Jehovápe g̃uarã iñimportánte jaʼe jave “amén”

“PE PUÉVLO KOMPLETOITE HEʼÍTA: ‘¡AMÉN!’”

Pe palávra “amén” heʼise “taupéicha” térã “toiko katu péicha”. Upe término ningo ou peteĩ palávra hebrea heʼisévagui “ifiél” ha “ikatu jajerovia hese”. Sapyʼánte ojepuru vaʼekue oñeñeʼẽ jave umi téma legál rehe. Por ehémplo, peteĩ persóna ojapo rire peteĩ huraménto heʼi “amén” ohechauka hag̃ua ndaijapuiha ha oĩha rresponsávle la heʼívare (Núm. 5:22). Péicha ojejapo jave pe huraménto, pe palávra “amén” okompromete upe persónape okumpli hag̃ua la heʼíva (Neh. 5:13).

Deuteronomio kapítulo 27-pe jatopa peteĩ ehémplo iporãitereíva ohechaukáva mbaʼéichapa ojepuru pe palávra “amén”. Umi israelita oike rire pe Tiérra Prometídape, oñembyaty vaʼerã kuri pe Mónte Ebal ha Mónte Guerizim mbytépe ohendu hag̃ua ojeleévo pe léi. Haʼekuéra oĩ kuri upépe ndahaʼéi ohendu hag̃uánte, síno oñekompromete hag̃ua avei okumplitaha pe léi. Umi israelita ojapo upéva heʼívo “amén” káda ke ojelee mbaʼépa oikóta kuri nokumplíriramo pe léi (Deut. 27:15-26). Oiméne ningo hatãite oñehendu raʼe umi kuimbaʼe, kuña ha mitã heʼírõ guare oñondivepa “amén” (Jos. 8:30-35). Katuete umi israelita arakaʼeve ndahesaráiri pe promésa ojapo vaʼekuégui. Jaikuaa okumpli hague hikuái pórke la Biblia heʼi: “Umi israelita oservi Jehovápe Josué oikove aja entéro, ha avei oĩ aja umi kuimbaʼe omoakãva pe puévlo osegíva oikove Josué omano rire, ha ohecha vaʼekue opa mbaʼe Jehová ojapóva Israel rehehápe” (Jos. 24:31).

Jesús oipuru vaʼekue avei pe palávra “amén” oasegura hag̃ua pe ojeʼéva siertoha, péro haʼe ojapo upéva avave ótro ojapoʼỹ haguéicha. Heʼi rangue “amén” oasepta hag̃uánte algúna kósa ojeʼéva, oipuru upe palávra omboʼe mboyve peteĩ mbaʼe. Péicha ohechauka siertoha la heʼíva. Koʼã okasiónpe ko palávra ojetradusi jepi “añetehápe”. Sapyʼánte haʼe orrepeti 2 vése voi upe palávra ha heʼi “amén amén” (Mat. 5:18; Juan 1:51). Péicha jave Jesús ohechauka umi ohendúvape chupe siertoiteha la heʼíva. Haʼe ningo ikatu kuri oasegura koʼã mbaʼe, pórke chupe añoite oñemeʼẽ pe autorida okumpli hag̃ua entéro mbaʼe Ñandejára oprometéva (2 Cor. 1:20; Apoc. 3:14).

“PE PUÉVLO KOMPLETOITE HEʼI: ‘¡AMÉN!’, HA OMOMBAʼEGUASU HIKUÁI JEHOVÁPE”

Umi israelita oipuru avei pe palávra “amén” omombaʼeguasu hag̃ua Jehovápe ha avei oñemboʼe jave chupe (Neh. 8:6; Sal. 41:13). Heʼi rupi hikuái “amén” oñeñemboʼe rire, ohechauka oaseptaha la ojeʼéva. Péicha entéro umi ijatýva ikatu kuri opartisipa, ha upéva oipytyvõ avei ikatu hag̃uáicha oñemombaʼeve pe okasión. Rréi David oguerúrõ guare Jehová árka Jerusalénpe, pe puévlo opartisipa kuri heʼívo “amén”. Upéi ojejapo peteĩ fiésta ha ojepurahéi peteĩ orasión iporãitereíva oĩva 1 Crónicas 16:8-36-pe. Umi persóna oĩva upépe ikyreʼỹeterei opytávo, ha upévare “pe puévlo kompletoite heʼi: ‘¡Amén!’, ha omombaʼeguasu hikuái Jehovápe”. Jahechaháicha, pe puévlo heʼi haguére oñondivepa “amén”, enterovéva ovyʼaiterei opytávo.

