Mbaʼéichapa ikatu ñandepyʼaguapy hetaite provléma paʼũme

KOʼÃ tiémpope ningo hetaiterei hénte ojepyʼapyháre oiko. Mbaʼéicha rupípa upéva? Heta tetãme oĩ ñorairõ guasu, terrorísmo, opuʼãva mburuvichakuérare ha ojahéiva hapicháre hũ térã morotĩ haguére. Ambue katu ndaipyʼaguapýi oĩgui hetaiterei omonda ha oporojukáva, provléma itravahohápe térã ndojoguerahaporãi rupi ivesínondi. Ha ogapýpe katu kangue ojeiko vai jepi.

Opa umívare oĩ heta ohekáva umi rrelihión ikatúva ombopyʼaguapy chupe térã opena umi espesialísta heʼívare ỹrõ ojapo yoga. Ha ambue katu oho opytuʼu hag̃ua umi lugár iporãvape, oĩháme yvyramáta porã ha y piroʼy asy, oimoʼãgui upéicha ipyʼaguapyvetaha. Péro ohechakuaa hikuái sapyʼaitemínte ipyʼaguapyha.

Upéicharõ, mbaʼéichapa ikatu ñandepyʼaguapy? La Biblia heʼi ñande Apohare haʼeha “pyʼaguapy meʼẽha” (Romanos 15:33). Avei ohechauka koʼẽrõitéma ikatutaha ñandepyʼaguapy heʼívo: “Pyʼaguapy taipoty jasy nomimbivéi peve” (Salmo 72:​7, ÑÑB; Mateo 6:​9, 10). Ha ndahaʼéi ku sapyʼaitemínte ñandepyʼaguapýtava. Ñandejára Jehová oipeʼaitéta opa mbaʼe oguerúva jehasa asy, ku ohapoʼorõguáicha peteĩ ñana. Ha ndaiporimoʼãvéima gérra mamove hendápe (Salmo 46:​8, 9). Péinango ñandepyʼaguapýta!

Aje piko ñanemokyreʼỹete jaikuaávo umi mbaʼe ñaneraʼarõva! Upéicharamo jepe hiʼãite avei ñandepyʼaguapymi koʼã tiémpope. Ikatúnepa jahupyty upéva hetaite provléma paʼũme? La Biblia heʼi ikatuha. Pór ehémplo Filipenses 4:​4-13 ohechauka mbaʼépa jajapovaʼerã upearã. Ehekamína nde Bíbliape koʼã mbaʼe heʼivaʼekue apóstol Pablo.

‘Ñandejára ñanembopyʼaguapy’

Filipenses 4:​7-pe heʼi: “[Ñandejára] omeʼẽne peẽme ipyʼaguapy, tuichavéva opa ikatuvaʼerãgui yvypóra ohaʼarõ. Ha pe pyʼaguapy oñangarekóne pende pyʼapy ha pene remiandúre, Cristo Jesús rupi”. Jahechaháicha Ñandejára añoite ikatu ñanembopyʼaguapy ha ndaipóri ohupytyvaʼerã upéva ijehegui reínte. Heʼi voi ningo tuichaveha “opa ikatuvaʼerãgui yvypóra ohaʼarõ”. Upéva tuichave umi mbaʼe ñanemongyhyje térã ñandepyʼapývagui. Pór ehémplo, sapyʼánte ñandejopyeterei peteĩ provléma ha ndajaikuaái mbaʼéichapa ñasẽta chugui. Upéicha jave pe pyʼaguapy oúva Ñandejáragui ikatu ombovevýi ñandéve ñane remiandu. Ha jajeroviakuaa Ñandejára okumplitaha katuete ipromésa: opytataha tesaráipe umi mbaʼe ñande reko asýva.

Jahechaháicha Ñandejára añoite ikatu peichaite peve ñanembopyʼaguapy. Iñeʼẽme heʼi voi: ‘Chupe g̃uarã ndaipóri mbaʼeve ikatuʼỹva ojapo’ (Marcos 10:27). Avei jajerovia mbaretéramo Ñandejárare ndajajepyʼapyetereimoʼãi umi mbaʼe ñandejopývare. Pór ehémplo, ñapensamína mbaʼéichapa oñeñandu peteĩ mitã ohaʼarõva isýpe osẽ rire eskuélagui. Ndoupyaʼéiramo jepe isy haʼe ndojepyʼapýi oikuaágui outanteha voi ipiári. Péicha avei ñande jahasávo umi mbaʼe ijetuʼúva ndajajepyʼapýi ñandepyʼaropu hag̃uáicha, jaikuaágui Ñandejára oñangarekotaha ñanderehe ha ñanepytyvõtaha opa mbaʼe ñaikotevẽvape.

