Pehasa jave peteĩ mbaʼe ijetuʼúva

Reñehaʼãramo jepe reiko vyʼápe ne rembiayhu ha ne familiakuérandi, sapyʼánte ikatu oiko umi mbaʼe rehaʼarõʼỹva ha reñembyasyeterei (Eclesiastés 9:11). Péro Ñandejára nanderejamoʼãi neaño umi situasiónpe, haʼe nepytyvõta regueropuʼaka hag̃ua. Resegíramo umi konsého oĩva la Bíbliape, nde ha ne família ikatúta pegueropuʼaka umi situasión ijetuʼuvéva jepe.

1. REJEROVIA VAʼERÃ JEHOVÁRE

MBAʼÉPA HEʼI LA BIBLIA: “Pemoĩ ipópe opaite mbaʼe pendepyʼapýva, haʼe ojepyʼapýgui penderehe” (1 Pedro 5:7). Nemanduʼa vaʼerã Ñandejára arakaʼeve nomoĩriha ñane renondépe mbaʼeve ivaíva ñanetantea hag̃ua (Santiago 1:13). Upévare, neprovléma jave reñemoag̃ui vaʼerã hese, ha haʼe katuete nepytyvõta rembohovái porã hag̃ua (Isaías 41:10). La Biblia heʼi voi: “Pemombeʼu chupe opa mbaʼe pendepyʼapýva” (Salmo 62:8, NM).

Tuicha nembopyʼaguapýta avei relee ha restudiáramo la Biblia káda día. Upépe rehecháta Jehová añetehápe haʼeha “Ñandejára omeʼẽva opaichagua konsuélo” (2 Corintios 1:3, 4; Romanos 15:4). Haʼe opromete omeʼẽtaha “pyʼaguapy tuichavéva opa mbaʼe ikatúvagui [ñantende]” (Filipenses 4:6, 7, 13).

EJAPOMÍNA KO MBAʼE:

• Ejerure Jehovápe tanembopyʼaguapy ha tanepytyvõ repensa porã hag̃ua mbaʼépa rejapóta

• Ejepyʼamongeta porã ne situasión rehe redesidi porã hag̃ua

2. EÑANGAREKO NDEJEHE HA NE FAMÍLIARE

MBAʼÉPA HEʼI LA BIBLIA: “Iñakãporãva ohupyty arandu; iñarandúva oheka mbaʼekuaa” (Proverbios 18:15). Ehecha mbaʼépa oikotevẽ nde rogayguakuéra. Eñemongeta káda únondi ha ehendu porã umi mbaʼe heʼíva ndéve (Proverbios 20:5).

¿Ha mbaʼépa oikóta omanóramo ndehegui peteĩ rehayhúva? Ani retĩ rehechauka térã remombeʼu hag̃ua mbaʼéichapa reñeñandu. Nemanduʼa vaʼerã Jesús jepe “hasẽ” hague (Juan 11:35; Eclesiastés 3:4). Iporãta avei reñehaʼãramo reke ha repytuʼu porã (Eclesiastés 4:6). Upéva tuicha nepytyvõta reaguanta hag̃ua upe situasión ijetuʼuetéva.

EJAPOMÍNA KO MBAʼE:

• Rejepokuaa vaʼerã koʼág̃ama voi reñemongeta ne famíliandi, ani rehaʼarõ oiko raẽ peteĩ mbaʼe vai rejapo hag̃ua upéva. Upéicharõmante, oñepresentávo peteĩ provléma, notĩmoʼãi hikuái oñemboja hag̃ua ne rendápe

• Eñemongeta umi nde rapicha ohasa vaʼekue ndive upe situasión nde rehasávare hína

3. EHEJA ÓTROPE TANEPYTYVÕ

MBAʼÉPA HEʼI LA BIBLIA: “Oporohayhukuaáva, oporohayhu opáichavo, ñane [ermáno] hína jajejopy vai jave” (Proverbios 17:17). Oiméne ne amigokuéra nepytyvõse rehasa jave umi situasión ijetuʼúva, péro ndoikuaái mbaʼéichapa ojapóta. Upévare ani retĩ remombeʼu hag̃ua chupekuéra mbaʼéichapa ikatu nepytyvõ (Proverbios 12:25). Avei umi konsého oĩva Ñandejára Ñeʼẽme katuete nemoñeñandu porãvéta, upévare rejerure vaʼerã umi persóna oikuaávape la Biblia tanepytyvõ (Santiago 5:14).

Katuete tuicha nemombaretéta rejeheʼa meméramo umi persóna ojeroviávare Ñandejára ha ipromesakuérare. Avei ndéve voi nemoñeñandu porãta reipytyvõramo umi nde rapicha oñedesanimávape. Eñeʼẽ chupekuéra Jehováre ha umi mbaʼe porã haʼe oprometévare. Ehecha vaʼerã mbaʼépa ikatu rejapo nde rapichakuéra rehehápe, ani reñemohaʼeño ni reñemomombyry umi nderayhu ha ojepyʼapývagui nderehe (Proverbios 18:1; 1 Corintios 15:58).

EJAPOMÍNA KO MBAʼE:

• Eñemongeta peteĩ ne amigoiténdi ha eheja chupe tanepytyvõ

• Emombeʼu porã mbaʼéichapa reñeñandu ha mbaʼépa reikotevẽ