haʼekuéra ojapóramo che haʼéva, ojapóta avei peẽ pejéva. Péro peẽ haʼe haguére che disípulo haʼekuéra ojapóta penderehe koʼã mbaʼe vai, pórke ndoikuaái hikuái upe chembou vaʼekuépe” (Juan 15:20, 21). Epensávo koʼã mbaʼére koʼýte oiméne eñeporandu raʼe: “¿Mbaʼéicha piko ropredika porãta oĩramo oñemoĩ mbaretéva orerehe ha orepersegi vaipaitéva?”.

Koʼág̃arupi ñande testígo de Jehová jaikuaase avei koʼã mbaʼe, pórke ñande japredika vaʼerã avei “mombyryvehápe ko yvy ape ári” ha “umi hénte entéro paisguápe” (Mat. 28:19, 20). ¿Mbaʼéichaiko ikatúta ñakumpli porã ko traváho, si ojeprofetisáma voi kuri oĩtaha ñandepersegíva ha ndochaʼéiva ñanderehe?

Umi mbaʼe oñemombeʼúva lívro de Héchospe ñanemopirĩmba. Pépe oñemombeʼu ñandéve mbaʼéichapa pe espíritu sánto oipytyvõ kuri umi kristiáno yma guarépe okumpli hag̃ua iñasignasión. Ko lívro releéva hína, ojejapo voi ikatu hag̃uáicha ñaanalisa umi mbaʼe oiko vaʼekue, ha releekuévo eñandúta hína ndete voi rehasaha umi mbaʼe oiko vaʼekue yma. Katuete nesorprendéta avei mbaʼeichaitépa jajogua umi kristiáno yma guarépe. Ehecháta hína japredikaha haʼekuéraicha ha pe predikasión katu oñeorganisa haʼekuéra ojapo haguéicha avei. Epensávo koʼã mbaʼére, katuete nepytyvõta ejeroviave hag̃ua Jehová ogiaha iñorganisasiónpe, pe párte oĩva ko yvy ape ári, ojapo haguéicha voi ymave.

Restudiávo lívro de Hechos, roipotaiterei tanepytyvõ reĩ hag̃ua segúro Jehová nemombarete ha nembopyʼaguasutaha ijespíritu sánto rupive. Hiʼãite oréve esegi nekyreʼỹ epredika porã hag̃ua umi notísia porã oñeʼẽva Ñandejára Rréinore, péicha reipytyvõta umi héntepe ojesalva hag̃ua avei (Hech. 28:23; 1 Tim. 4:16).