Ñandejára siervokuéra oñandu mbaʼeichaitépa haʼe omombarete chupekuéra ijetuʼuve jave. Jahechamína mbaʼépa ohasa peteĩ kuñakarai hérava Nadine. Haʼe ningo imembykuavaʼekue ha ijetuʼueterei chupe oropuʼaka hag̃ua upéva. Haʼe heʼi: “Aperdérõ guare che memby haʼete ku múndo hoʼáva che ári. Hasyeterei ningo chéve, ha añehaʼã pono ojekuaa cherehe. Ára ha ára añemboʼe Jehovápe chepytyvõmínte hag̃ua. Ha añandu vove ndaikatumoʼãveimaha aropuʼaka haʼete ku Ñandejára chembopyʼaguapy jeýva”.

‘Ñandejára oñangareko ñande pyʼapy ha ñane remiandúre’

Ñanemanduʼamína heʼíva Filipenses 4:7. Ko téysto ohechauka Ñandejára oñangarekoha ñande pyʼapy ha ñane remiandúre. Haʼete peteĩ guárdia oñangarekóva ñanderehe, pór ehémplo ani hag̃ua jahekaiterei umi mbaʼerepy.

Koʼág̃a rupi ningo heta hénte oimoʼã ovyʼa hag̃ua ipláta heta vaʼerãha. Upévare omombaʼapo ipláta oreko hetave hag̃ua. Péro ipyʼaguapyvépa hikuái? Nahániri, ojepyʼapyve rei katu. La Biblia ndeʼíri ivaiha ñandepláta heta, upéicharamo jepe oipota ñanemanduʼa ko mbaʼére: “Pirapire ohayhúva oipotapotave; pe imbaʼeretáva arakaʼeve voi noimoʼãi oguereko hetamaha. [...] Ombaʼapóva tokaruʼi térã tokaru heta, katuete oke porã; imbaʼeretáva katu, pe imbaʼereta ndohejái chupe oke” (Eclesiastés 5:​9, 11 [5:​10, 12, NM]).

Opakuévo Filipenses 4:7 Pablo heʼi Ñandejára ñanembopyʼaguapyha “Cristo Jesús rupi”. Mbaʼépa heʼise upéva? Heʼise Jesús ojapóva iñimportantetereiha oñekumpli hag̃ua Ñandejára rembipota. Haʼe omeʼẽ hekove ñandepeʼa hag̃ua pekádo ha ñemano poguýgui (Juan 3:16). Avei koʼág̃a oisãmbyhy Ñandejára Rréino. Ha jaikuaávo koʼã mbaʼe ñañeñandu porãiterei. Mbaʼérepa jaʼe upéva?

Ñepyrũrã, ñañembyasýramo ñande pyʼaite guive Ñandejára oheja reíta ñane rembiapo vaikue Jesucristo sakrifísio rupive (Hechos 3:19). Avei koʼág̃a rupi heta hénte oiko opatarõg̃uáicha chugui ko múndo. Péro ñande jaikuaa porã Jesucristo goviérno guýpe añoite ikatutaha jaiko vyʼápe (1 Timoteo 6:19). Jaikuaávo koʼã mbaʼe javyʼaiterei, ndeʼiséiramo jepe upéva nañaneprovlemamoʼãiha. Heʼi voi ningo pe ñeʼẽ: “Amáske ivai iporã ag̃ui”.

