La Biblia okambia chupekuéra
PETEĨ kuñataĩ ningo osufrieterei vaʼekue imitãme, ¿péro mbaʼépa oipytyvõ raʼe chupe ovyʼa hag̃ua de verda? ¿Ha mbaʼépa oipytyvõ raʼe peteĩ karai ivioléntovape ha oñemoĩva pe goviérnore koʼág̃a trankílamente opredika hag̃ua? Eleemína koʼã experiénsia eikuaa hag̃ua la rrespuésta.
“Aipotaiterei vaʼekue álgien cherayhu ha oñeinteresa cherehe” (INNA LEZHNINA)
ONASE: 1981-PE
PAÍS: RUSIA
ÓTRA INFORMASIÓN: HETAITEREI OSUFRI VAʼEKUE IMITÃME
CHE REMBIASAKUE: Che tuakuéra sórdo vaʼekue ha che anase avei sórda. Areko peve 6 áño, trankílo aiko vaʼekue ha avyʼa, péro upéi che tuakuéra ou ojedivorsia. Chemitãitirõ jepe upérõ guare, che antendéma kuri mbaʼépa upéva, ha upéicha rupi ojapo vaieterei cherehe. Pe divórsio rire, che túa ha che ermáno majór opyta oiko Tróitskpe, ha che ha che sy katu rova peteĩ siuda héravape Chelyabinsk. Tiémpo rire haʼe omenda jey kuri, ha la che tuanga ikaʼu vaʼekue ha pyʼỹinte orembyepoti chéve ha che sýpe.
Áño 1993-pe, che ermáno majór ojahoga anga ha upéva orereja vaieterei kuri. Upéicha rupi che sy oñepyrũ omokõ rasa, ha upépe che tuanga ha haʼéma oñepyrũ chemaltrata. Ndaigustoieterei vaʼekue upe tiémpope ha ekapadeterei chéve aiko trankilomi. Aipotaiterei vaʼekue álgien cherayhu ha oñeinteresa cherehe. Upévare añepyrũ vaʼekue aha diferénte iglésiape konsuélo rekávo, péro ndatopái mbaʼevete asy.
LA BIBLIA CHEPYTYVÕ AKAMBIA HAG̃UA: Arekórõ guare 13 áño, peteĩ che kompañéra haʼéva testígo de Jehová oñepyrũ omombeʼu chéve unas kuánta istória oĩva la Bíbliape. Chegustaiterei vaʼekue por ehémplo Noé ha Job istória. Ahecharamoiterei mbaʼéichapa oservi hikuái Ñandejárape ijetuʼúrõ jepe hendivekuéra. Pyaʼe voi añepyrũ astudia la Biblia umi Testigokuérandi ha añepyrũma avei aha rreunionhápe.
La Biblia tuicha cheresapeʼa ha aaprende hetaiterei mbaʼe iporãitereíva. Por ehémplo opokoiterei vaʼekue cherehe aaprendérõ guare Ñandejára orekoha la héra (Salmo 83:18). Avei chesorprendeterei aikuaárõ guare mbaʼeichaitépa la Biblia ojaserta omombeʼúvo mbaʼéichapa jaikóta kuri “umi ára pahápe” (2 Timoteo 3:1-5). Ha chemopirĩmba aaprendérõ guare pe esperánsa de la rresurreksión. ¡Avyʼaiterei aikuaárõ guare ikatutaha ahecha jey che ermánope! (Juan 5:28, 29).
Péro naentéroi ovyʼa kuri chendive la ajapóvare. Por ehémplo, che sy ha che tuanga ndochaʼéi vaʼekue umi Testígore, upévare chejopy vaʼekue hikuái anivéma hag̃ua astudia la Biblia. Péro chéve chegustaiterei vaʼekue umi mbaʼe aaprendéva, upévare ni guaʼuhápe ndahejaséi kuri la che estúdio.
Che família oñemoĩeterei vaʼekue cherehe, ha chéve ijetuʼu vaʼekue aaguanta hag̃ua upéva. Péro upéi oikomi ótra desgrásia: che ermaníto cheakompañámi vaʼekue umi rreuniónpe ojahoga avei. Upéva ijetuʼueterei kuri chéve, péro umi Testígo oĩ che ykére ha tuicha chekonsola. Che ningo tóda la vída aipota vaʼekue álgien cherayhu ha oñeinteresa cherehe, ha umi Testígo apytépe atopa upéva. Ha upéva chekonvense haʼekuéra haʼeha la rrelihión verdadéra, upévare áño 1996-pe ajevautisa.
UMI MBAʼE PORÃ AHUPYTÝVA: Ojapóma 6 áño amenda hague, ha la che ména héra Dmitry. Haʼe ningo ivuenoiterei, ha oñondive roservi peteĩ sukursál orekóvape umi testígo de Jehová San Petersbúrgope. Kon el tiémpo la che tuakuéra okambia ha noñemoĩvéima cherehe.
¡Legálmente aagradeseterei Jehovápe opermiti haguére chéve aikuaa chupe! Koʼág̃a ikatu haʼe de verda avyʼaha aservi rupi chupe.
“Oĩ vaʼekue heta mbaʼe nantendéiva” (RAUDEL RODRÍGUEZ RODRÍGUEZ)
ONASE: 1959-PE
PAÍS: CUBA
ÓTRA INFORMASIÓN: OPUʼÃ VAʼEKUE PE GOVIÉRNO KÓNTRAPE
CHE REMBIASAKUE: Anase vaʼekue La Habana, Cúbape. La che várrio imboriahu vaʼekue ha pyʼỹinte umi hénte oiko vaipa vaʼekue pe kállere. Chemitãme oñepyrũ kuri chegusta pe júdo ha hetave depórte oñeñorairõhápe.
