¿Ikatúpa jaikuaa ñane renonderã?

Enterovénte ningo ñapensa ha jajepyʼapy ñane renonderãre. Jaikuaase mbaʼépa ñaneraʼarõ ñandéve ha umi jahayhúvape. Sapyʼánte ñañeporandu: “¿Ikatúnepa okambia ko múndo che familiakuéra oiko porãve hag̃ua okakuaapa vove? ¿Oñehundítapa ko yvy? ¿Mbaʼépa ikatu ajapo oho porã hag̃ua chéve tenonderãme?”. Enterovénte ningo jaikuaase koʼã mbaʼe, pórke hiʼãiterei ñandéve jaiko pyʼaguapýpe, peteĩ lugár iporã ha ndaiporihápe ojapóva mbaʼe vai. Añetehápe ikatúramo jaikuaa ñane renonderã, ikatúta jajeprepara ñambohovái porã hag̃ua oimeraẽ mbaʼe.

Péro, ¿mbaʼépa ñaneraʼarõ amo gotyove? ¿Ikatúnepa jaikuaa upéva? Umi hénte ojededikáva opredesi hag̃ua mbaʼépa oikóta, sapyʼánte ojaserta, péro hetave vése ndoikói haʼekuéra heʼi haguéicha. Ñandejára katu ni michĩmi ndojavýi heʼívo umi mbaʼe oikótava. Iñeʼẽ, la Biblia heʼi voi: “Iñepyrũmby guive amombeʼúma umi mbaʼe ipahápe ojehútava, ha ymaiterei guive amyesakã umi mbaʼe neʼĩrava gueteri oiko” (Isaías 46:10, ÑÑB). ¿Añetépa upéva?

¿OÑEKUMPLIPAITÉPA AÑETE ÑANDEJÁRA PROFESIAKUÉRA?

¿Mbaʼérepa iporã jaikuaa oñekumplípa rakaʼe Ñandejára profesiakuéra? Por ehémplo, peteĩ meteorólogo ojaserta meméramo heʼi jave okýtapa térãpa nahániri, katuete rejeroviavéta hese ha káda día rehendúta mbaʼépa heʼíta koʼẽrõ g̃uarã rehe, ¿ajépa? Upéicha avei, jaikuaáramo Ñandejára profesiakuéra oñekumplipaiteha, katuete jaikuaaséta mbaʼépa heʼi ñane renonderãre.

PETEĨ SIUDA OÑEHUNDIETÉTA:

Ñandejára heʼi iproféta rupive oñehunditaha Nínive, peteĩ siuda ipoderosoitereíva ha heta áñorema opyrũ hatãva (Sofonías 2:13-15). ¿Oñekumplípa raʼe upe profesía? ¿Mbaʼépa heʼi umi istoriadór? Quince áño ojeprofetisa haguépe, síglo 7-pe Jesús ou mboyve, umi babilónio ha umi médo oatakáma Nínive ha ojagarra upe siuda. Ñandejára heʼi vaʼekue avei upe siuda opytataha itapere ha haʼetetaha peteĩ desiérto. Ha upeichaite oiko, pe siuda ha umi oĩva ijerére orekóramo jepe 518 kilómetro kuadrádo, umi ojagarra vaʼekue upe siuda ndoiporúi upe lugár oñeimoʼã haguéicha, síno ohundiete hikuái upe siuda ha koʼag̃aite peve hendaguémante opyta. ¿Ikatu vaʼerãmoʼãpa peteĩ kuimbaʼe ijehegui reínte opredesi peichaite umi mbaʼe oikótava ha upéi oñekumpli?

OHAPÝTA YVYPORAKUÉRA KANGUEKUE:

¿Máva piko opredesíne 300 áño oiko mboyve, oĩtaha peteĩ kuimbaʼe ohapýtava yvyporakuéra kanguekue peteĩ altár ári, moõitépa oĩta upe altár, mbaʼe famíliaguipa oúta ko kuimbaʼe ha mbaʼéichapa hérata? Oñekumplíramo koichagua profesía, katuete ñamombaʼéne upe heʼi vaʼekuépe ha ifamósota. Peteĩ kuimbaʼe oñeʼẽva Ñandejára rérape, heʼi vaʼekue rréi David familiarégui outaha Josías ha ohapytaha yvyporakuéra kanguekue peteĩ altár ári oĩva Betélpe (1 Reyes 13:1, 2). Ha upeichaite oiko, peteĩ kuimbaʼe oúva David familiarégui hérava Josías oñenombra rréi, 300 áño ojeprofetisa rire ko mbaʼe, ha upe tiémpope ningo ndaiporiguasúi vaʼekue hérava upéicha. Ha ojeʼe hagueichaite hese, haʼe ‘oguenohẽka umi kanguekue oĩva [sepultúrape] ha ohapy peteĩ altár ári’ oĩva Betélpe (2 Reyes 23:14-16). ¿Ikatúne piko peteĩ yvypóra ñandeichagua ijehegui reínte heʼi koʼã mbaʼe oikótava?

