Oñembotuicha Jesúspe onase mboyve

Ánhel Gabriel omombeʼu Maríape orekotaha peteĩ mitã ha ombohéra vaʼerãha Jesús. Heʼi chupe imembýgui oikotaha peteĩ Rréi ogovernátava pára siémpre. Upépe María oporandu chupe: “¿Mbaʼéicha piko oikóta upéva? Che ningo ndaikói gueteri kuimbaʼéndi” (Lucas 1:34).

Pe ánhel heʼi chupe: “Espíritu sánto oúta nde ári ha Ñandejára Ijojahaʼỹva podér nemoʼãta. Upévare pe mitã imarangatúta ha oñehenóita Ñandejára Raʼy” (Lucas 1:35).

Ikatu hag̃uáicha María orovia chupe, Gabriel heʼi avei: “Oime ku ne hénte Elisabet imembýta avei, ojapóma seis mése hyeguasu hague. Hiʼarive haʼe ig̃uaig̃uíma ha ojeʼe vaʼekue hese ndaikatumoʼãiha imemby. Opa mbaʼe Ñandejára heʼíva oñekumpli katuete” (Lucas 1:36, 37).

María oguerovia Gabriélpe, ha osẽ heʼi: “¡Che hína Jehová rembiguái! Toiko katu cherehe ere haguéicha” (Lucas 1:38).

Gabriel oho riremi, María ojeprepara ha oho ovisita Elisabétpe. Haʼe ha iména Zacarías oiko Judéape, peteĩ puévlo opytáva Jerusalén ypýpe. María katu oiko Nazarétpe, ha oviaha vaʼerã tres térã cuatro día og̃uahẽ hag̃ua Elisabet rógape.

María og̃uahẽvo Elisabet rógape, osaluda chupe. Upepete Elisabet henyhẽ espíritu sántogui ha heʼi Maríape: “¡Ñandejára nderovasa opa kuñanguéra apytépe ha ohovasa ne membýpe avei! ¿Mbaʼéicha rupi piko tuichaite ajehovasa ha ou che rendápe che Ruvicha sy? Ahendúvo ne ñeʼẽ, ¡péina!, che memby opo che ryépe vyʼágui” (Lucas 1:42-44).

María ipyʼarory ohendúvo upéva, ha heʼi: “Che ambotuicha Jehovápe, ha che pyʼaite guive chepyʼarory Ñandejárare, haʼe ningo pe chesalváva. Haʼe ohecha che hembiguaiminteha, ha koʼág̃a guive katu opavave heʼíta cherehe ajehovasa hague. Tuicha mbaʼe ko ojapóva cherehe Ñandejára Ipuʼakapáva”. Maríape ningo oñemeʼẽ peteĩ priviléhio ijojahaʼỹva. Péro haʼe noñembotuichái upévare, síno omombaʼeguasu Ñandejárape, ha heʼi: “Héra ningo imarangatu. Opa ára oiporiahuvereko umi chugui okyhyjévape” (Lucas 1:46-50).

María osegi ombotuicha Ñandejárape, ha espíritu sánto rupive oprofetisa: “Ipodér rupive Haʼe ojapo heta mbaʼe ha omosarambipa umi ohechaukávape oñemombaʼeguasuha ipyʼapýpe. Omanda guasúvape omboguejy itrónogui ha umi hekomirĩvape katu ombotuicha. Iñembyahýivape omyenyhẽ mbaʼe porãgui ha umi iplátavape omondo mbaʼeveʼỹre. Haʼe ou oipytyvõ hembiguái Israélpe ha oiporiahuvereko chupe opa ára g̃uarã. Ojapo upéva heʼi haguéicha ñande rukuéra ypykuépe, Abrahán ha ifamiliarépe” (Lucas 1:51-55).

María opyta Elisabet ndive tres méserupi, ha oime vaʼerã heta oipytyvõ chupe imemby mboyve. Péicha koʼã mokõi kuña hyeguasúva Ñandejára podér rupive, oñomoirũ koʼã tiémpo iñimportantetévape chupekuéra g̃uarã.

¿Rehechakuaápa mbaʼéicha oñembotuicha Jesúspe onase mboyve? Elisabet ohenói chupe “che Ruvicha”, ha pe mitã oĩva hyépe ‘opo vyʼágui’ María og̃uahẽvo. Péro upéi jahecháta oĩ hague avei umi nomombaʼéiva Maríape ni imembýpe.