Jahechauka jajepyʼapyha ñande rapicháre: Ñañatendekuaa rupive
1 Umi ohechakuaavéva mbaʼépa oikotevẽ yvyporakuéra ha oipytyvõ porãvéva chupekuéra haʼe Ñandejára Jehová ha Jesucristo (2 Cró. 16:9; Mar. 6:34). Ñande jahechakuaáramo mbaʼépa pe oikuaaséva térã umi mbaʼe oipyʼapýva ñande rapichápe, ikatúta jaiporu umi mbaʼe ñañeʼẽ hag̃ua chupekuéra pe marandu porãgui.
2 Ñañatende jahechakuaa hag̃ua umi mbaʼe. Jesús oñatendekuaavaʼekue (Mar. 12:41-43; Luc. 19:1-6). Upéicha avei, ñag̃uahẽvo peteĩ ógape jahecháramo umi mbaʼe ohechaukáva pe tapicha irrelihiosoha, térã umi mbaʼe ombojáva imbaʼyruguatáre, térã oĩramo mitã hugéte pe korapýpe, ikatu jaiporu umi mbaʼe ñañemongeta porãve hag̃ua pe óga jára ndive pe marandu porãgui.
3 Ñamaʼẽramo pe ñande rapicha rováre, térã umi mbaʼe ojapóvare, ikatu jahechakuaa mbaʼépa oñandu (Pro. 15:13). Ikatu omanoramo peteĩ hapicha ohayhuvaʼekue, térã ikatu ohasa asy hína ha oikotevẽ peteĩ omokyreʼỹvaʼerã chupe. Ikatu ojapo porã hese jaleéramo umi téysto vívliko oipytyvõtava chupe (Pro. 16:24). Jahechápa pe óga jára osẽ pyaʼeha hína, térã oguerekoha peteĩ mitã hasẽva ijyva ári? Upéicharõ ikatúnte ñaporandu chupe arakaʼépa ikatu jaju jey. Jahechakuaáramo ha ‘ñañandúramo hendive pe oñandúva’, ikatu pe tapicha ñanerenduse ñag̃uahẽ jey vove (1 Ped. 3:8).
4 Ñañeʼẽ pe oñekotevẽháicha. Pe apóstol Pablo oĩ aja Aténaspe ohecha peteĩ altár ojejapovaʼekue ‘Peteĩ Dios Avave Ndoikuaáivape’. Haʼe oiporu upéva oñeʼẽ hag̃ua chupekuéra, ha heʼi: “Upévare, upe peadoráva peikuaaʼỹre mávapa, upévagui añeʼẽse peẽme”. Pablo oñeʼẽkuaágui oñekotevẽháicha, oĩ umi ohenduvaʼekue pe marandu Rréino rehegua ha oiko chuguikuéra kristiáno (Hech. 17:23, 34).
5 Upéicha avei, ñande ñañatendekuaáramo ikatúta jahechakuaa mbaʼépa oikuaase peteĩ tapicha ha ikatúta jaiporu upéva ñañeʼẽ hag̃ua. Eiporu umi porandu ikatútava omomýi pe óga járape heʼi hag̃ua pe oñandúva. Ehecha mbaʼe téysto vívlikopa ikatu reiporu oipytyvõtava chupe oikuaaseve hag̃ua (Pro. 20:5). Ñañatendekuaáramo ha jajepyʼapy añetéramo ñande rapichakuérare ñandekatupyryvéta ñañeʼẽ hag̃ua chupekuéra pe marandu porãgui.