Asambléa de Distríto 2006 “Koʼẽrõitéma ñanesãsóta” ojapóva Testigos de Jehová
1. Mbaʼéichapa Ñandejára siervokuéra yma guare ohechauka omombaʼeha pe adorasión añeteguáva, ha mbaʼépa ikatu ñande avei jajapo koʼág̃a?
1 Pe rréi Ezequías, oisãmbyhyvaʼekue Judéape, oiporu umi kuimbaʼe ogueraháva kárta oinvita hag̃ua umi isrraelítape peteĩ asamblearã Jerusalénpe (2 Cró. 30:6, 13). Pe ojapóva hikuái og̃uahẽ rire chupekuéra pe invitasión ohechauka mbaʼépa oñandu hikuái pe adorasión añeteguávare (2 Cró. 30:10-12). Koʼẽrõitéma Jehová siervokuéra koʼag̃agua ikatúta avei ohechauka mbaʼéichapa omombaʼe ipyʼaite guive umi asambléa ojejapóva ojeadora hag̃ua Jehovápe. Ojeguerahauka avei peteĩ kárta kongregasionkuérape oñemombeʼu hag̃ua oĩtaha pe Asambléa de Distríto “Koʼẽrõitéma ñanesãsóta”, ha ñande ñañeinvita avei. Ndépa mbaʼe rejapóta og̃uahẽ rire ndéve pe invitasión?
2. Mbaʼépa ikatu jajapo koʼág̃a jaaprovechapaite hag̃ua pe asambléa?
2 Jajepreparavaʼerã koʼág̃a. Ikatu hag̃uáicha jaaprovechapaite pe prográma mborayhúpe ojepreparavahína ñanembaʼerã, tekotevẽ ñaime upépe ñahendupaite hag̃ua pe oñemeʼẽtava. Tekotevẽ ñañepyrũma jahecha mbaʼépa jajapovaʼerã ikatu hag̃uáicha ñaime ñande rogayguakuéra ndive umi tres día pe asambleahápe (Pro. 21:5). Tekotevẽtaramo, reñeʼẽmavaʼerã ne patrónpe rejerure hag̃ua permíso. Ikatúma reñemongeta ne ména térã ne rembireko ndive, ndahaʼéiramo Testigo, ha ikatúma avei reipytyvõ ne estudiantekuérape oho hag̃uáicha káda día. Aníkena reheja umi mbaʼe pe asambléa og̃uahẽmbotávo g̃uarãnte. Upéva rangue, reñemboʼemavaʼerã Jehovápe umi mbaʼére, ha rejeroviavaʼerã ‘haʼe nepytyvõtaha’ (Sal. 37:5).
3. Mbaʼérepa iporã jajapo pe ojeʼeháicha ñandéve?
3 Jehová organisasión ojapo ikatúva guive opavavete oguereko hag̃ua peteĩ lugár oke hag̃ua pe asambléa aja. Ñamombaʼéramo umi sakrifísio ojapóva heta ermáno oprepara hag̃ua ko asambléa, ha avei umi ohótavape, ha ñamombaʼéramo Jehová organisasión, ñañehaʼãta jajapo ojeʼehaichaite ñandéve koʼápe (1 Cor. 13:5; 1 Tes. 5:12, 13; Heb. 13:17).
4. Mbaʼéichapa ñanepytyvõ pe ndojejapoveimaha tembiʼu asambleahápe?
4 Tembiʼu. Koʼág̃a saʼivéma oñembaʼapo ojeprepara hag̃ua peteĩ asambléa. Pe áño 1994-pe oñemeʼẽ ypy vaʼekue pe marandu ojeʼehaguépe ndojejapomoʼãveimaha tembiʼu asambleahápe. Ojeʼe káda uno oguerahavaʼerãha hembiʼurã. Pe kámbio tuicha ñanepytyvõ. Koʼág̃a enterove ikatu ñañatende porãve pe prográmare ñañemombareteve hag̃ua espiritualménte (Deu. 31:12). Ikatuve avei ñañemongeta ñane ermanokuéra ndive pe asajekue, ha ñamombeʼu ojupe umi mbaʼe jahasavaʼekue (2 Cor. 6:11-13; Heb. 10:23-25).
5. Mbaʼépa ikatu jagueraha pe asambléape ha mbaʼépa ndovaléi?
5 Jaguerahavaʼerã ñane rembiʼurã, ñasẽrangue okápe jajogua tembiʼu opa rire pe prográma pyharevegua. Ikatu jagueraha tembiʼu ideprovéchotava ñandéve, péro natekotevẽi heta, ha ndahasyivaʼerã jagueroja hag̃ua. Iporãve ndajaguerahái umi enváse vídriogui ojejapóva, ha ndovaléi jagueraha vevída alkoólika. Umi mbaʼyru jagueraháva ndatuichaivaʼerã; ikatuvaʼerã ñamoĩ ñande apyka guýpe. Sapyʼánte oĩ umi okarúva térã hoʼúva vevída pe prográma aja. Ñamombaʼéramo ñane asambléa umíva naiporãi jajapo.
