KAPÍTULO 8
Mbaʼéichapa ikatu aiporavo porã che amigorã?
“Che ningo aikotevẽterei voi che amigokuérare. Chepochýramo añeʼẽ hendivekuéra añetrankilisa hag̃ua. Ndavyʼáirõ haʼekuéra chemokyreʼỹ. Ha avyʼárõ katu amombeʼuseterei voi chupekuéra. Chéverõ g̃uarã ndaikatúi jaiko amigoʼỹre.” (Brittany)
OJEʼE ñanemichĩ aja ñaikotevẽha ñane irũrã ohuga hag̃ua ñanendive, ha jakakuaavévo jahávo katu ñaikotevẽma ñane amigorã. Mbaʼépepa idiferénte? Ñane irũ ikatu oĩ ñanendive sapyʼapyʼa, péro ñane amígo tee ndahaʼéi ku oĩnteva ñanendive. Haʼe omombaʼe ha oguerohory umi mbaʼe iñimportánteva ñandéve g̃uarã.
La Biblia heʼi voi ñane amígo tee ‘opa araitépe oporohayhu, ha ñane pehenguéicha ñanepytyvõ jajejopy vai jave’ (Proverbios 17:17). Jahechakuaa upéicharõ ñane angirũ ndive jajapo ha jahasaha heta mbaʼe, ha ndahaʼéi ku ñaĩnteva oñondive sapyʼapyʼa.
Añetehápe, rekakuaavévo rehóvo reikotevẽta koʼãichagua amígo:
1. Oñehaʼãva ojapo iporãva.
2. Hekopotĩva.
3. Nepytyvõva nderekoporã hag̃ua.
Eñeporandumína: “Ojapópa che amigokuéra koʼã mbohapy mbaʼe?”. Ñahesaʼỹijomi peteĩteĩ.
Peteĩha: Oñehaʼã ojapo iporãva
Iporã reikuaa. Proverbios 18:24 heʼi: ‘Oĩ oikóva ñaneamígoramo péro ikatúva ñanerundi’. Mbaʼépa heʼise upéva? Oĩtaha heʼíva ijehe neamigoha péro ojapóvare ndohechaukamoʼãi upéva. Pór ehémplo, rerekomaparaʼe peteĩ ne “amígo” ojaprovechasénteva nderehe, térã oikóva okopi ne lómore? Oiméramo upéicha, katuete repytáneraʼe nderejeroviavéi hese.a Upévare ikuentave mbovymínte ne amígo tee, péro ikatúvare rejerovia.
Mbaʼépa rejapokuaa. Eiporavo ne amigorã umi ojapóva heta mbaʼe porã ikatúva rehaʼanga.
“Enterove ningo imanduʼa porã che amíga Yéssicare. Chéngo aipotaite avei opavave péicha oñeʼẽ porã cherehe.” (Silvana, 17 áño.)
Eñehaʼã ejapo koʼã mbaʼe:
1. Elee Gálatas 5:22, 23.
2. Koʼág̃a eñeporandu: “Ohechaukápa che amigokuéra umi mbaʼe porã oúva Ñandejára espíritugui?”.
3. Ehai umi ne amígo réra ha mbaʼéichapa ojekuaa chupekuéra.
Héra
․․․․․
Mbaʼéichapa ojekuaa chupe
․․․․․
Konsého: Oiméramo ivaívamante ojapo hikuái, tekotevẽ rekambia ne amigokuéra.
Mokõiha: Hekopotĩ
Iporã reikuaa. Rejapuráramo reiporavo hag̃ua ne amigorã, ikatu rejavy ha nejúnta vai. La Biblia heʼi voi: ‘Itavývare ojeheʼáva oñehundíta katuete’ (Proverbios 13:20). Ko téystope noñeñeʼẽihína iñakãnévare ni umi inóta vaívare koléhiope. Oñeñeʼẽ guei umi oñembotavýva, oikoséva iñakãre ha nohenduséiva umi konsého oñemeʼẽva chupekuéra. Reipotáne piko koʼãichagua ne amigorã? Ni mbaʼevéicharõ, ajépa?
