¿Mávapa Ñandejára?

1, 2. ¿Mbaʼe mbaʼépa ñañeporandu jepi?

UMI mitã ningo pyʼỹinte oporandu ñandéve heta mbaʼe. Péro ñambohovái rire chupekuéra, ikatu oporandu jey: “¿Mbaʼére?”. Ha ñañehaʼãramo jepe jaexplika porã chupekuéra, sapyʼánte heʼi jey: “¿Péro mbaʼére upéva?”.

² Tahaʼe mitã térã kakuaa, ñañeporandu voínte heta mbaʼe. Por ehémplo, mbaʼépa jakarúta, mbaʼépa ñamondéta térã mbaʼépa jajoguáta. Ñañeporandu jepi avei mbaʼépa oikóta ñandehegui amo gotyove. Péro ndajatopáiramo peteĩ rrespuésta ñanekonvenséva, sapyʼánte jajedehántema chugui.

3. ¿Mbaʼérepa oĩ opensáva ijetuʼuha jaikuaa hag̃ua mbaʼépa heʼi la Biblia umi mbaʼe jaikuaasévare?

³ ¿Ikatúpa la Biblia ñanepytyvõ ñambohovái hag̃ua umi mbaʼe jaikuaaséva? Heta hénte opensa ijetuʼuetereiha ñantende hag̃ua la Biblia heʼíva. Oĩ avei opensáva umi hénte iñarandúva ha umi rrelihionkuéra omoakãvante ikatuha okontesta ñandéve umi pregúnta jarekóva. Ótro katu noñanimái oporandu okyhyjégui oñemotĩrõ g̃uarã. ¿Ndépa mbaʼe repensa?

4, 5. a) ¿Mbaʼépa nde reñeporandu jepi? b) ¿Mbaʼérepa iñimportánte reheka meme umi rrespuésta?

⁴ Oiméne nde reñeporandúmava koʼã mbaʼe: ¿Maʼerãpa ñandeapo rakaʼe Ñandejára? ¿Mbaʼépa oikóta chehegui amano rire? ¿Mbaʼeichagua persónapa Ñandejára? Jesús heʼi vaʼekue: “Pesegi pejerure ha oñemeʼẽta peẽme, pesegi peheka ha petopáta, pesegi pembota pe okẽ ha ojeavríta peẽme” (Mateo 7:7). Aníkena reñentrega, ehekákena retopa peve umi rrespuésta nekonvenséva.

⁵ ‘Resegíramo reheka’ umi rrespuésta la Bíbliape, katuete retopáta (Proverbios 2:1-5). Ha umi rrespuésta ndahasyiete ñantende hag̃ua. Hiʼarive, umi mbaʼe reaprendéva Ñandejára Ñeʼẽgui nepytyvõta revyʼa hag̃ua koʼág̃ama voi, ha reguereko hag̃ua heta esperánsa iporãva. Ñambohovaimína koʼág̃a peteĩ mbaʼe oikuaaséva jepi heta hénte.

¿ÑANDERAYHÚPA ÑANDEJÁRA TÉRÃPA IPYʼAHATÃ ÑANENDIVE?

6. ¿Mbaʼérepa heta hénte opensa Ñandejára ndojepyʼapyiha ñanderehe?

⁶ Heta hénte opensa Ñandejára ndojepyʼapyiha ñanderehe. Haʼekuéra opensa Ñandejára ñanderayhúrire ko múndo noĩmoʼãiha kuri péicha. Heta hendápe oiko gérra, la hénte ndojoayhuvéi, ha misériamante oĩ opárupi. Oĩ avei heta hasýva, osufríva ha omanóva. Upévare heta oĩ oñeporandúva: “Oiméramo Ñandejára ñanderayhu, ¿mbaʼérepa upéicharõ opermiti peichaite peve jahasa asy?”.

7. a) ¿Mbaʼérepa heta hénte opensa Ñandejára ipyʼahatãha? b) ¿Mbaʼérepa jaʼekuaa ndahaʼeiha Ñandejára káusare la oikóva umi mbaʼe vai?

⁷ Umi rrelihión omoakãva sapyʼánte ontendeka la héntepe Ñandejára ipyʼahatãha ñanendive. Oikóramo peteĩ mbaʼe vai, haʼekuéra heʼi haʼeha Ñandejára volunta ha jaaseptánte vaʼerãha. Péicha okulpa hikuái Ñandejárape umi mbaʼe vai oikóvare. Péro la Biblia heʼi porã Ñandejára arakaʼeve ndojapoiha ivaíva. Santiago 1:13-pe heʼi porã: “Oĩramo ohasa asýva, aníkena heʼi: ‘Ñandejára cheprova hína’, pórke avave ndaikatúi oprova Ñandejárape mbaʼe vaípe, ha haʼe ndoprovái avei avavépe mbaʼe vaípe”. Koʼág̃a peve Ñandejára ndoipeʼái gueteri umi mbaʼe vai, péro ndahaʼéi ikáusare la oikóva umíva (elee Job 34:10,12). Jahechamína peteĩ ehémplo.