Mbaʼépa jajapovaʼerã Ñandejára ñanembopyʼaguapy hag̃ua

Pablo oĩrõ guare kárselpe ohaivaʼekue: ‘Pevyʼákena Ñandejára ndive opa árape; ha haʼe jey peẽme: Pevyʼákena! Opavave toikuaa penembaʼerechakuaaha. Ñandejára hiʼag̃uíma’ (Filipenses 1:13; 4:​4, 5, BNP). Oikorangue oñembyasy oĩ haguére kárselpe Pablo omokyreʼỹ kristianokuérape ‘ovyʼa hag̃ua Ñandejára ndive’, haʼe voi ojapoháicha. Péicha ohechauka ñandéve ivaíramo jepe la pórte ikatuha javyʼa ñaime porãma guive Ñandejára ndive. Péro mbaʼéichapa ikatu javyʼave jaservívo Chupe? Ñañehaʼã meme vaʼerã jaikuaa porãve Jehovápe ha jajapo hembipota. Upéicha añoite ikatúta javyʼa ha ñañeñandu porã.

Pablo omokyreʼỹ umi kristiánope imbaʼerechakuaa hag̃ua. Mbaʼépa heʼise upéva? Pór ehémplo ñande ningo ñaneimperfékto, upévare jahechakuaavaʼerã ndaikatumoʼãiha ñandevaleve opa mbaʼépe ha oĩtanteha voi heta mbaʼe ikatuʼỹva jajapo. Vyroreietépe ñasẽta jaikóramo ndajakevéi ñañembovaleségui opa mbaʼépe. Avei nañahaʼarõivaʼerã ñande rapichakuéra ojapo porãmba opa mbaʼe. Upéicharõ nañandepochyreimoʼãi oĩramo ojapóva peteĩ mbaʼe nañandegustáiva. Pe ñeʼẽ “mbaʼerechakuaa” oĩva Filipenses 4:​5-pe heʼise avei “nañañemohatãiha ñande jaʼévapente”. Péicha añoite ñaiméta pyʼaguapýpe jaiko vai rangue ñande rapichándi.

Opakuévo versíkulo 5, Pablo heʼi: “Ñandejára hiʼag̃uíma”. Upéva ohechauka ñandéve hiʼag̃uimaha Jehová ára ohunditahápe ko múndo aña ha oisãmbyhytahápe ko yvy. Ha heʼise avei noĩriha mombyry ñandehegui (Hechos 17:27; Santiago 4:8). Jaikuaávo koʼã mbaʼe ñanepytyvõ javyʼa ha ñanembaʼerechakuaave hag̃ua. Avei heʼiháicha ñandéve versíkulo 6-pe natekotevẽi jajepyʼapyeterei umi provlémare térã ñane renonderãre.

Jaleévo versíkulo 6 ha 7 jahechakuaa ñañemboʼevaʼerãha Ñandejárape ñandepyʼaguapy hag̃ua. Péro heta hénte nontendeporãi upéva ha oñemboʼe oñetrankilisamie hag̃uánte. Upéicharamo jepe la Biblia heʼi ñane ñemboʼe rupive ikatuha ñañemoag̃ui Ñandejárare. Haʼete ku mitã omombeʼúva itúvape oñandúva oikuaágui ontendetaha chupe. Aje piko javyʼaite ikatu haguére ñañemboʼe Jehovápe ñande pyʼaite guive ha ikatu rupi ‘ñamoĩ opa mbaʼe ipópe’!

Versíkulo 8-pe ñanemokyreʼỹ ñapensa hag̃ua iporãvare. Péro ohechaukaháicha versíkulo 9 iñimportanteve jajapo la Biblia heʼíva ñandepyʼaguapy ha ñane konsiénsia potĩ hag̃ua.

Jehová ombopyʼaguapy enterove oservisévape chupe. Péro upearã jastudiavaʼerã la Biblia ha jaikuaave jahávo mbaʼéichapa haʼe. Sapyʼánte ningo ijetuʼu jajapo hag̃ua Ñandejára rembipota, péro jajapóramo mombyry ñaganáta. Mbaʼérepa jaʼe upéva? La Biblia heʼi upéicha añoite ‘Ñandejára oporombopyʼaguapýva oĩtaha ñanendive’ (Filipenses 4:9).

[Komentário oĩva páhina 10-pe]

‘Ñandejára oñangarekóne ñande pyʼapy ha ñane remiandúre’ (FILIPENSES 4:7)

[Komentário oĩva páhina 12-pe]

Aje piko javyʼaite jaikuaávo ikatuha ‘ñamoĩ opa mbaʼe Jehová pópe’!