Ñandejára okrea pe primer kuimbaʼe ha kuñáme

Jehová ojapo vaʼekue peteĩ hardín peteĩ lugár héravape Edén. Ko hardínpe oĩ vaʼekue hetaiterei animál, plánta ha yvyramáta. Upéi Jehová ojapo pe primer kuimbaʼépe ha ombohéra chupe Adán. Ñandejára oforma Adánpe yvýgui ha upéi oipeju itĩnguápe, ha upépe Adán oñepyrũ oikove. Jehová onkarga Adánpe okuida hag̃ua pe hardín rehe ha avei ojerure chupe ombohéra hag̃ua entéro umi animál.

Jehová heʼi Adánpe peteĩ mbaʼe iñimportánteva. Heʼi chupe: “Ikatu reʼu entéro umi frúta oĩva ko hardínpe, péro peteĩ yvyramátagui añoite ndereʼúi vaʼerã pe hiʼa, pórke reʼúramo katuete remanóta”.

Upéi Jehová heʼi: “Ajapóta Adánpe peteĩ iñirũrã oipytyvõtava chupe”. Upémarõ Jehová omongete Adánpe ha oipeʼa chugui peteĩ ikostílla ha upévagui ojapo chupe hembirekorã ha Adán ombohéra chupe Eva. Adán ha Eva oforma vaʼekue pe primera família. ¿Mbaʼéichapa oñeñandu vaʼekue Adán ohechárõ guare Évape? Haʼe ovyʼaiterei ha heʼi: “¡Iporãite piko la Jehová ojapo vaʼekue peteĩ che kostíllagui! ¡Arekóma avei la che irũrã!”.

Jehová heʼi Adán ha Évape ifamília hag̃ua hikuái ha omyenyhẽ hag̃ua ko yvy. Haʼe oipota vaʼekue hikuái ombaʼapo oñondive vyʼápe ha ojapo ko yvy kompletoitégui peteĩ hardín. Péicha ko yvýgui oikóta kuri peteĩ lugár iporãitereíva, ha ojoguáta pe hardín oĩvape Edénpe. Péro ndoikói kuri Jehová oipota haguéicha. Pe kapítulo oúvape jahecháta mbaʼérepa.