8, 9. ¿Mbaʼérepa naiporãmoʼãi jakulpa Ñandejárape umi mbaʼe vai jahasávare? Emoĩ peteĩ ehémplo.

⁸ Ñapensami peteĩ mitãrusu oikoha ituakuérandi hógape. Itúa ohayhueterei chupe, ha michĩ guive omboʼe chupe ojeporta porã hag̃ua. Péro upe rire pe mitãrusu ou nopenavéi itúa heʼívare, osẽ oho hógagui, ojapo heta mbaʼe vai ha oike heta akã rasýpe. ¿Jakulpátapa pe túape umi mbaʼe ojapóvare itaʼýra? Nahániri (Lucas 15:11-13). Upéicha avei heta hénte ou nopenavéi Ñandejára heʼívare ha ojapo heta mbaʼe vai. ¿Jakulpátapa upéicharõ Ñandejárape umi mbaʼe vai oikóvare? Nahániri. Ñanemanduʼa vaʼerã haʼe arakaʼeve ndojapoiha mbaʼeve ivaíva. Upévare ñamboja reietéta hese umíva.

⁹ Péro, ¿mbaʼérepa Ñandejára opermiti gueteri oiko hetaite mbaʼe vai? Kapítulo 11-pe jahecháta mbaʼéichapa la Biblia orresponde upe pregúnta. Péro ikatu reime segúro Ñandejára ñanderayhuetereiha ha ndahaʼeiha ikáusa la jahasa asy. Upéva rangue, haʼe añoite osolusionáta umi mbaʼe vai jahasáva (Isaías 33:2).

10. ¿Mbaʼérepa ikatu ñaime segúro Ñandejára osolusionambaitetaha umi provléma oĩva ko múndope?

¹⁰ Ñandejára ningo siémpre ojapo iporãva, ipotĩ ha ndaipóri ivuenovéva chugui. Upévare ikatu jajerovia hese. La Bíbliape oñehenói voi chupe sánto (Isaías 6:3, nóta). Yvyporakuéra katu ndaupeichaiete. Umi governánte ipyʼaporãvéva jepe ndaikatúi ipuʼaka umi mbaʼe vai ojejapóvare. Ñandejára añoite ningo oreko podér osolusionambaite hag̃ua umi provléma oĩva ko múndope umi hénte aña káusare. Haʼe oipeʼaitéta opa mbaʼe ñanembosufríva (elee Salmo 37:9-11).

¿MBAʼÉICHAPA OÑEÑANDU ÑANDEJÁRA OHECHÁVO JASUFRIHA?

11. ¿Mbaʼéichapa oñeñandu Ñandejára ohechávo jasufriha?

¹¹ ¿Mbaʼéichapa oñeñandu Ñandejára ohechávo umi mbaʼe vai oikóva ko múndope ha umi mbaʼe nde rehasáva? La Biblia heʼi Ñandejára ‘ohayhuha pe hustísia’ (Salmo 37:28). Haʼe ohechapaite opa mbaʼe ojejapóva, tahaʼe ivaíva térã iporãva, ha ombyasyeterei ohechávo mbaʼéichapa jasufri. Por ehémplo, yma “omokorasõ rasy” vaʼekue chupe ohechávo umi mbaʼe vai ojapóva umi hénte Noé tiémpope (Génesis 6:5, 6). Ha koʼag̃aite peve haʼe nokambiái (Malaquías 3:6). La Biblia ohechauka porã Ñandejára ojepyʼapyha ñanderehe (elee 1 Pedro 5:7).

12, 13. a) ¿Mbaʼéicha rupípa ñande japorohayhu? b) ¿Mbaʼéichapa ñañeñandu jahechávo umi sufrimiénto oĩva ko múndope? c) ¿Mbaʼérepa ñaime segúro Ñandejára oipeʼataha umi inhustísia ha sufrimiénto?

¹² La Biblia omombeʼu Ñandejára ñandeapo hague ijoguahárõ (Génesis 1:26). Upéva heʼise ñande ikatuha ñapensa ha ñañeñandu haʼéicha. Ha ñande ñambyasýramo jahecha jave umi hénte inoséntepe osufri, upéva ohechauka Ñandejára koʼytevéntema ombyasytaha chupekuéra. ¿Mbaʼérepa jaʼe upéva?