Che chenóta porã vaʼekue, upévare che tuakuéra oipota vaʼekue aha fakultápe. Ha aha rire upépe, añepyrũ apensa pe sistéma de goviérno oĩva che paíspe okambia vaʼerãha. Upévare añepyrũ añemoĩ pe goviérnore. Peteĩ vuéltape peteĩ che kompañérondi roataka voi peteĩ polisíape romonda hag̃ua chugui ipistóla. Ha upe atákepe rogolpea vaieterei chugui la iñakã, ha upe haguére roho kárselpe. Upépe oñemeʼẽ oréve peteĩ senténsia de muérte, ha heʼi peteĩ pelotón de fusilamiénto orejuka vaʼerãha. Upérõ che 20 áño ramónte kuri areko, ¡ha ja amano mbotáma kuri!
Pe kárselpe aĩ kuri cheaño peteĩ séldape, ha upépe añepyrũ añensaja mbaʼépa ajapóta ág̃a aĩ vove umi chejukátava renondépe, pórke ndaipotái kuri avave opilla akyhyjeha. Péro avei oĩ vaʼekue heta mbaʼe nantendéiva. Por ehémplo, ¿mbaʼéreiko oĩ hetaite inhustísia ko múndope? ¿Ha mbaʼe sera oiko ñandehegui ñamano rire?
LA BIBLIA CHEPYTYVÕ AKAMBIA HAG̃UA: Al finál la ore senténsia de muérte oñekambia, ha roñesentensia roĩ hag̃ua 30 áño pe kárselpe. Ha aĩ aja upépe, aikuaa kuri umi testígo de Jehovápe. Upérõ unos kuánto oĩ kuri pe kárselpe umi mbaʼe ogueroviáva káusare. Péro ahecharamoiterei mbaʼéichapa haʼekuéra ipyʼaguasu ha itrankílo avei. Ha iñinhústoramo jepe la oikóva hesekuéra, haʼekuéra ndahaʼéi ku oikóva oñamarga ni ipochy mbaʼe upe haguére.
Umi Testígo chemboʼe mbaʼépa Ñandejára ojapóta ñanderehehápe. Por ehémplo, ohechauka chéve la Biblia rupive ko yvýgui oikotaha peteĩ paraíso, ha upépe ndaiporimoʼãvéima inhustísia ni delinkuénsia. Ko múndope opytáta sólamente umi persóna ivuénova, ha orekóta hikuái la oportunida oikóvo pára siémpre pe paraísope (Salmo 37:29).
Chegustaiterei vaʼekue la chemboʼéva umi Testígo, péro che chediferentete vaʼekue chuguikuéra. Apensa vaʼekue ijetuʼutaha chéve ani hag̃ua añentremete polítikare ha ani hag̃ua arreaksiona ojejapo mbaʼéramo álgo cherehe. Upémarõ añepyrũ alee chejeheguiete la Biblia, ha aleepa rire añemeʼẽ enkuénta sólamente umi testígo de Jehová ojapoha umi mbaʼe ojapo vaʼekue umi kristiáno Jesús tiémpope guare.
Añepyrũ rire astudia la Biblia, añemeʼẽ enkuénta heta mbaʼépe voi akambia vaʼerãha. Por ehémplo, ndachejurukyʼavéima vaʼerã, aheja vaʼerã pe sigarríllo ha ndaikevéima vaʼerã polítikape. Ijetuʼu kuri chéve legálmente, péro Jehová chepytyvõ rupi ikatu ahejaite umi mbaʼe.
Ótra kósa ijetuʼueterei vaʼekue avei chéve haʼe añekontrola chepochy jave. Ha sinséramente koʼág̃a peve añemboʼe vaʼerã Jehovápe ikatu hag̃uáicha ajejokokuaa. Upéva upe mbaʼépe tuicha chepytyvõ kuri unos kuánto téxto bíblico. Por ehémplo, Proverbios 16:32 heʼihápe: “Pe persóna ndaipochyreíriva ohechauka imbareteveha peteĩ kuimbaʼe ipoderósovagui. Pe ojejokokuaáva ha norreaksionáiva oimeraẽ mbaʼére, ipoderosove peteĩ gerréro ojagarrávagui peteĩ siuda”.
Áño 1991-pe ajevautisa kuri pe kárselpe peteĩ tambórpe. Un áño haguépe unos kuánto préso ha che ropyta lívre ha roñemondo Espáñape. Ag̃uahẽ rire upe paíspe, ensegída voi añepyrũma aha umi rreuniónpe ha upépe umi testígo de Jehová cherresivi ku chekuaarõguáicha de tóda la vída, ha chepytyvõ hikuái añepyrũ hag̃ua de seroite.
UMI MBAʼE PORÃ AHUPYTÝVA: Koʼág̃a avyʼaiterei ikatu rupi aservi Ñandejárape che rembireko ha che rajykuérandi. Avyʼaiterei avei aipurupa lénto haguére che tiémpo amboʼe hag̃ua la Biblia umi héntepe. Koʼág̃a peve chemanduʼa chemitãitéreve haimete hague amano. Upévare aagradeseterei Ñandejárape cherreskata haguére upégui. Ndahaʼéi sólamente asegíva aikove, síno areko esperánsa. Ekapadetereíma chéve og̃uahẽ pe múndo pyahu, pórke upépe ojejapóta hustísia ha “ndaiporimoʼãvéima omanóva” (Apocalipsis 21:3, 4).
[Komentário]
“Opokoiterei vaʼekue cherehe aaprendérõ guare Ñandejára orekoha la héra”
[Taʼanga]
Che ména ha che rovyʼaiterei ikatu haguére rokomparti umi sórdondi umi puvlikasión oĩva lengua de séñaspe