42 MARÍA
Ipyʼaguasu oasepta hag̃ua iñasignasión
JEHOVÁ ningo omeʼẽva voínte isiervokuérape diferénte kláse de asignasión. ¿Mavaitévapa nde eréne haʼe hague pe asignasión iñimportantevéva ha ijetuʼuvéva? Ñapensamína la oiko vaʼekue peteĩ kuñataĩ vírhen rehe, hérava María. Peteĩ día, haʼe oĩ aja hína hógape Nazarétpe, oumi hendápe pe ánhel Gabriel. Haʼe omeʼẽ chupe peteĩ asignasión núnka noñemeʼẽiva ni peteĩ ótra persónape.
Pe ánhel og̃uahẽvo María rendápe osaluda chupe ha heʼi: “Mbaʼéichapa María, Jehová ndeguerohoryeterei ha oĩ nendive”. Primerorã, María ojepyʼapyeterei ha nontendéi mbaʼépa la heʼiséva chupe ánhel Gabriel. Upémarõ otrankilisa hag̃ua chupe, Gabriel heʼi Maríape Ñandejára oguerohoryetereiha chupe. Upéi omombeʼu chupe pe asignasión iñimportantetéva Jehová omeʼẽtava chupe. Haʼe heʼi Maríape: “Nderyeguasúta ha reguerekóta peteĩ mitãkuimbaʼe”. Péro ndahaʼéi upévante, pórke upéi heʼi chupe: “Haʼe iñimportantetereíta ha oñehenóita Ñandejára Ndaijojaháiva Raʼy. Ha Jehová omoĩta chupe Rréiramo itúa David haʼe haguéicha avei”.
María oñembopyʼaguasu ha oporandu pe ánhelpe álgo oikuaaséva. Haʼe ningo oñekomprometéma kuri péro neʼĩra omenda ha núnka ndorekóiva rrelasión sexuál. Upévare oporandu: “¿Mbaʼéicha piko oikóta upéva?”. Gabriel oexplika Maríape Jehová omeʼẽtaha chupe ijespíritu sánto ha ipodér ‘omoʼãtaha chupe’. Upéicha rupi, pe mitã onaséta kuri sin pekádo, ha oñehenóita voi chupe “Ñandejára Raʼy”. Pe ánhel omombeʼu avei Maríape mbaʼépa Jehová ojapóma ipariénte Elisabet rehehápe. Entéro koʼã mbaʼe okonvensete voi Maríape, upévare heʼi Gabriélpe: “¡Che hína Jehová eskláva! Toiko katu cherehe ere haguéicha”. María oikuaa porãiterei kuri Ijára Jehová ohayhuha chupe, upévare heʼi voi haʼeha ijeskláva. Haʼe okonfia vaʼekue Jehováre ha oĩ vaʼekue segúra iñeʼẽrendúramo chupe, Haʼe siémpre oĩtaha ijykére. Upéicha rupi María ipyʼaguasu vaʼekue oasepta hag̃ua ko asignasión iñimportantetéva.
Pe ánhel oho rire, María oho Elisabet rendápe. Haʼekuéra heta oñemongetáne raʼe ha oñomokyreʼỹ okumpli porã hag̃ua la Jehová ojeruréva chupekuéra. María omombeʼu Elisabétpe mbaʼépa haʼe opensa Jehováre, ha la heʼi vaʼekuére jahechakuaa mbaʼépa oipytyvõ kuri chupe ipyʼaguasu hag̃ua. Mbykymínte oñeʼẽramo jepe, mas de 20 vése voi osita la heʼíva umi Escrituras Hebreas. María ikatu vaʼekue ojapo upéva pórke haʼe siémpre ojepyʼamongeta Ñandejára Ñeʼẽre, upévare haʼe oikuaa porãiterei vaʼekue Jehovápe ha oĩ vaʼekue segúra haʼe okumplitaha ipromesakuéra. María opyta Elisabet ndive amo 3 méserupi ha upéi oho jey hógape. Ha og̃uahẽrõ guare upépe, tekotevẽ kuri ipyʼaguasu oexplika hag̃ua Josépe mbaʼépa la oikopáva ha mbaʼéichapa haʼe opyta hyeguasu. Primerorã José ndogueroviái kuri Maríape, péro upéi peteĩ ánhel okonfirma chupe siertoha la María heʼíva.
María ha José omenda rire, og̃uahẽma kuri ohóvo pe tiémpo onase hag̃ua pe mitã. Upéicharõ jepe José ogueraha hembirekópe Belénpe, pórke César ojapoka peteĩ sénso ha omanda enterovévape oho vaʼerãha oñeanota ivállepe. Oiméne ijetuʼuete raʼe Maríape oviaha hag̃ua 150 kilómetrorupi peteĩ vúrro ári, péro haʼe lomímonte oho la iménandi. Upéi og̃uahẽrõ guare la tiémpo imemby hag̃ua, ijetuʼupaite hendivekuéra. Ipahápe María imemby peteĩ estávlope, upéi olia la imembyʼi peteĩ télape ha omoĩ chupe peteĩ mbaʼyru oñemoĩhápe umi animál rembiʼu. Upéicharõ jepe, María osegi ipyʼaguasu ha oĩ desidída oipurutaha la orekomíva guive okuida porã hag̃ua imembýre.