OÑEHUNDÍTA PETEĨ TETÃ OMANDA GUASÚVA:

Ajépa ni ndajagueroviasemoʼãi ojeʼéramo ñandéve 200 áñorupi onase mboyve peteĩ kuimbaʼe, haʼe ohunditaha peteĩ tetã omanda guasúva. Ha koʼýte ojeʼévo héra ha mbaʼeichaitépa ojapóta upéva. Ñandejára heʼi vaʼekue peteĩ kuimbaʼe hérava Ciro ojagarrataha peteĩ tetã. Upéi heʼi avei omosãsotaha umi hudíope ha oipytyvõtaha oñemopuʼã jey hag̃ua pe témplo. Omombeʼu voi mbaʼépa ojapóta ojagarra hag̃ua upe tetã: heʼi Ciro ombohypataha peteĩ rrío ha ojehejataha nandi peteĩ siuda rokẽ (Isaías 44:27–45:2). ¿Oñekumpli piko rakaʼe upe profesía heʼi haguéicha? Si. Umi istoriadór omombeʼu Ciro ojagarra hague Babilonia kapitál ha ohundi upe tetã omanda guasuete vaʼekue. Ha heʼi haguéicha pe profesía, Ciro ha ijehérsito ombohypa pe rrío ombodesviávo pe y ótro ládo. Avei upe siuda rokẽ opyta kuri nandi ha oike upérupi umi soldádo. Upe rire, Ciro omosãso umi hudíope ha omopuʼãka jey pe témplo Jerusalénpe. Avavénte ni ndogueroviaséi Ciro ojapouka hague upéva, pórke haʼe ningo ndoservíri vaʼekue umi hudío Járape (Esdras 1:1-3). ¿Ikatúne piko peteĩ yvypóra ijehegui reínte opredesi koʼã mbaʼe ha oñekumpli upeichaite? Ñandejára añoite ikatu ojapo upéva.

Koʼã mbohapy ehémplo ohechauka Ñandejára profesía katuete oñekumpliha, ha ndahaʼéi umíva añónte la oñekumplíva. Yma, Josué omoakãrõ guare umi isrraelítape, heʼi chupekuéra: ‘Peẽ katu peikuaa porã pende pyʼaite guive Ñandejára ojapo hague opa umi mbaʼe porã heʼi vaʼekue ojapotaha. Ndaipóri peteĩ mbaʼe oheja vaʼekue ojapoʼỹre’ (Josué 23:1, 2, 14). Umi isrraelíta oikuaa porã vaʼekue Ñandejára katuete okumpliha iprofesía ha opa mbaʼe oprometéva. ¿Mbaʼéicha rupípa haʼe ikatu ojapo upéva? Ñandejára ningo tuicha idiferénte yvyporakuéragui, ha iporã jaikuaa upéva pórke oĩ profesía oñekumplítava hína koʼẽrõite ha okambiaitétava ñane situasión.

ÑANDEJÁRA PROFESÍA HA UMI YVYPÓRA OPREDESÍVA

Yvyporakuéra opredesi hag̃ua heta oinvestiga, ostudia umi mbaʼe oikóva jepi térã ojevale voi pe espiritísmo rehe. Ha upe rire oguapy ohaʼarõ jahecha oñekumplípa upe heʼi vaʼekue (Proverbios 27:1).

Ñandejára katu oikuaapaite voi opa mbaʼe. Haʼe ñandekuaa porã ñandéve ha mbaʼépa jajapose. Upéicha rupi, Haʼe ikatu oikuaa mbaʼépa ojapóta peteĩ persóna térã peteĩ tetã. Ha ndahaʼéi upéva añónte, ikatu avei ojapo tekotevẽva guive oñekumpli hag̃ua haʼe heʼi vaʼekue. Ñandejára heʼi voi: “Peichaite avei che ñeʼẽ osẽva che jurúgui, ndouvéima vaʼerã che rendápe ojejapoʼỹre che rembipota, ha oikopa peve che aipota vaʼekue” (Isaías 55:11, ÑÑB). Umi profesía rupive Ñandejára omombeʼu ñandéve mbaʼépa ojapóta amo gotyove ha haʼe voi oñenkarga oñekumplipaite hag̃ua.

¿MBAʼÉPA ÑANERAʼARÕ?

¿Ikatúpa upéicharõ jaikuaa mbaʼépa ñaneraʼarõ ñandéve ha umi jahayhúvape? Ñande jaikuaáramo outaha peteĩ torménta vai, katuete jajepreparáta jajeprotehe hag̃ua. Ha upéicha avei jajapo vaʼerã jaikuaávo umi profesía oĩva la Bíbliape ha oñeʼẽva umi mbaʼe oikótavare koʼẽrõite. Ñandejára opromete tuicha okambiataha ko múndo, ha ndeʼiriete oikotaha umi yvypóra opredesiháicha. (Ehecha pe rrekuádro heʼíva: “Mbaʼépa heʼi Ñandejára ñane renonderãre”.)

La Bíbliape oĩ heta profesía omombeʼúva mbaʼépa ohaʼarõ yvyporakuérape, ha enterovéva ikatu jaikuaa umíva. Ñandejára heʼi voi: “Iñepyrũmby guive amombeʼúma umi mbaʼe ipahápe ojehútava [...]. Che ñeʼẽ haʼéma vaʼekue katuete oikóta ha umi mbaʼe ajaposéva guive katuete ajapóta avei” (Isaías 46:10, ÑÑB). Enterovete ikatu hína jahupyty umi mbaʼe porã Ñandejára oprometéva tenonderãme g̃uarã. ¿Reikuaasépa mbaʼe mbaʼépa umíva? Ikatu reporandu umi testígo de Jehovápe. Haʼekuéra ndahaʼéi proféta ni ndohói umi espiritísta rendápe, péro ostudia la Biblia ha ikatu omyesakã ndéve umi mbaʼe Ñandejára ojapótava koʼẽrõite.