Noñesũi hikuái pe estátua renondépe

Nabucodonosor osoña riremi pe estátua guasuete, ojapoka peteĩ estátua de óro tuichaitereíva ha omoĩka pe ñu oĩvape Dúrape. Upéi ombyaty upépe entéro umi hénte iñimportánteva oĩva upe paíspe, umíva apytépe Sadrac, Mesac ha Abednégope. Upépe pe rréi heʼi: “Pehendu vove oñembopu umi trompéta, árpa ha fláuta, enterovete peñesũ vaʼerã ko estátua renondépe. Oĩramo noñesũiva, ojepoíta chupe pe tatakua akúpe”. ¿Mbaʼépa nde ere? ¿Oñesũnepa Sadrac, Mesac ha Abednego pe estátua renondépe? ¿Oadorátapa hikuái pe estátuape Jehovápe rangue?

Upéi pe rréi heʼi oñembopu hag̃ua umi trompéta, árpa ha fláuta. Ohendúvo pe músika, umi hénte oñesũ joa ha oadora pe estátua, péro Sadrac, Mesac ha Abednego ndojapói upéva. Unos kuánto kuimbaʼe opilla chupekuéra ha heʼi pe rréipe: “Umi mbohapy kuimbaʼe hebreo ndoadorái hína pe estátua rejapoka vaʼekue”. Nabucodonosor ohenoika umi mbohapy mitãrusúpe ha heʼi chupekuéra: “Ameʼẽta peẽme ótra oportunida peadora hag̃ua ko estátua ha ndapejapóiramo pomombóta pe tatakua akúpe. Ndaipóri ni peteĩ dios pendesalva vaʼerã chehegui”. Péro Sadrac, Mesac ha Abednego heʼi chupe: “Natekotevẽi emeʼẽ oréve ótra oportunida. Ore Jára ikatu oresalva, péro ndaoresalváiramo jepe, ore ndoroadoramoʼãi pe estátua”.

Nabucodonosor ipochyeterei ha heʼi umi isirviéntepe: “¡Pembyaku ñandéve 7 vése mas pe tatakua!”. Upéi heʼi umi isoldadokuérape: “Peñapytĩ koʼã kuimbaʼépe ha pemombo pe tatakuápe”. Pe tatakua ningo hakueterei, upévare umi soldádo hoʼa omano opoi rire chupekuéra pe tatakuápe. Péro umi 3 hebréore ndoikói mbaʼeve. Pe rréi omañárõ guare mbaʼépa oiko chuguikuéra, tuichaiterei oñemondýi ohechávo 4 persóna oguataha hína pe tatakuápe. Upéi oporandu umi kuimbaʼe oĩvape hendive: “¿Ñande piko nañamombói raʼe mbohapy kuimbaʼépente pe tatakuápe? Pórke che ahecha 4 oĩha hikuái ha peteĩ ojogua ánhelpe”.

Nabucodonosor oñembojave pe tatakua ypýpe ha hatã heʼi: “Pesẽ peẽ kuimbaʼe peservíva pe Dios Ipoderosovévape”. Enterovénte opondera joa ohechávo Sadrac, Mesac ha Abednego osẽha oúvo pe tatakuágui ha ndoikoiha hesekuéra mbaʼevete. Ni michĩmi ndokáiri hikuái ha ni tatatĩ nahyakuãi hesekuéra.

Upéi Nabucodonosor heʼi: “Ajépa ipoderosoite Sadrac, Mesac ha Abednego Jára. Haʼe ombou peteĩ ánhel osalva hag̃ua chupekuéra. Ndaipóri ótro Dios haʼeichagua”.

Sadrac, Mesac ha Abednego ojedesidi kuri iñeʼẽrendutaha Jehovápe toiko la oikóva. ¿Ndépa neñeʼẽrenduse avei haʼekuéraicha?