Peteĩ guardiakársel oñepyrũ oservi Ñandejárape

Filípospe oĩ vaʼekue peteĩ sirviénta oadivináva umi mbaʼe oikótava oĩgui peteĩ demónio poguýpe, ha upéicha haʼe omogana vaʼekue heta pláta ipatronkuérape. Pablo ha Silas og̃uahẽrõ guare Filípospe, pe mitãkuña heta díare osegi chupekuéra oho ohohápe. Haʼe osapukái ha heʼi: “Koʼã kuimbaʼe ningo Ñandejára rembiguái”. Upéi, Pablo heʼi pe demóniope: “Jesucristo rérape haʼe ndéve: ¡Esẽ chugui!”. Ha upepete pe demónio osẽ chugui.

Pe mitãkuña patronkuéra ipochyeterei ohechávo ndaikatumoʼãveimaha oipuru chupe ogana hag̃ua pláta. Upévare ojagarra Pablo ha Sílaspe ha tyryryhápe oraha chupekuéra umi mburuvicha upe siudapegua rendápe, ha heʼi: “Koʼã kuimbaʼe nokumplíri la léi ha sarambi ojapo ñande siudápe”. Umi mburuvicha omanda ojegarrotea hag̃ua Pablo ha Sílaspe ha oñemoinge hag̃ua chupekuéra kárselpe. Pe guardiakársel oraha chupekuéra pe kalavóso oĩvape pe kársel ruguaitépe ha ojopy chuguikuéra ipy yvyrakuápe.

Pablo ha Silas oĩ aja pe kárselpe opurahéi ombotuicha hag̃ua Ñandejárape ha umi ótro préso ohendu mbaʼéichapa opurahéi hikuái. Peichahágui, pe pyhare rei oiko peteĩ terremóto tuichaitereíva, ha pe kársel simiénto okuʼepaite voi. Upévo umi okẽ ojeavripa ha umi kadéna osopa. Pe guardiakársel odipara oike pe kársel rugua peve ha otopa ojeavripaha umi okẽ, haʼe oimoʼã kuri umi préso okañymba hague, upémarõ ohekýi ijespáda ojejuka hag̃ua.

Péro Pablo osapukái chupe: “¡Ápe roimemba, ani rejapo ndejehe mbaʼeve ivaíva!”. Pe guardiakársel oho Silas ha Pablo rendápe ha oñesũ henondepekuéra. Upéi oporandu chupekuéra: “¿Mbaʼéiko ajapo vaʼerã ajesalva hag̃ua?”. Haʼekuéra heʼi chupe: “Nde ha nde rogaygua pejerovia vaʼerã Jesús rehe”. Upéi Pablo ha Silas omboʼe chupekuéra Jehová Ñeʼẽ ha pe guardiakársel ha umi hogaygua ojevautisa.