35 MANASÉS
Haʼe ipyʼaguasu okambia hag̃ua
MANASÉS nonaséi vaʼerãmoʼã Jehová noipytyvõirire itúa Ezequíaspe okuera hag̃ua milagrósamente. Jehová opermiti vaʼekue Ezequíaspe osegi oikove 15 áño mas ha upéicha rupi ou itaʼýra ha ombohéra chupe Manasés. Ñambyasýramo jepe, Manasés orekórõ guare 12 áñonte itúa omanóma chugui. Imitã reheve Manasés oñepyrũma ogoverna ha pyaʼe voi ojekuaáma hese idiferentetetaha itúagui.
Manasés ojapo vaʼekue heta mbaʼe ivaietereíva. Haʼe oadora vaʼekue umi taʼanga, ojapo paje, ojuka itaʼyrakuérape ha oiko chugui apóstata. Manasés ojuka vaʼekue hetaiterei persónape, upéicha rupi umi hénte oñepyrũma avei iñañaiterei. Manasés ogoverna aja hetaiterei mbaʼe vai ojejapo Jerusalénpe. Jehová omondo vaʼekue iprofetakuérape okorrehi hag̃ua chupe péro haʼe nohenduséi chupekuéra. ¿Ikatúne piko ñaaprende álgo iporãva ko kuimbaʼe iñañaitévagui? Jahechamína.
Pe rréi nohenduséi rupi umi mbaʼe heʼíva chupe Jehová profetakuéra, Ñandejára opermiti umi asirio oike Judápe. Upéicha rupi Manasés rekove okambiaite peteĩ sapyʼaitépe. La Biblia heʼi voi: “Ojagarra hikuái Manaséspe gánchope, oipokua ha oipykua chupe kadéna de kóvrepe ha ogueraha Babilóniape”. Eñeimahinamína mbaʼeichaitépa oiméne oñeñandu raʼe Manasés. Oiméne osufrieterei raʼe ojapokuévo pe viáhe puku og̃uahẽ hag̃ua Babilóniape. Tuichaiterei ningo oñemotĩ.
Ivaietereíramo jepe la Manasés ojapóva, Jehová omeʼẽ chupe peteĩ oportunida okambia hag̃ua
Manasés oĩ aja préso Babilóniape, oreko heta tiémpo ojepyʼamongeta hag̃ua la ojapo vaʼekuére. Oñeñandúne raʼe haʼeñoite. Ndorekói avave oipytyvõ vaʼerã chupe ha ndaikatúi ojapo mbaʼeve orremedia hag̃ua isituasión. Oiméne núnka noñeñandúiva la peichaite. ¿Moõ piko oime umi dioskuéra oadora vaʼekue oikóvo? Mbaʼeve ndojapói hikuái. ¡Reieténgo osakrifika raʼe itaʼyrakuéra chupekuéra g̃uarã! Koʼã mbaʼe omopensáne raʼe chupe ha ohechakuaa okambia vaʼerãha. Primeroite voi oñemboʼe Jehovápe ha “osegi oñemomirĩete ituakuéra ypykue Jára renondépe”. Jehová ohechakuaa Manasés okambiamaha ha ojapysaka hese. Katuete upe guive Jehová oñepyrũma oñemoag̃ui hese (Sal. 138:6). Manasés ojerure asy “Ijára Jehovápe” imbaʼeporãmi hag̃ua hendive. Haʼe “osegi oñemboʼe” Ñandejárape upéicha.
¿Mbaʼépa opensa Jehová umi ñemboʼe Manasés ojapo vaʼekuére? La Biblia heʼi: “Haʼe oiporiahuvereko chupe ojerure asy haguére, ha avei ohendu chupe ojerurérõ guare imbaʼeporã hag̃ua hendive”. Ñandejára oiporiahuvereko Manaséspe ha ojapo hesehápe peteĩ mbaʼe ijojahaʼỹva. Haʼe “ogueru jey chupe Jerusalénpe ha omoĩ jey chupe ogoverna hag̃ua”. Koʼág̃a Manasés oreko jey peteĩ oportunida ohechauka hag̃ua mbaʼeichaitépa oñarrepenti ha okambia.