Peteĩ ánhel oñeʼẽ Maríape omeʼẽ hag̃ua chupe peteĩ asignasión Jehová núnka nomeʼẽiva ótra persónape
Péro tiémpo rire, María tekotevẽ jeýta kuri ipyʼaguasu heta situasiónpe. Por ehémplo okañy hag̃ua José ndive Egíptope, rréi Herodes ojukasérõ guare Jesúspe michĩrõ guare. Tekotevẽta kuri ipyʼaguasu omongakuaa hag̃ua iménandi umi 6 térã hetave mitã oguereko vaʼekue Jesús rire, imboriahumíramo jepe hikuái. Tekotevẽta kuri ipyʼaguasu omanórõ guare chugui iména ohayhuetéva, posívlemente Jesúsgui oiko mboyve pe Mesías. Tekotevẽta avei kuri ipyʼaguasu Jesús ohórõ guare hógagui okumpli hag̃ua iñasignasión. Ha ijetuʼuveha, tekotevẽta kuri ipyʼaguasu ojejagarrárõ guare Jesúspe, ojeakusa reiete ha ojejuka. Ha ipahaitépe, tekotevẽ jeýta kuri ipyʼaguasu omoirũ hag̃ua Jesús disipulokuérape, pórke umi judío ndaijaʼeiete vaʼekue hesekuéra.
¡Ajépa tuichaite mbaʼe pe asignasión oreko vaʼekue María! ¿Mbaʼépa la oipytyvõ vaʼekue chupe ipyʼaguasu hag̃ua? La Biblia ohechauka káda ke haʼe oaprende álgo oipytyvõtava chupe ojeroviave hag̃ua, haʼe siémpre ojepyʼamongeta hague hese. Upéicha oaprende vaʼekue heta mbaʼe iñimportánteva, ha oiko oikónte ha opensa jeýma umívare. Algúno koʼã mbaʼe haʼe oaprende Ñandejára Ñeʼẽgui, ótra kósa katu oaprende la heʼívagui chupe Jehová siervokuéra, tahaʼe peteĩ ánhel térã peteĩ persóna, ha algúna kósa katu oaprende avei imembýgui. María ojepyʼamongeta rupi koʼã mbaʼére, ipyʼaguasu vaʼekue ombohovái hag̃ua entéro situasión ijetuʼúva ipahaite peve.
¿Moõpa oñeñeʼẽ hese la Bíbliape?
¿Mbaʼépa ere chupe?
¿Mbaʼérepa jaʼekuaa María ipyʼaguasu hague?
Einvestigamína
1. ¿Mbaʼe pruévapa ohechauka siertoha la heʼíva Lucas 2:1-3? (g 4/11 11 párr. 4, 5-wcgr). A
British Library, London, UK, from the British Library archive/Bridgeman Images
Taʼanga A: Ko dokuméntope heʼi peteĩ governadór rrománo oĩva Egíptope omanda hague ojejapo hag̃ua peteĩ sénso áño 104-pe
2. ¿Mbaʼérepa oiméne ijetuʼuete raʼe Maríape oviaha hag̃ua Belénpe? (ia 176-178 párr. 4-7).
3. Jesús michĩʼírõ guare, Maríape ojeʼe vaʼekue: “Heta resufri ha rehasa asýta”. ¿Mbaʼéichapa oñekumpli vaʼekue upéva? (Luc. 2:35; w08 1/3 30 párr. 8).
4. ¿Mbaʼérepa ikatu jaʼe María oikove jey hague yvágape? (w18.07 10 párr. 14). B
Taʼanga B: Áño 33-pe, María ha imembykuimbaʼekuéra oĩ kuri Jerusalénpe ojefesteha mboyvemi pe Pentekostés
Ejepyʼamongetamína ndejehe
María oikotevẽrõ guare álgien omokyreʼỹ ha omombaretéva chupe, ovisita vaʼekue Elisabétpe (Luc. 1:39, 40). ¿Mbaʼérepa iñimportánte jajerure ajúda jareko jave peteĩ provléma térã asignasión ijetuʼúva? C
Taʼanga C
María oñekomprometéma kuri Joséndi, péro Jehová omondo raẽ pe ánhel María rendápe. ¿Mbaʼépa ñanemboʼe upéva la Jehová opensávagui umi kuña ifiélvare?
¿Mbaʼéichapa ikatu ndepyʼaguasu María ipyʼaguasu haguéicha?
Ejepyʼamongetamína Jehováre
Alee rire ko rreláto, ¿mbaʼépa aaprendeve Jehovágui?
Alee rire ko rreláto, ¿mbaʼépa aaprendeve Jehová rembipotágui ha pe téma prinsipál orekóvagui la Biblia?
Posívlemente Maríape ojeporavo ogoverna hag̃ua Jesúsndi yvágape, ¿mbaʼérepa reagradese Jehovápe upévare?
Reikuaave hag̃ua
Ehechamína mbaʼéichapa María oñehaʼãmbaite vaʼekue omongakuaa porã hag̃ua imembykuérape.
Mbaʼe mbaʼépa ñanemboʼe María (w09 1/1 5 párr. 5–6 párr. 2).
¿Mbaʼéichapa oiméne oñeñandu raʼe María pe ánhel Gabriel omeʼẽrõ guare chupe ko asignasión iñimportantetéva?