¡Nde ikatu ndepyʼaguasuve!

1-3. ¿Mbaʼérepa jaʼekuaa la Jesús heʼi vaʼekue ohechaukaha ipyʼaguasuha?

“PEPUʼÃ jaha”. Péicha heʼi vaʼekue pe kuimbaʼe ipyʼaguasuvéva oiko vaʼekue ko yvy ape ári. ¿Mbaʼérepa jaʼekuaa la haʼe heʼi vaʼekue ohechaukaha ipyʼaguasuha? Ñantende porãve hag̃ua jaikuaa vaʼerã mávapa la heʼi vaʼekue koʼã mbaʼe ha mbaʼeichahápepa (Mat. 26:46).

² Jesucristo la heʼi vaʼekue péicha idisipulokuérape. Haʼe heʼíma vaʼekue voi chupekuéra upéicha anteve (Juan 14:31). Péro ko kásope la situasión idiferentete. Haʼekuéra oĩ hína kuri pe lugár héravape Getsemaní, namombyryiete Jerusaléngui. Upérõ guare pyharepytéma ha ñasaindy porã. Péro Jesús oikuaa unos kuánto kuimbaʼe ouha hína hendapekuéra espáda ha garróte reheve. Ha haʼe oikuaa porã maʼerãpa ou hína hikuái. Upérõ guare Jesús oikuaa og̃uahẽmaha pe moménto oñembohasa asy hag̃ua chupe. Ndaipóri vaʼekue voi ótro kuimbaʼe peichaite peve oñembosufri vaʼekue. Péro ndahaʼéi voi upévante. Jesús oikuaa avei enteroite koʼã mbaʼe ohasataha haʼeño vera.

³ Jesús noñehaʼãi kuri ojapo mbaʼeve ojesalva hag̃ua upe situasióngui. Haʼe ikatu vaʼerãmoʼã ohenói umi ánhelpe ou hag̃ua oprotehe chupe, péro haʼe ndojapói upéva (Mat. 26:53). Upéva rangue heʼi: “Pepuʼã jaha”. ¿Moõ la ohóta raʼe? Ohóta oñentrega umi soldádope oikuaárõ jepe oĩtaha oñemboharáiva hese ha upéi ojuka chupe. ¿Mbaʼérepa Jesús oĩ raʼe ojapo hag̃uáicha upéva? Pórke haʼe ohayhueterei Itúape ha avei isegidorkuérape.

4, 5. ¿Mbaʼéichapa pe persóna añetehápe ipyʼaguasúva ha mbaʼérepa ñaikotevẽ peichagua pyʼaguasu?

⁴ Ndaipóri oduda vaʼerã Jesús haʼe hague pe kuimbaʼe ipyʼaguasuvéva oiko vaʼekue ko yvy ape ári. ¿Ndépa haʼe idisípulo? Upéicharõ nde ndepyʼaguasu avei. Umi kristiáno tee ipyʼaguasu vaʼerã. Koʼág̃arupi la situasión ijetuʼu ha ipeligróso, upévare koʼýte koʼág̃a tekotevẽterei ñandepyʼaguasu.

⁵ ¿Mbaʼéichapa ikatu ñandepyʼaguasu Jesús ipyʼaguasu haguéicha? ¿Mbaʼéichapa peteĩ persóna ipyʼaguasu añetéva? Algúno opensa peteĩ persóna ipyʼaguasúva ndokyhyjeiha voi mbaʼevégui, naiprovlemaiha ojapeligra hag̃ua oimehaichagua situasiónpe, ha opensaha mbaʼeve voi ndojehumoʼãiha chupe. Algúno opensa avei pe ipyʼaguasúva ndokyhyjeiha iviolénto hag̃ua (Sal. 11:5). Péro pe pyʼaguasu Jesús ohechauka vaʼekue ndahaʼeiete vaʼekue upéicha. Pe persóna ipyʼaguasu añetéva ojapo la Jehová ohaʼarõva chugui ijetuʼúrõ térã okyhyjérõ jepe, ojapo haguéicha Jesús.

¡Nde ikatu ndepyʼaguasu Jesúicha!

6. Oimérõ epensa ofaltaha ndepyʼaguasuve, ¿mbaʼéichapa la Jesús heʼi vaʼekue ikatu nemokyreʼỹ?

⁶ Ikatu algúno oduda ha opensa ndaikatumoʼãiha ipyʼaguasu ijetuʼuetereírõ la situasión. Oimérõ upéicha, nemanduʼákena Jesús imbaʼerechakuaaha. Itúaicha avei haʼe núnka ndojeruremoʼãi ñandéve peteĩ mbaʼe ndaikatumoʼãiva jajapo (Sal. 103:14; Juan 14:9). Por ehémplo Jesús oĩrõ guare ijapostolkuérandi Getsemanípe, haʼe ojerure chupekuéra ani hag̃ua oke. ¿Péro mbaʼépa oiko raʼe? Haʼekuéra noaguantái ha opyta oke. Upéicharõ jepe, Jesús pyʼaguapýpe porãnte heʼi chupekuéra: “La hénte ojapose iporãva, péro hete ikangy” (Mat. 26:41). Jesús oikuaa porã vaʼekue ijapostolkuéra iñimperfektoha, ha haʼe oikuaa porã ñande upeichanteha avei.