¹³ La Biblia heʼi: “Ñandejára ningo mborayhu” (1 Juan 4:8). Haʼe ojapo opa mbaʼe mborayhúpe. Ha ñandeapo rupi ijoguahárõ, ñande avei ikatu japorohayhu. Epensamíntena ko mbaʼére: Ñamoĩ chupe ikatuha reipeʼa umi inhustísia ha sufrimiénto oĩva ko múndope, ¿rejapónepa? Rehayhúgui umi héntepe, katuete rejapóta. Ñandejára ningo oreko podér ha ñanderayhu, upéicha rupi oipeʼapaitéta umi inhustísia ha sufrimiénto oĩva ko múndope. Haʼe okumplíta umi promésa porãite oĩva ko lívro oñepyrũvo. Péro reguerovia hag̃ua umi promésa oñekumplitaha, resegi vaʼerã reaprende hetave mbaʼe Ñandejáragui.

ÑANDEJÁRA OIPOTA REIKUAA PORÃ CHUPE

14. ¿Mbaʼéichapa héra Ñandejára, ha mbaʼérepa ikatu jaʼe haʼe oipotaha jaipuru héra?

¹⁴ Reipotáramo peteĩ persóna ndekuaa ha oiko chugui ne amígo, ¿mbaʼe raẽvetépa remombeʼúta chupe? Katuete remombeʼúta chupe mbaʼéichapa nderéra, ¿ajépa? Ñandejára avei oreko héra, péro heta rrelihión heʼi chupe Señór térã Dios. Umíva ningo ndahaʼéi téra, haʼete jaʼénteva rréi térã presidénte. Ñandejára ningo omombeʼu porã ñandéve haʼe heraha Jehová. Salmo 83:18-pe heʼi: “Péicha umi hénte oikuaáta, nde nderérava Jehová, nde añoite hína haʼeha Ñandejára Ndaijojaháiva ko yvy ape ári”. Umi kuimbaʼe oskrivi vaʼekue Ñandejára Ñeʼẽ omoĩ vaʼekue hetaiterei vése la Bíbliape Ñandejára réra. Jehová oipota reikuaa ha reipuru héra. Haʼe omombeʼu ndéve héra ikatu hag̃uáicha reiko iñamígoramo.

15. ¿Mbaʼépa heʼise Jehová réra?

¹⁵ Jehová réra ningo iñimportanteterei, upe téra heʼise haʼe ikatuha okumplipaite umi mbaʼe oprometéva ha ojapo umi mbaʼe ojaposéva. Ndaipóri ojoko vaʼerã chupe. Upévare Jehová añoite ikatu héra upéicha.a

16, 17. ¿Mbaʼérepa ojeʼe Jehová haʼeha: a) pe “Ipuʼakapáva” b) “Rréi opa ára g̃uarã” c) ñande “Kreadór”?

¹⁶ Párrafo 14-pe jalee kuri Salmo 83:18, ko téxto ohechauka porã Jehová ‘añoite haʼeha Ñandejára Ndaijojaháiva’. Apocalipsis 15:3-pe heʼi avei: “Ñandejára Todopoderóso Jehová, umi ne rembiapokue tuicha ha ndaijojahái. Nde hína Rréi opa ára g̃uarã, umi nde rape ningo ihústo ha entéro mbaʼe eréva siertogua”. ¿Mbaʼérepa ojeʼe Jehová haʼeha pe “Todopoderóso”? Ojeʼe hese upéicha haʼe rupi pe ipoderosovéva ko univérsope. La Biblia heʼi avei hese haʼeha “Rréi opa ára g̃uarã”, upéva heʼise haʼe siémpre oexisti hague. Salmo 90:2 ohechauka voi haʼe siémpre oexisti hague ha siémpre oexistitaha. ¡Ajépa ndaipóri ótro haʼeichagua!

¹⁷ Jehová ningo ñande Kreadór. Apocalipsis 4:11-pe heʼi: “Ñandejára Jehová, nde rejapo entéro mbaʼe, ha nde reipotágui oexisti ha ojejapo vaʼekue opaite mbaʼe. Upévare nde remerese enterove nemombaʼe ha nembotuicha, remerese avei rerresivi pe podér”. Upeichaite, Jehová ojapo umi ánhel oĩva yvágape, umi estrélla, umi frúta, umi pira oĩva márpe ha hetaiteve mbaʼe.

NDE IKATU REIKO JEHOVÁ AMÍGORAMO

18. ¿Mbaʼérepa heta hénte opensa ijetuʼuha jaiko hag̃ua Ñandejára amígoramo, péro mbaʼépa heʼi la Biblia upévare?

¹⁸ Heta hénte oikuaávo mbaʼeichaitépa Jehová ipoderóso, okyhyje chugui ha heʼi voi: “Mbaʼe piko Ñandejára openáta cherehe, haʼéngo ipoderosoiterei ha mombyryeterei voi oĩ ñandehegui”. Péro, ¿oipotánepa Jehová ñapensa upéicha? Ni mbaʼevéicharõ. Jehová ningo oipota jaiko iñamígoramo. La Biblia heʼi ‘haʼe noĩriha voi mombyry ñandehegui’ (Hechos 17:27). Ñandejára oipota reñemoag̃ui hese. Rejapóramo upéicha, haʼe opromete ‘oñemoag̃uitaha nderehe’ (Santiago 4:8).