Ou jeýrõ guare Jerusalénpe, Manasés tekotevẽ vaʼekue ojapo peteĩ mbaʼe ijetuʼuetereíva, hiʼarive oñepyrũ ramo hína ojerovia Jehováre. Jerusalénpe ningo umi hénte hetaiterei áñorema ojepokuaa ojapo la ivaíva ha Manasés voi kuri la máta. ¿Mbaʼépa heʼíta hese umi hénte ohechávo koʼág̃a okambiaiteha? Oimérõ upéva oipyʼapy raʼe Manaséspe, upéva ndojokói chupe oñepyrũ hag̃ua ojapo la iporãva. Haʼe omopuʼã peteĩ murálla guasu oprotehe hag̃ua Jerusalénpe. Avei oipeʼapa umi dios guaʼu raʼanga oĩva upe siudápe ha pe témplope. Omyatyrõ avei Jehová altár ha ojapo sakrifísio upépe. Péro upéi ojapo la posívlemente ijetuʼuve vaʼekue chupe. Oiko rire omokyreʼỹ umi héntepe ojapo hag̃ua ivaíva, koʼág̃a heʼi chupekuéra “oservi hag̃ua Israel Jára Jehovápe”. Ojekuaa Manasés rehe okambiaite hague. Ko oiko vaʼekue ombotuicha Jehovápe pórke ohechauka haʼe ‘ivuenoitereiha ha oĩha oporoperdona hag̃uáicha’ (Sal. 86:5).
Ñambyasýramo jepe, Manasés ndaikatúi vaʼekue okorrehi entéro mbaʼe vai ojapóma vaʼekue. Jehová operdona kuri chupe, péro ndaikatúi avei ombohasa rei entéro umi mbaʼe vai ha jejuka oiko vaʼekue Manasés ogoverna aja. La majoría umi hénte noñarrepentíri kuri ni nokambiái, ndojoguaiete Manaséspe. Ni itaʼýra hérava Amón nokambiaséi vaʼekue. Upéicharõ jepe, Manasés oñehaʼãmbaiténe raʼe omboʼe porã hag̃ua iniétope. Josías oiméne siémpre imanduʼa raʼe ijavuélo iñumílde ha ipyʼaguasu hague ohechauka hag̃ua oñarrepentiha. Jepe hetaiterei áñore ojapo ivaíva, Manasés okambiaite vaʼekue. Ha ipahaite peve siémpre imanduʼa vaʼekue Itúa Jehová operdonambaite hague chupe.
¿Moõpa oñeñeʼẽ hese la Bíbliape?
¿Mbaʼépa ere chupe?
¿Mbaʼérepa jaʼekuaa Manasés ipyʼaguasu hague?
Einvestigamína
1. La Biblia heʼi Manasés ojapo hague “heta mbaʼe ivaivéva kompletoite umi amorreo oĩ vaʼekuégui haʼe mboyve”. ¿Mbaʼépa upéva ohechauka ñandéve? (2 Rey. 21:11; w00 15/10 16 párr. 5, 6-wcgr; gl 10 párr. 5, nóta-wcgr).
2. ¿Mbaʼépa ojetopa rakaʼe ohechaukáva Manasés oexisti hague ha Asiria ipoderosoiterei hague upe tiémpope? (it “Manasés” Núm. 4 párr. 2-wcgr). A
© The Trustees of the British Museum. Licensed under CC BY-NC-SA 4.0. Source
Taʼanga A: Pe prísma de Esar-Hadón rehe ojetopa oñeñeʼẽha “Manasés, rréi de Judá” rehe
3. ¿Mbaʼépa ohechauka umi asirio añetehápe omoĩ hague gáncho iprisionerokuérare? (2 Crón. 33:11; it “Gáncho” párr. 4-wcgr). B
Taʼanga B: Peteĩ divúho asirio ojejapo vaʼekue éntre áño 700 térã 800-rupi a.C.
4. ¿Mbaʼépa heʼise Jehová oipuru hague Jerusalénre peteĩ ‘piolín omedi hag̃ua’ ha peteĩ “plomáda”? (2 Rey. 21:13; it “Erramiénta de nivelasión” párr. 2-wcgr).
Ejepyʼamongetamína ndejehe
Ehecha rire Manasés oñarrepenti hague, ¿mbaʼépa reaprende upévagui?
Jehová operdonáramo jepe pe pekadórpe, ndoipeʼamoʼãi chugui umi konsekuénsia vai oguerúva pe pekádo. ¿Mbaʼéichapa Manasés ehémplo ohechauka upéva? (Jer. 15:3-5). C
Taʼanga C
¿Mbaʼéichapa ikatu ndepyʼaguasu Manasés ipyʼaguasu haguéicha?
Ejepyʼamongetamína Jehováre
Alee rire ko rreláto, ¿mbaʼépa aaprendeve Jehovágui?
Alee rire ko rreláto, ¿mbaʼépa aaprendeve Jehová rembipotágui ha pe téma prinsipál orekóvagui la Biblia?
¿Mbaʼépa aporandúne Manaséspe Jehová omoingove jey vove chupe?
Reikuaave hag̃ua
Ehechamína ko vidéope mbaʼéichapa Manasés ehémplo oipytyvõ peteĩ ermánope oñemoag̃ui jey hag̃ua Jehováre.
Oiméramo repensa neremereseiha Ñandejára neperdona, ko rreláto katuete nemokyreʼỹta.