7, 8. ¿Mbaʼéichapa Jesús omokyreʼỹ vaʼekue idisipulokuérape?

⁷ Jesús ohechauka vaʼekue avei ojeroviaha idisipulokuérare. Mbaʼeichaitéiko oiméne ikyreʼỹ raʼe hikuái Jesús heʼírõ guare: “¡Pendepyʼaguasúkena!, che aganáma ko múndope” (Juan 16:33). Jesús ontendeka kuri haʼekuéra ikatutaha osegi iñehémplo ha ipyʼaguasu haʼéicha, ha jaikuaa upéicha hague. Péro ndahaʼéi upérõnte la Jesús oñehaʼãva ombopyʼaguasu ótrope. Por ehémplo omonguerárõ guare peteĩ paralítikope, haʼe heʼi chupe ani hag̃ua ojepyʼapy pórke ipekadokuéra oñeperdonáma (Mat. 9:2). Ótrope katu omonguera peteĩ kuñáme ha heʼi chupe ani hag̃ua okyhyje (Mat. 9:22). Ha oúrõ guare peteĩ torménta vai ha idisipulokuéra okyhyjepa, haʼe ombopyʼaguapy chupekuéra (Mat. 14:27). Tiémpo rire katu apóstol Páblope haimete ojejuka, péro Jesús osẽ heʼi chupe: “¡Aníke rekyhyje!” (Hech. 23:​9-11).

⁸ Jaʼekuaa ñande Rréi Jesús koʼág̃a heʼiha hína avei enterove isegidorkuérape: “¡Pendepyʼaguasúkena!”. Jesús ojerure ndéve ndepyʼaguasu hag̃ua. Ani nderesarái haʼe ojeroviaha nderehe. Itúa Jehová omeʼẽma voi ndéve la reikotevẽva ndepyʼaguasuve hag̃ua. ¿Mbaʼépa upéva?

¿Mbaʼéichapa la Biblia ñanepytyvõ ñandepyʼaguasuve hag̃ua?

9. ¿Mbaʼéichapa Ñandejára Ñeʼẽ ikatu ñanemokyreʼỹ?

⁹ Jehová oheja ñandéve Iñeʼẽme hetaiterei ehémplo porã ñanepytyvõva ñandepyʼaguasuve hag̃ua. Iñeʼẽme jatopa mbaʼéichapa heta kuimbaʼe ha kuña, imitãva térã ijedáva, ohechauka ipyʼaguasuha diferénte situasiónpe. Enterove haʼekuéra ‘ñandeichaguánte vaʼekue avei’, haʼe haguéicha proféta Elías (Sant. 5:17). Ñandéicha avei haʼekuéra iñimperfékto vaʼekue, ikangy ha okyhyje. Ha ñandéicha avei haʼekuéra ohasa vaʼekue heta situasión ijetuʼúva ha sapyʼánte ipeligrósova voi. Upéicharõ jepe haʼekuéra ombohovái porã vaʼekue umi situasión ha ipyʼaguasu Jesús ojapo haguéicha. Iñehemplokuéra osegi ñanembopyʼaguasu koʼag̃aite peve.

10, 11. ¿Mbaʼépepa nepytyvõta ko lívro ha mbaʼéichapa reipuru vaʼerã ideprovécho hag̃ua ndéve? (Ehecha avei pe rrekuádro: “¿Mbaʼéichapa ikatu reipuru ko lívro restudia hag̃ua neañoháme térã rejapo hag̃ua nde estúdio de família?”).

¹⁰ Ko lívro ojejapo ikatu hag̃uáicha nepytyvõ ndepyʼaguasuve hag̃ua. Umi 54 kapítulo orekóvape ko lívro, ehecháta mbaʼéichapa Jehová oipytyvõ vaʼekue isiervokuéra ndeichaguápe ipyʼaguasuve hag̃ua. Elee porãkena káda rreláto ha einvestigave eikuaa porã hag̃ua káda personáhepe. Péicha rejapóramo haʼetéta voi ndéve rehechapáva koʼã kuimbaʼe ha kuña ifieletévape.

¹¹ Hiʼãite ningo koʼã ehémplo porã tanepytyvõ ndepyʼaguasuve hag̃ua amás día. Péicha ikatúta reaguanta koʼã “ára paha” ijetuʼuetéva (2 Tim. 3:1). Káda díakena nemanduʼa la Jehová heʼi vaʼekuére: “Núnka ndorohejamoʼãi ha núnka nderepytamoʼãi neaño”. Heʼi haguéicha Pablo, ko promésa ñanembopyʼaguasúta jaʼe hag̃ua: “Jehová chepytyvõ hína, ndakyhyjemoʼãi asy” (Heb. 13:​5, 6).