Ñamombeʼu Jehová tuichaha
1 Peteĩ ohaivaʼekue Salmo heʼi: “Pepurahéi Jehovápe [...] tapichakuéra peiméva ko yvy tuichakue. Opa tetã rupi pemombeʼu haʼe tuichaha, ha umi mbaʼe porãita ojapovaʼekuégui peñeʼẽ maymávape”. Jajepyʼamongetáramo umi mbaʼe Jehová ojapovaʼekue rehe, umi mbaʼe koʼág̃a ojapóvare, ha umi ojapótava rehe, ñane korasõ ñanemomýi ñamombaʼeguasu hag̃ua chupe (Sal. 96:1, 3).
2 Ñane predikasiónpe. Testigo de Jehovakuérape añoite oñehenói Ñandejára rérare ha ikatu omombaʼe hikuái upe téra opavave rovake ko yvy ape ári (Mal. 1:11). Mbaʼéichapa ndojoguái hikuái umi rrelihión heʼíva ijehe kristianoha omoakãvape, oipeʼáva Ñandejára réra umi traduksión vívlika ojapóvagui! Tekotevẽterei ñamombeʼu Ñandejára réra, pórke umi tapicha oiporuvaʼerã pe téra ha ojeroviavaʼerã hese ojesalva hag̃ua pe jehasa asy guasu oútavagui (Rom. 10:13-15). Ha ndahaʼéi upévante. Oĩ hag̃ua pyʼaguapy ko univérsope, ha ko yvy ape ári, oñemopotĩvaʼerã Ñandejára réra. Oimeraẽ mbaʼe Ñandejára ojapóvape, héra oĩ katuete.
3 ‘Jehová ningo tuicha, ha upévare tuicha oñemombaʼeguasuvaʼerã.’ Péro ikatu hag̃uáicha tapichakuéra ‘omeʼẽ Jehovápe pe glória hérape operteneséva’, oikuaavaʼerã pe añeteguáva Ichugui (Sal. 96:4, 8). Oĩ katu umi heʼíva ndaiporiha voi Ñandejára (Sal. 14:1). Oĩ avei umi oñeʼẽ vaíva hese, heʼíva ndoguerekoiha podér, térã ndojepyʼapyiha umi mbaʼe yvyporakuéra ohasávare. Ñaipytyvõvo umi ipyʼaporãvape oikuaa hag̃ua ñande Apoharépe, oikuaa hag̃ua umi mbaʼe ojapótava ha mbaʼeichaguápa haʼe, ñamombaʼeguasuñaína Jehovápe.
4 Ñane rembiapokuéra rupive. Jajapóramo opa mbaʼe Jehová oipotaháicha, ñamomorãñaína ichupe. Ñandereko porãramo, ñande rapichakuéra katuete ohechakuaa (1 Ped. 2:12). Pór ehémplo, ojekuaáramo ñanderehe ñanepotĩ ha ñañemonde porãha, oĩ umi oñeʼẽ porãtava ñanderehe. Umívape ikatu jahechauka mbaʼéichapa ojapo porã ñanderehe jaikóramo Ñandejára Ñeʼẽme heʼiháicha (1 Tim. 2:9, 10). Ajépa javyʼa oĩramo umi ‘ohecháva ñane rembiapo porã, ha upévare omombaʼeguasúva ñande Ru yvagapeguápe’ (Mat. 5:16).
5 Ñañehaʼãkena ñamombaʼeguasu káda día Ñandejárape ñane ñeʼẽ ha ñane rembiapo rupive, ha upéicha ñahendu pe salmístape, vyʼápe heʼivaʼekue: “Pepurahéi Jehovápe, héra pemombaʼe. Opa árape pemombeʼu pe marandu porã, ouha ichugui pe salvasión” (Sal. 96:2).