Mbaʼépa rejapokuaa. Reñatende porã vaʼerã mávapepa reiporavóta ne amigorã, ani rejeheʼa oimeraẽvare (Salmo 26:4). Upéva ndeʼiséi reikotaha rejeheʼa ndéve hoʼaporãvarente ha remboyketaha nde rapichápe nderechaʼéiguinte hese. Upéva rangue rehechakuaavaʼerã mbaʼépepa ‘ojoavy umi hekopotĩva ha hekokyʼáva, umi omombaʼeguasúva Ñandejárape ha umi nomombaʼeguasúiva chupe’ (Malaquías 3:18, ÑÑB).
“Aagradese che tuvakuérape chepytyvõ haguére aiporavórõ guare che amigorã. Haʼekuéra chemokyreʼỹ meme ajeheʼa hag̃ua umi oñehaʼãvare ojapo opa mbaʼe Ñandejára oipotaháicha.” (Cristian, 13 áño.)
Embohovái koʼã porandu:
Reime jave ne amigokuérandi, rekyhyjépa nemboligárõ g̃uarã nerembiapo vai hag̃ua?
□ Sí
□ No
Oikuaámapa nde sy ha nde ru ne amigokuérape, térãpa rekyhyje heʼíramo ndéve anivéma hag̃ua rejeheʼa hesekuéra?
□ Sí
□ No
Konsého: Rembohováiramo “Sí” koʼã porandu, tekotevẽ rekambia ne amigokuéra ha reheka umi oñehaʼãva hekopotĩ ha hekoporã. Koʼãichagua angirũ katuete rejuhúta umi ojapóva Ñandejára heʼíva apytépe.
Mbohapyha: Nepytyvõ nderekoporã hag̃ua
Iporã reikuaa. La Biblia heʼi porã ‘umi júnta vai ñandeguerahataha tape vaíre’ (1 Corintios 15:33). Laura káso ohechauka upéva, haʼe omombeʼu: “Koléhiope nderepytaséiramo neaño reikovaʼerã ne kompañerokuéra heʼiháicha. Ha che ndavyʼaiete cheañorei, upévare ajapómante avei haʼekuéra ojapóva”. Mbaʼépa nemboʼe upéva? Reikóramo rejapo opa mbaʼe nde rapichakuéra heʼíva repyta porãséguinte hendivekuéra, nderekóta hikuái iñantóhope ha ojehugapáta nderehe. Ha ndereipotamoʼãi ningo upéva, ajepa?
Mbaʼépa rejapokuaa. Reñemomombyryvaʼerã nemboligávagui rekambia reiko hag̃ua haʼekuéra oikoháicha. Ikatu saʼive neamígo, péro nerembyasymoʼãi rejapo haguére upéicha. Ha iporãveha katu, upe rire rejuhúta hetave ne amigorã nemokyreʼỹtava rejapo hag̃ua iporãva (Romanos 12:2).
“Che sósio Roberto iñakãguapy ha ikalidaiterei, haʼe ningo hetáma chepytyvõ.” (Sebastian, 21 áño.)
Embohovái koʼã porandu:
Rekambiápa reñeʼẽ, reñemonde ha reiko lája repyta porãséguinte ne amigokuérandi?
□ Sí
□ No
Reñepyrũmapa remoirũ chupekuéra umi lugár ndovaleihápe reho, haʼekuéra oho rupínte?
□ Sí
□ No
Konsého: Oimérõ rembohovái “Sí” koʼã porandu, ani rehaʼarõve ha ejerure nde tuvakuérape térã peteĩ kakuaa rejeroviávare tanepytyvõ reiporavo porã hag̃ua ne amigorã. Ha oiméramo katu nde testígo de Jehová, ikatu reñemboja avei umi ansiáno rendápe, haʼekuéra ningo katuete nepytyvõta.
RETOPAVÉTA INFORMASIÓN VOLÚMEN 2, KAPÍTULO 9-PE
Oĩpa nemboligáva rakaʼe rejapo hag̃ua peteĩ mbaʼe ivaíva, térã nde voi reñandu rejaposeha upéva?
