Mbaʼérepa Ñandejára oheja oiko umi mbaʼe vai?

OPÁRUPI jahecha umi mbaʼe vai ojejapóva ha heta jehasa asy. Heta tetãme umi gerrahápe omano soldádo ha ndahaʼéiva soldádo avei. Opárupi hetaiterei oĩ oñorairõ ha ojojukáva. Ha ikatu avei ñanderehe ojejapo ivaíva. Upéicharõ oiméne jaikuaase: “Mbaʼére piko Ñandejára oheja oiko koʼã mbaʼe vai?”.

Ymaite guive oĩ tapicha oikuaaséva ko mbaʼe. Ojapóma 3600 áño rupi Job peteĩ kuimbaʼe iñeʼẽrendúva Ñandejárape oporanduhague: “Mbaʼérepa oikove umi iñañáva?” (Job 21:7). Ha ojapóma 2600 áño rupi proféta Jeremías ojepyʼapýgui hetãygua hembiapo vaívare heʼi: “Mbaʼére piko opa mbaʼe osẽ porã umi heko añávape? Mbaʼére piko oiko pyʼaguapýpe umi oporoguasu apíva?” (Jeremías 12:1). Job ha Jeremías oikuaa Ñandejára ndojapoiha mbaʼeve ivaíva. Upéicharõ jepe haʼekuéra oikuaase mbaʼérepa oĩ hetaite iñañáva. Ikatu ñandéve avei ñandepyʼapy ko mbaʼe.

Oĩ umi okulpáva Ñandejárape oikohaguére mbaʼe vai ha jehasa asy. Oĩ katu umi heʼíva: “Oiméramo Ñandejára ipuʼakapa, hekojoja ha ñanderayhu, mbaʼérepa nohundíri umi iñañávape ha ndoipeʼái jehasa asy? Mbaʼérepa ymáma ndojapói upéva?”. Pe párte oúvape jahecháta koʼã mbaʼe tekotevẽva entéro oikuaa.

[Roagradese oĩva páhina 3-pe]

AP Photo/Adam Butler