¿Mbaʼépa ikatu ajapo koléhiope oĩramo chetrata vaíva?

¿MBAʼÉPA NDE REJAPÓNE?

Epensamína ko situasiónre: José ndohosevéi koléhiope pórke ojapóma tres méserupi ikompañerokuéra oñepyrũ hague oñeʼẽ vai hese ha omomarkánte chupe. Sapyʼánte ochoka guaʼu hese hikuái ha oitypa chugui la ikosakuéra, térã ou hikuái éntre heta hapykuéri ha peteĩva omyaña chupe ha ojerévo ohecha hag̃ua mávapa, enterovénte oñembotavypa chugui. Ha la ivaiveha, kuehe og̃uahẽ chupe peteĩ amenása iselulárpe.

¿Mbaʼépa nde rejapóne reiméramo José lugárpe?

EPENSAMÍNA KO MBAʼÉRE

Ikatu hína reñedefende reñorairõʼỹre. ¿Mbaʼéichapa ikatu rejapo upéva?

• ANI REPENA HESEKUÉRA. La Biblia heʼi: “Pe itavýva ndojejokokuaái ipochy jave ha heʼipaite pe oñandúva, péro pe iñarandúva, ojejokokuaa ha oñehaʼã pono orreaksiona” (Proverbios 29:11, TNM). Nderehechaukáiramo chupekuéra nemolestaha la ojapóva hikuái, ikatu hína ikuerái ha ndereja hikuái trankílo.

• ANI REÑEVENGA. La Biblia heʼi: “Avavépe ani pemyengovia ivaíva ivaívape” (Romanos 12:17). Reñevengáramo ikatu hína esẽ ivaivévape.

• EÑEHAʼÃ EJEHEKÝI CHUGUIKUÉRA. La Biblia heʼi: “Pe iñentendídova ohechakuaa pe pelígro ha ojere chugui” (Proverbios 22:3, TNM). Ikatúma guive, eñehaʼãmbaite vaʼerã ehechakuaa moõpa ikatu oĩ pelígro ha ejere chugui.

• EÑEʼẼ PORÃNTE CHUPEKUÉRA. La Biblia heʼi: “Pe persóna orrespondéva pyʼaguapýpe, ombohasaite pe pochy” (Proverbios 15:1, TNM). Ikatu voi eñemokachiãiʼimi chupekuéra. Por ehémplo, heʼíramo ndéve hikuái ndekyraha, ikatu ere: “¿Ajéa nde? Ou porãta chéve ajapoʼimíramo diéta mbaʼe”.

• EHO UPÉGUI. Nora, orekóva 19 áño, heʼi: “Nerembohováiriramo chupekuéra, rehechaukáta hína neremboguapyiha ndejehe la heʼíva hikuái ha avei rejejokokuaaha. Haʼekuéra ndojapokuaái upéva” (2 Timoteo 2:24).

• EJEROVIAVE NDEJEHE. Ne kompañerokuéra opilláramo nderejeroviaiha ndejehe ha nereñedefendekuaaiha, osegíta nemolesta hikuái. Péro ohechakuaáramo ndaikatuiha nedomina, nanemolestamoʼãvéima hikuái.

• EMOMBEʼU PE OIKÓVA. Peteĩ profesóra omeʼẽ ko konsého: “Oĩramo ndetrata vaíva, emombeʼu vaʼerã la oikóva. Upéicharõmante ótro ndohasamoʼãi avei upe situasiónre”.