Ñandejára oñangareko Abrahán ha ifamíliare

JEHOVÁ oikuaa Itaʼýra ohayhuvéva omeʼẽtaha hekove yvyporakuéra rehehápe. Pe profesía oĩva Génesis 3:​15-pe ohechauka upéva. Ha ñantende hag̃ua ko sakrifísio tuichaite Jehová ojapótava, haʼe ojerure Abrahánpe ojuka hag̃ua itaʼýra Isaácpe. Jahechamína mbaʼépa oiko upérõ.

Jahecháma haguéicha Ñandejára oprometékuri Abrahánpe Hemimbou oporosalvátava outaha Isaac ñemoñarégui. Haʼe ojeroviaiterei ko promésare ha oikuaa Ñandejára ikatuha omoingove jey itaʼýrape. Upévare iñeʼẽrendu ha oho ojuka hag̃uáicha Isaácpe. Péro ojukáta javete Jehová ombou hiʼánhel ha ojoko chupe. Upéi oguerohoryeterei Abrahánpe ijeroviáre ha heʼi jey chupe katuete okumplitaha ipromésa.

Upéi Isaac mokõi itaʼýra, Esaú ha Jacob. Koʼãvagui Jacob añoite omombaʼe Ñandejára heʼíva ha upévare oho porã chupe. Ñandejára ombohéra chupe Israel, ha 12 itaʼýra; koʼãva oñemboheta ha oiko chuguikuéra tetã Israel. Mbaʼéichapa oiko upéva?

Ñepyrũrã José ermanokuéra ndaijaʼéi hese ha ovende chupe tembiguairã. Ojegueraha chupe Egíptope ha upépe heta ohasa asy. Ñandejára katu oipytyvõ Josépe hekoporã ha ipyʼaguasu haguére. Upéi pe faraón omoĩ chupe mburuvicháramo ha upéicha rupi ikatu upe rire oipytyvõ ihentekuérape. Oúrõ guare peteĩ ñembyahýi guasu opárupi, Jacob omondo itaʼyrakuérape ojogua hag̃ua hiʼupy Egíptogui. Upérõ José omanda guasu Egíptope ha umi hiʼupy oĩmba ipoguýpe. José ovyʼaiterei ohecha jeývo iñermanokuérape. Ha ohechakuaa oñembyasyha hikuái iñaña haguére hendive. Upéi José operdona chupekuéra ha omondo umi ótro ihénte piári ou hag̃ua Egíptope. Faraón omeʼẽ chupekuéra umi yvy iporãvéva, ha upépe oiko porã ha oñembohetave hikuái. José ohechakuaa Jehová oiporu hague chupe okumpli hag̃ua ipromésa.

Jacob oiko ihentekuérandi Egíptope omano meve. Omano mboyvemi heʼi Ñandejára Remimbou outaha Judá ñemoñarégui ha oikotaha chugui peteĩ mburuvicha guasu. Heta áño rire José heʼi Ñandejára oguenohẽtaha Egíptogui Jacob familiakuérape.

(Oñeguenohẽ Génesis kapítulo 20-50, ha Hebreos 11:​17-22-gui.)