Mbaʼépa oikovaʼerã ára pahápe

PETEĨ árape Jesús oguapyhína idisipulokuérandi peteĩ sérrope, upe guive ojehecha porãiterei Jerusalén ha pe témplo. Jesús oñeʼẽ chupekuéra ‘pe ára paháre’ ha heʼi avei pe témplo oñehunditaha. Upévare idisipulokuéra ojerure chupe omyesakã hag̃ua upe heʼivaʼekue (Mateo 13:​40, 49). Oporandu chupe hikuái: ‘Roipota ningo ere oréve arakaʼépa oikóta koʼã mbaʼe? Ha mbaʼéichapa roikuaáta reñepyrũmaha regoverna ha opatamaha ko múndo?’ (Mateo 24:​3, BNP).

Jesús heʼi chupekuéra mbaʼépa oikóta Jerusalén ha pe témplo oñehundi mboyve. Péro heta tiémpo rire oñekumpli jey vaʼerã upe profesía. Ha ñande jaikuaa hag̃ua arakaʼétapa upéva, ñañatendevaʼerã umi mbaʼe oikóvare oparupiete ko múndope. Umíva rupive jahechakuaáta Jesús oñepyrũmaha oisãmbyhy yvágape ha koʼẽrõitéma igoviérno rupive oipeʼapataha opa mbaʼe vai ha omoĩta pyʼaguapy. Umi mbaʼe oikóva pe ára pahápe ohechauka oñehunditamaha opaichagua goviérno, ha rrelihión oñemoĩva Ñandejárare. Ha oñepyrũta peteĩ múndo pyahu.

Jesús heʼi avei haʼe oñepyrũ vove oisãmbyhy yvágape, oĩtaha ko yvy ape ári ñorairõ, ñembyahýi, yvyryrýi, ha heta mbaʼasy. Avei hetavéta ohóvo umi iñañáva. Hemimboʼekuéra katu oparupiete oikuaaukáta umi mbaʼe porã Ñandejára rréino ojapótava. Ipahápe ouvaʼerã peteĩ ‘jehasa asy guasu’, ndoikóiva gueteri arakaʼeve ko múndope (Mateo 24:21).

Mbaʼéichapa ikatu japilla oñehunditamaha ko múndo? Jesús heʼi idisipulokuérape: “Pemaʼẽ umi ígo mátare” (Mateo 24:32). Ko yvyramáta hoky vove umi hénte oikuaáma oiketaha arahaku. Upéicha avei oiko vove ojoapykueripa umi mbaʼe Jesús heʼivaʼekue, heʼise ko múndo aña oñehundipotaitemaha. Péro Jesús heʼi Itúva añoite oikuaaha mbaʼe día térã órapa oñepyrũta pe jehasa asy guasu. Upévare heʼi mbaʼéichapa jaikovaʼerã: “Pemaʼẽ porãke ani peke, avave ndoikuaáigui arakaʼépa oúta upe ára” (Marcos 13:​33, ÑÑB).

(Oñeguenohẽ Mateo kapítulo 24 ha 25; Marcos kapítulo 13; ha Lucas kapítulo 21-gui.)