[Nóta]
a Opavave jajavy (Romanos 3:23). Upéicharõ, oiméramo ne amígo ofalla nendive ha ipyʼaite guive ojerure ndéve reperdona hag̃ua chupe, nemanduʼavaʼerã ‘pe mborayhu oheja reiha heta tembiapo vai’ (1 Pedro 4:8).
TÉYSTO OĨVA LA BÍBLIAPE
‘Oĩ angirũ ñanderayhuvéva ñane pehẽnguégui.’ (Proverbios 18:24)
PETEĨ KONSÉHO
Eñehaʼã ejeporta porã ha nderekopotĩ, upéicharõ katuete oñemoag̃uiséta avei nderehe umi oikóva péicha. Ha koʼãichagua amígo ndaijojahái!
REIKUAÁPARAʼE?
Ñandejárape g̃uarã opavave yvypóra peteĩchapa, upéicharamo jepe ohecha porã mávapepa oiporavóta iñamigorã (Salmo 15:1-5).
UMI MBAʼE AJAPÓTAVA!
Aiporavo porã hag̃ua che amigorã ajapóta koʼã mbaʼe: ․․․․․
Añehaʼãta ajeheʼave umi ijedavévare (ehai herakuéra): ․․․․․
Mbaʼépa aporanduse che ru térã che sýpe ko témare? ․․․․․
NDÉPA MBAʼE ERE?
● Ndéverõ g̃uarã, mbaʼe iporãvapa ohechauka ha ojapovaʼerã peteĩ angirũ tee? Mbaʼérepa?
● Mbaʼépa rejapokuaa rehechauka hag̃ua ikatuha oiko ndehegui peteĩ angirũ tee?
[Komentário oĩva páhina 60-pe]
“Che tuvakuéra oñemoñeʼẽrõ guare chéve akambia hag̃ua che amigokuéra, ndaikuaaséi kuri mbaʼeve, ha apensa voi: ‘Mávare piko upéicharõ ajeheʼavéta’. Péro upe rire ahechakuaa oĩha heta hénte imbaʼeporã ha ikalidavéva chuguikuéra, ha mombyry aganataha ajeheʼáramo koʼãvare”. (Carlos)
[Rrekuádro oĩva páhina 61-pe]
Ambue mbaʼe ikatúva rejapo
Eñemongeta nde tuvakuérandi. Eporandu chupekuéra mbaʼeichagua amígopa orekovaʼekue imitãrõ guare. Ombyasýpa hikuái oiporavo haguére umichagua amígo? Oiméramo upéicha, mbaʼérepa? Ejerure chupekuéra teʼi ndéve mbaʼépa ikatu rejapo ani hag̃ua nejúnta vai.
Epresenta nde tuvakuérape umi ne amígo. Oimérõ ndereipotái nde tuvakuéra oikuaa ne amigokuérape, rehechavaʼerã mbaʼérepa. Ndahaʼeipa hína reikuaágui heʼitaha ndéve anivéma hag̃ua rejeheʼa hesekuéra? Oiméramo péicha tekotevẽ rekambia ne amigokuéra.
Ehendúkena ne amigokuérape. Ehechauka remombaʼeha haʼekuéra heʼi ha opensáva ha rejepyʼapyha hesekuéra (Filipenses 2:4).
Eperdona chupekuéra. Nemanduʼavaʼerã iñimperfékto rupi ne amigokuéra ikatuha ojavy. La Biblia heʼi voi “opavave [...] jajavy heta mbaʼépe” (Santiago 3:2, ÑÑB).
Ani rembyaju ne amigokuérape. Pono ikuerái ndehegui, ani reikoiterei hiʼarikuéra. Nemanduʼáke neamígo teérõ haʼekuéra oĩta nendive reikotevẽve jave (Eclesiastés 4:9, 10).
[Taʼanga oĩva páhina 63-pe]
Rejapóramo opa mbaʼe nde rapichakuéra heʼíva repyta porãséguinte hendivekuéra, nderekóta hikuái iñantóhope ha ojehugapáta nderehe.