KO RREVÍSTAPE OÑEHESAʼỸIJO | ¿ÑAMANÓRAMO PIKO NDAJAREKOVÉIMA ESPERÁNSA?
¡Oĩ esperánsa umi omanóvape g̃uarã!
Yma oĩ vaʼekue peteĩ lugár hérava Betania, opytáva 3 kilómetro Jerusaléngui (Juan 11:18). Upépe oiko kuri peteĩ mbaʼe oñembyasyetereíva. Peteĩ díape, Jesús omano mboyvemi, peteĩ iñamigoite hérava Lázaro, hasykatu ha upéi omano.
Oñemombeʼúrõ guare Jesúspe upe oikóva, haʼe heʼi idisipulokuérape Lázaro okenteha hína ha ohotaha omombáy chupe (Juan 11:11). Péro ohechakuaávo nontendeiha hikuái, Jesús heʼi porã chupekuéra: “Lázaro omanóma” (Juan 11:14).
Cuatro día Lázaro oñemoĩ haguépema sepultúrape, Jesús og̃uahẽ ohóvo Betániape ha oheka Mártape okonsola hag̃ua chupe iñermáno omano haguére. Upépe Marta heʼi Jesúspe: “Reimérire koʼápe, che ermáno nomanói vaʼerãmoʼã” (Juan 11:17, 21). Ha Jesús heʼi chupe: “Che hína pe ñemoingove jey ha che rupive oikove jey umi hénte. Pe ojeroviáva cherehe omanóramo jepe oikove jeýta” (Juan 11:25).
“¡Lázaro, esẽ!”
Jesús ohechauka hag̃ua ikatuha ojapo upe oprometéva, oñemboja pe sepultúra rokẽme ha hatã heʼi: “¡Lázaro, esẽ!” (Juan 11:43). ¡Umi hénte ni ndogueroviaséi ohechávo Lázaro osẽ oúvo pe sepultúragui!
Péro upe mboyve Jesús omoingovéma voi kuri mokõi omano vaʼekuépe. Peteĩva hína Jairo rajy. Upérõ Jesús heʼi kuri avei pe mitãkuñaʼi rehe okenteha hína (Lucas 8:52).
Jahechakuaa Lázaro ha Jairo rajy omanórõ guare Jesús heʼi hague hesekuéra okenteha hína. ¿Mbaʼérepa heʼi upéicha? Umi okéva ningo opytuʼupaite, nopensái ni noñandúi mbaʼeve, ojeʼe jepi voi okemano (Eclesiastés 9:5; ehecha avei pe rrekuádro heʼihápe: “Umi omanóva haʼete okénteva”). Umi kristiáno ypykue oikuaa porã vaʼekue mbaʼéichapa oĩ umi omanóva. Peteĩ ensiklopédia heʼi: “Chupekuéra g̃uarã umi omanóva haʼete okéva hína, ha pe sepultúra katu peteĩ lugár ohohápente opytuʼu [...] umi iñeʼẽrendúva omano vaʼekue” (Encyclopedia of Religion and Ethics).a
Tuicha ningo ñandepyʼaguapy jaikuaávo umi omanóva ndosufririha; síno haʼete okénteva hína pe sepultúrape. Jaikuaa rupi mbaʼépa oiko ñamano rire, ndaiporivéima jakyhyje hag̃ua.
“PETEĨ KUIMBAʼE OMANÓRAMO, ¿OIKOVE JEÝNEPA?”
Igustoiterei ningo jake porã ha japytuʼupaitéramo, péro ¿mávapa okeséne opa árare? ¿Oĩ piko esperánsa umi omano vaʼekuépe g̃uarã? ¿Ikatúnepa oñemoingove jey chupekuéra Lázaro ha Jairo rajy oñemoingove jey haguéicha?
Peteĩ karai yma guare, hérava Job, ohechakuaávo omanombotaiteha, oporandu Ñandejárape: “Peteĩ kuimbaʼe omanóramo, ¿oikove jeýnepa?” (Job 14:14, NM).
Job voi ombohovái jey pe mbaʼe oporandu vaʼekue Ñandejárape, heʼívo: “Nde cherenóita, ha che rombohováita. Pe nde rejapo vaʼekue rehechase jeýta” (Job 14:15, NM). Ko kuimbaʼe iñeʼẽrenduetéva ojeroviaiterei Ñandejára Jehová omoingovese jeyha chupe. ¿Jaʼekuaápa Job tuichaiterei ojavy hague? Nahániri.
Jesús omoingove jeývo umi omano vaʼekuépe, ohechauka porã Ñandejára omeʼẽha chupe podér ipuʼaka hag̃ua pe ñemanóre. La Biblia heʼi Jesús orekoha ipópe “pe lláve [...] ñemano” rehegua (Apocalipsis 1:18). Upéicharõ, Jesús omoingove jey haguéicha Lázarope, omopuʼã jeýta umi omano vaʼekuépe.
La Bíbliape, heta vése Ñandejára opromete ñandéve omoingove jeytaha umi omano vaʼekuépe. Por ehémplo, peteĩ ánhel heʼi proféta Daniélpe: “Tereho epytuʼu og̃uahẽ meve pe ára paha, upe ára upévape nde repuʼã jeýta oñemeʼẽ hag̃ua ndéve nembaʼerã” (Daniel 12:13, ÑÑB). Peteĩ jey katu Jesús heʼi vaʼekue umi saduséo ndogueroviáivape oñemoingove jeytaha umi omano vaʼekuépe: “Peẽ tuicha pejavy, ndapeikuaáigui Ñandejára Ñeʼẽ heʼíva ni Ñandejára podér” (Mateo 22:23, 29). Ha apóstol Pablo heʼi avei: “Areko esperánsa Ñandejárare, [...] oñemoingove jeytaha umi hekojojáva ha hekojojaʼỹva” (Hechos 24:15).
¿ARAKAʼÉPA OIKÓTA UPÉVA?
¿Arakaʼépa oñemoingove jeýta umi hekojoja ha hekojojaʼỹva omano vaʼekuépe? Proféta Daniel heʼi haguéicha, upéva oikóta pe ‘ára pahápe’. Marta oguerovia kuri iñermáno Lázaro “oñemoingove jeytaha [...] pe ára pahápe” (Juan 11:24).
La Biblia oñeʼẽvo pe ára paháre, oñeʼẽ avei Jesús ogovernaha tiémpo rehe. Apóstol Pablo ohai: “Haʼe ogoverna vaʼerã Ñandejára omoĩ meve ipy guýpe entéro iñenemigokuérape. Ha ñane enemígo ipahaite oñehundítava haʼe pe ñemano” (1 Corintios 15:25, 26). Upévare koʼýte jajerure vaʼerã Ñandejárape tou Irréino ha tojejapo hembipota ko yvy ape ári.b
Job heʼi haguéicha, Ñandejára omoingovese jey umi omano vaʼekuépe. Ha og̃uahẽ vove pe ára ojapo hag̃ua upéva, opaitétama avei pe ñemano ha avave natekotevẽmoʼãvéima oñeporandu: “¿Ñamanóramo piko ndajarekovéima esperánsa?”.
a Pe palávra sementério ou voi peteĩ ñeʼẽ griégogui heʼiséva “lugár ojepytuʼuha”.
b Reikuaave hag̃ua upe Rréinogui, ikatu rehecha kapítulo 8-pe lívro Mbaʼépa añetehápe omboʼe la Biblia?, ojapóva testígo de Jehová. Ikatu rehecha avei Internétpe: www.jw.org/gug.