19. a) ¿Mbaʼépa rejapo vaʼerã reiko hag̃ua Jehová amígoramo? b) ¿Mbaʼépa ndegustave Jehováre?

¹⁹ ¿Mbaʼépa rejapo vaʼerã reiko hag̃ua Jehová amígoramo? Jesús heʼi vaʼekue: “Umi hénte oikove hag̃ua pára siémpre tekotevẽ ndekuaa ndéve, nde hína Ñandejára teete ha peteĩetéva. Oikuaa vaʼerã avei Jesucrístope, upe nde rembou vaʼekue” (Juan 17:3). Resegíramo restudia la Biblia reaprendéta heta mbaʼe ha katuete reikuaa porãvéta Jehová ha Jesúspe. Upéva nepytyvõta reikove hag̃ua pára siémpre. Ñande ningo ikatu jahechakuaa heta mbaʼe porã Ñandejárare, por ehémplo, ko kapítulope reaprendéma Jehová haʼeha “mborayhu” (1 Juan 4:16). La Biblia heʼi avei Jehová haʼeha peteĩ Dios “oporoporiahuverekóva ha oporombyasýva, ndaipochyreíriva, oporohayhuetereíva ha nopyrũiva iñeʼẽre” (Éxodo 34:6). Haʼe ‘ivuenoiterei ha oĩ ñaneperdona hag̃uáicha’ (Salmo 86:5). Avei ipasiénsia ha ikatu jajerovia hese (2 Pedro 3:9; Apocalipsis 15:4). Upéicharõ, amáske restudia la Biblia reikuaa porãvéta rehóvo Ñandejárape ha rehechakuaavéta mbaʼéichapa haʼe ohechauka koʼã mbaʼe porã.

20-22. a) ¿Mbaʼéichapa ikatu reiko Jehová amígoramo ndaikatúiramo rehecha chupe? b) ¿Mbaʼépa rejapóta oĩramo ndoipotáiva resegi restudia la Biblia?

²⁰ ¿Mbaʼéichapa ikatu reiko Ñandejára amígoramo ndaikatúiramo rehecha chupe? (Juan 1:18; 4:24; 1 Timoteo 1:17). Releévo la Biblia reikuaa porãvéta rehóvo Jehovápe ha haʼetéta voi rehecháva chupe (Salmo 27:4; Romanos 1:20). Amáske reaprende Jehovágui, rehayhuvéta chupe ha káda día reñemoag̃uivéta hese.

²¹ Rehechakuaáta avei Jehová haʼeha ñande Ru (Mateo 6:9). Haʼe ñande Kreadór ha oipota jaiko porã ha javyʼa. Heta túa ningo oipota iporãvante ifamíliape g̃uarã, ha Jehová upeichaite avei ñanendive (Salmo 36:9). La Biblia ohechauka nde ikatuha reiko Ñandejára amígoramo (Santiago 2:23). ¡Ajépa tuichaite mbaʼe upéva! Jehová, pe ojapo vaʼekue entéro mbaʼe, oipota nde reiko iñamígoramo.

²² Ikatu oĩ ndoipotáiva resegi restudia la Biblia, okyhyjégui rekambiárõ g̃uarã ne rrelihión. Péro ani reheja avave ndejoko oiko hag̃ua ndehegui Jehová amígo. ¡Haʼe ningo pe mehór amígo ikatúva reguereko!

23, 24. a) ¿Mbaʼérepa neretĩri vaʼerã rembaʼeporandu hag̃ua? b) ¿Mbaʼépa jahecháta pe kapítulo oúvape?

²³ Katuete ningo oĩta heta mbaʼe nerentendemoʼãiva ñepyrũrã. Péro ani retĩ reporandu hag̃ua oĩ jave peteĩ mbaʼe reikuaaséva térã nerentendeporãiva. Jesús heʼi vaʼekue voi ñaneumílde vaʼerãha umi mitãicha. Haʼekuéra ningo ndokyhyjéi oporandu hag̃ua oimeraẽ mbaʼe (Mateo 18:2-4). Restudia porãrõ la Biblia, rehechakuaáta oĩ porãha umi mbaʼe reaprendéva rehóvo (elee Hechos 17:11).

²⁴ Hetaiterei mbaʼe ningo reaprendéta Jehovágui restudiáramo la Biblia. Pe kapítulo oúvape jahecháta mbaʼérepa la Biblia idiferénte entéro umi ótro lívrogui.