6. Mbaʼépa ikatu jajapo jaguereko hag̃ua ñane rembiʼurã asambleahápe?
6 Iporãvéta ñarambosáramo jaha mboyve asambleahápe. Oĩ umi ermáno ikatúva orambosa hógape, ha oĩ umi ojoguáva irambosag̃ua umi tembiʼu ojejapoha rupi. Umi hóga ag̃uíva pe asambléa ojejapohágui ikatu káda día oprepara ifamíliape g̃uarã tembiʼu asajerã. Oĩ umi ogueraháva hembiʼurã imbaʼapohápe térã eskuélape. Upeichagua tembiʼúnte avei ikatu jagueraha asamblearã.
7, 8. Mbaʼépa ikatu jajapo avei jagueraha hag̃ua pe jaʼuvaʼerã ha mbaʼépepa ikatu ñaipytyvõ?
7 Umi oiko mombyryvéva ojeprepara porãve vaʼerã ogueraha hag̃ua hembiʼurã asambleahápe. Reikotevẽtaramo ikatu regueraha servilléta, váso de plástiko ha tembiporu ne família oiporútava. Oĩ katu hoʼusénteva yva térã verdúra. Oĩ umi ojoguáva hembiʼurã ohokuévo asambleahápe.
8 Jajapóramo koʼápe ojeʼeháicha, ñaipytyvõta ani hag̃ua umi tembiʼu vendeha ijaty pe asambléa jerére. Ndajaikuaái moõguipa ojegueru ni mbaʼéichapa ojejapo umi tembiʼu oñevendéva pe kállepe.
9. a) Mbaʼépa iporã jajapo jaháramo asambleahápe ñane mbaʼyrúpe? b) Mbaʼéichapa ikatu avei ñaipytyvõ?
9 Moõpa ñamoĩvaʼerã ñane mbaʼyruguata. Oĩramo lugár oñemoĩ hag̃ua umi ermanokuéra mbaʼyru, natekotevẽi ojepaga hese, ha og̃uahẽ raẽva ikatu oiporu. Ñane Centro de Convenciones-pe, oĩva Capiatápe, oñemeʼẽ peteĩ tarhéta ojeikekuévo, oñemeʼẽ jeyvaʼerã oñesẽnguévo. Jaike hag̃ua ñane mbaʼyru reheve jaguerekovaʼerã ñande tarhéta asambléa rehegua. Hetaitereíramo umi mbaʼyru, jaharangue ñaneañónte peteĩ mbaʼyrúpe ikatu jaha ótro ndive, ikatu hag̃uáicha ijapa pe korapýpe umi mbaʼyru oĩva. Ñanemanduʼavaʼerã nañamolestaseiha umi vesinokuérape. Upévare iporãve nañamoĩriramo ñane mbaʼyru hogakuéra renondépe. Iporãvente jaiporu pe lugár oĩva upearã. Ñanemanduʼavaʼerã avei ikatuha ñakontrivui ojepaga hag̃ua umi gásto oĩvare. Ikatu ñamoĩ ñane kontrivusión pe asambleahápe térã ñane Salón del Reino-pe, pe káha heʼihápe Obra Mun-dial. Ojeporútaramo cheque, ojejapovaʼerã Asociación Torre de Vigía de B. y T. rérape.
10. Mbaʼépa ikatu jajapo javyʼave hag̃ua pe asambléape?
10 Ñañekuaveʼẽkena ñaipytyvõ hag̃ua asambleahápe. Katuete javyʼa jaháramo pe asambleahápe, ñaaprendégui heta mbaʼe ha jajeheʼágui umi ermanokuéra ndive. Péro javyʼavéta ñañekuaveʼẽramo ñaipytyvõ hag̃ua oñekotevẽhápe, osẽ porã hag̃ua pe asambléa (Hech. 20:35). Pe Comité de asamblea oikuaaukáta ñandéve moõpa ikatu ñaipytyvõ. Ndépa eréta ikatuha? (Sal. 110:3).
11. Mbaʼépa nde reguerohory pe asambléa de distrítogui, ha mbaʼépa ñañehaʼãvaʼerã jajapo katuete?
11 Oĩ aja peteĩ asambléa de distrítope, peteĩ mitãʼi oguerekóva cinco áño heʼi: “Ko asambléa de distríto haʼe pe mbaʼe chegustavéva opa mbaʼégui Jehová servísiope”. Pe heʼivaʼekue ipyʼaite guive ñanepytyvõ jahecha hag̃ua mbaʼeichaitépa javyʼakuaa pe asambléa de distrítope, ojejapóva káda áño. Ñañandu pe salmísta purahéi heʼiháicha: “Iporãve aime peteĩ ára nde korapýpe aimerangue mil ára ótro hendápe” (Sal. 84:10). David heʼi opuraheihápe ‘oikoseha Jehová rógape opaite árape, oikove aja pukukue, omaʼẽ hag̃ua umi mbaʼe porã Jehová ojapóvare, ha hógare torypápe omaʼẽ hag̃ua’ (Sal. 27:4). David ovyʼaiterei oĩhaguére umi Jehovápe oservíva ndive. Ñañehaʼãkena ñande avei ñamombaʼe pe adorasión añeteguáva ha ñaime umi tres día pe Asambléa de Distrítope “Koʼẽrõitéma ñanesãsóta”.
[Rrekuádro oĩva páhina 3-pe]
Prográma
Viernes ha sábado
9:30 Pyhareve - 5:05 Kaʼaru
Domingo
9:30 Pyhareve - 4:10 Kaʼaru