Jahechauka jajepyʼapyha ñande rapicháre: Ñaporandu ha ñahendukuaa rupive
1 Heta tapicha torypápe oñeʼẽta ñandéve pe opensávagui, péro ndoipotái ñaporandueterei chupekuéra mbaʼevére. Upévare ñaporandukuaavaʼerã oimeraẽ mbaʼe japredika jave, ikatu hag̃uáicha pe óga jára oñeʼẽse ñandéve pe opensávagui (Pro. 20:5).
2 Umi mbaʼe ñaporandúva omokyreʼỹvaʼerã ñande rapichápe oñeʼẽse hag̃ua, ndajaipotái ojejopy vai. Opredika jave pe ogaha rupi, peteĩ ermáno oporandu jepi: “Ndépa reimoʼã og̃uahẽne hag̃ua peteĩ tiémpo ojogueraha porã ha ojorrespetatahápe opaichagua tapicha?”. Pe óga jára oñeʼẽ porãramo, pe ermáno heʼi: “Mbaʼéichapa vaicha ndéve ojehupytýta upéva?”, térã “Mbaʼérepa repensa upéicha?”. Opredika jave pe oikoha rupi, ohecháramo peteĩ tapicha oĩva ifamília ndive, peteĩ ermáno oporandu: “Mbaʼépa pe ombovyʼavéva peteĩ túva térã peteĩ sýpe ohechávo ifamiliakuéra?”. Upéi oporandu: “Ha mbaʼépa ndéve ndepyʼapyve?”. Rehechápa mbaʼéicha koʼã mbaʼe oñeporandúva oipytyvõ peteĩ tapichápe oñeʼẽ hag̃ua ojejopy vaiʼỹre. Opaichagua situasión ikatu jatopa. Upévare ñañeʼẽvaʼerã oñekotevẽháicha, ha pe território ñambaʼapóvape hoʼa porã vaʼerã umi mbaʼe ñaporandúva ha pe ñaporanduháicha.
3 Ñaipytyvõ ñande rapichápe heʼi hag̃ua pe opensáva. Peteĩ tapicha oñeʼẽ jave pe opensávagui, ñañehaʼãvaʼerã ñahendu porã ha ani ñañeʼẽjokótei (Sant. 1:19). Upéi jaagradesevaʼerã pe heʼívare (Col. 4:6). Ikatu ere: “Iñinteresánte pe eréva ha avyʼa remombeʼuhaguére chéve pe repensáva”. Ikatúma guive reguerohoryvaʼerã pe heʼíva. Torýpe ikatu reporanduve chupe umi mbaʼe nepytyvõtava reikuaa hag̃ua pe opensáva ha mbaʼérepa oñeñandu upéicha. Eñehaʼã etopa mbaʼépepa pepensa joja. Rehechauka hag̃ua peteĩ téysto vívliko, ikatu ere: “Ndépa repensámava ikatuha oiko ko heʼíva koʼápe?”. Eheja chupe toñeʼẽ ha tohecha nderehe nderediskutiseiha hendive (2 Tim. 2:24, 25).
4 Ñahendukuaáramo, ñande rapicha oñeʼẽsevéta ñandéve ñaporandu jey vove chupe umi mbaʼe jaikuaasévagui. Ha ñahendúramo ñande pyʼaite guive, haʼekuéra ohechakuaáta upéva ñanderehe. Peteĩ superintendénte heʼi: “Ñanepasiénsiaramo ñahendu hag̃ua ñande rapichakuérape, ovyʼave hikuái ñanendive, ha jahechauka ñañeinteresaha hesekuéra ñande pyʼaite guive”. Ñahendukuaáramo, ñamombaʼe ñande rapichápe, ha upéva ikatu oipytyvõ chupekuéra ohenduse hag̃ua pe marandu porã ñamombeʼuséva (Rom. 12:10).