‘Jehová peneperdona ipyʼaite guive’

“Peteĩ noperdonaséiva hapichápe oity hína pe puénte upéi haʼe voi oikotevẽtava ohasa hag̃ua.” Ojapóma cuatrocientos áño péicha heʼi hague peteĩ karai ohaíva lívro hérava Edward Herbert, haʼe heʼíva ohechauka porã mbaʼérepa ñaporoperdona vaʼerã: ág̃ante ñande ñaikotevẽta avei ótro ñaneperdona (Mateo 7:12). Péro apóstol Pablo ohechauka ñandéve mbaʼérepa iñimportanteve hína ñaporoperdona. (Elee Colosenses 3:13.)

Enterove ñaneimperfékto rupi sapyʼánte ñambopochy ótrope térã haʼekuéra ñanembopochy (Romanos 3:23). ¿Mbaʼépa ikatu jajapo jaiko hag̃ua pyʼaguapýpe opavavéndi? Apóstol Pablo heʼi vaʼekue iñimportanteha ñanepasiénsia ha ñaperdona ñande rapichápe. Ha ohasámarõ jepe haimete dos mil áño haʼe ohai hague upe konsého, koʼág̃a peve tuicha ñanepytyvõ. Jahechamína la heʼi vaʼekue.

“Pesegíkena peñoaguanta”. Griégo ñeʼẽme “pesegíkena peñoaguanta” heʼise avei ñanepasiénsia vaʼerãha. Peteĩ lívro omyesakãva la Biblia heʼi peteĩ ipasiénsiava “oĩha oaguanta hag̃uáicha peteĩ tapichápe ndogustáiramo jepe chupe ilája térã ojapóva”. Ha heʼívo “peñoaguanta” heʼise káda uno ñanepasiénsia vaʼerãha ojuehe. Upéicharõ, jahechakuaáramo ñande lája ikatuha ndogustái ñande rapichakuérape, upéva ñanepytyvõta ñaaguanta hag̃ua avei chupekuéra ha péicha jaiko pyʼaguapýpe. Péro, ¿mbaʼépa jajapóta oĩramo ñanembopochýva?

“Pesegíkena [...] peñoperdona pende pyʼaite guive”. Peteĩ karai ohesaʼỹijóva la Biblia heʼi pe palávra griéga ojetradusíva “peñoperdona pende pyʼaite guive” heʼiseha “jaiporiahuvereko vaʼerãha ñande rapichápe”. Peteĩ lívro heʼi avei ko ñeʼẽ heʼiseha “jajapo peteĩ mbaʼe porã ñande rapicha rehehápe”. ‘Oĩramo jepe ñanembopochýva’ ñaperdona vaʼerã chupe, upéicha jahechauka jaiporiahuverekoha. Péro, ¿mbaʼérepa jajapo vaʼerã upéva ñande rapicha rehehápe?. Ñande ñaikotevẽta rupi avei haʼe ñaneperdona.

“Jehová peneperdona haguéicha ipyʼaite guive, upéicha avei peẽ pejapo vaʼerã”. Jehová ningo ñaneperdona ipyʼaite guive, upévare koʼytevéntema ñaperdona vaʼerã ñande rapichápe (Miqueas 7:18). Ñapensamíntena mbaʼeichaitépa Jehová imbaʼeporã umi oñembyasýva ndive ojavy haguére. Haʼe ningo arakaʼeve ndojapói mbaʼeve ivaíva, upévare noikotevẽmoʼãi ñaperdona chupe, upéicharamo jepe Jehová ipyʼaite guive ñaneperdona. Péicha omoĩ ñandéve pe ehémplo iporãvéva.

Jahechakuaávo mbaʼeichaitépa Jehová ñandeporiahuvereko ñañemoag̃uiseve hese ha jasegise iñehémplo (Efesios 4:32–5:1). Upéicharõ, oĩramo peteĩ ñande rapicha ombyasýva ñanembopochy haguére iporãta ñapensami: “Jehová cheperdonáramo, ¿mbaʼére piko che naperdonamoʼãi avei peteĩ che rapicha imperféktope?” (Lucas 17:3, 4).