Umi kristiáno primer síglope guare oipuru meme vaʼekue avei pe palávra “amén” omombaʼeguasu hag̃ua Jehovápe. Upéicha avei, umi eskritór bíblico pyʼỹinte oipuru upe palávra ikartakuérape (Rom. 1:25; 16:27; 1 Ped. 4:11). Lívro de Apocalipsis omombeʼu umi ánhel yvágape omombaʼeguasuha Jehovápe heʼívo: “¡Taupéicha! ¡Pemombaʼeguasúke Jehovápe!” (Apoc. 19:1, 4). Umi kristiáno ypykue heʼími vaʼekue “amén” oñeñemboʼe rire umi rreuniónpe (1 Cor. 14:16). Upéicharõ jepe, pe palávra “amén” ndahaʼéi vaʼekue peteĩ mbaʼe orrepetínteva hikuái de memória.

MBAʼÉREPA IÑIMPORTANTETE JAʼE “AMÉN”

Ñaanalisa rire umi mbaʼe ojejapo vaʼekue ymave, jahechakuaa mbaʼérepa iñimportánte jaʼe “amén” oñeñemboʼe rire. Jajapo jave péicha káda ke ñañemboʼe, jahechauka ñanesinseroha. Ha jaʼe jave “amén” kirirĩháme jepe ótro oñemboʼéramo en púvliko, jahechauka jaaseptaha la ojeʼe vaʼekue. Jahechamína mbaʼérepa iñimportánte avei jaʼe “amén”.

Péicha jahechauka ñañehaʼãha jaservi porã Jehovápe ha ñañekonsentraha upévare. Jahechaháicha, jaʼe jave “amén” oñeñemboʼe jave jahechauka jaadoraha Ñandejárape, péro ndahaʼéi pe jaʼéva rupivénte la ñamombaʼeguasu vaʼerã chupe, síno avei ñañekomporta lájare upe moméntope. Ñande ningo jaʼese “amén” ñande pyʼaite guive, upévare ñañehaʼã jahechauka rrespéto ha ñañatende la ojeʼévare oñeñemboʼe jave.

Péicha jahechauka ñaimeha unído ñane ermanokuérandi. Ojejapo jave pe orasión en púvliko ñañekonsentra oñondivepa pe ojeʼévare (Hech. 1:14; 12:5). Upéicha rupi, opa rire pe orasión enterovéva jaʼe “amén” ha upéva ñanepytyvõ ñaneunidove hag̃ua. Jaʼéramo “amén” oñehendu hag̃uáicha térã ñande pyʼapýpente jepe, pe rrespuésta ñameʼẽva rupive Jehová orekove motívo ombohovái hag̃ua la jajeruréva oñondivepa.

Péicha ñamombaʼeguasu Jehovápe. Ñandejára ningo ohechakuaa entéro mbaʼe jajapóva hesehápe, tamichĩ jepe raʼe ñandéve g̃uarã (Luc. 21:2, 3). Haʼe ohecha mbaʼérepa jaadora chupe ha mbaʼépa jareko ñande pyʼapýpe. Oiméramo jepe ñahendu pe rreunión por teléfono, ikatu ñaĩ segúro Jehová ohenduha jaʼe jave “amén”. Pe rrespuésta ñameʼẽva rupive ñamombaʼeguasu Ñandejárape enterove umi ermáno ndive.

Jaʼéma haguéicha, jaʼe jave “amén” ikatu hína ñapensa ndahaʼeiha la iñimportantetereíva, péro ndaupeichaiete hína. Pe ensiklopédia bíblica Perspicacia heʼi pe palávra “amén” rupive Ñandejára siervokuéra ohechaukaha “ojeroviaha, ndodudaiha, ha ojehechakuaa avei pe esperánsa guasuete orekóva hikuái ipyʼapýpe”. Upéicha rupi, Jehová oguerohoryeterei hína jaʼe jave “amén” (Sal. 19:14).