Ñamokyreʼỹ ñande rapichápe ohechakuaa hag̃ua pe ‘ohesapéva yvyporakuérape’
1. Mbaʼépa ohesape tuicha vaʼerã, heʼihaguéicha Ñandejára Ñeʼẽ, ha arakaʼépa ojehecha porãta oĩha pe ohesapéva?
1 Pe proféta Isaías rupive, Jehová heʼi: “Tetãgua oikóva pytũmbýpe, ohecha peteĩ mbaʼerendy tuicháva; umi pytũmbýpe oikóva ári ohesape upe mbaʼerendy” (Isa. 9:1 [9:2, NM]). Pe “mbaʼerendy tuicháva” ojekuaa umi mbaʼe Ñandejára Raʼy, Jesucristo ojapovaʼekuére. Pe predikasión ojapovaʼekue oĩ aja ko Yvy ape ári ha umi mbaʼe porã ojehupytyvaʼekue isakrifísio rupive oipytyvõ hetápe osẽ hag̃ua pe pytũmby espirituálgui. Koʼág̃a avei ‘iñypytũeterei’ ha upévare heta tapicha oikotevẽ pe ohesapeʼavaʼerã chupekuéra. Pe Conmemoración rupive ikatúta ñambaʼapove jahechauka hag̃ua ñande rapichakuérape oĩha pe ‘yvypórape ohesapéva’ (Juan 8:12). Pe áño ohasavaʼekuépe hetaiterei ojeroviáva Ñandejárare ñanemoirũ pe Conmemoracionhápe jajapo hag̃ua pe Jesús heʼivaʼekue: “Pejapo kóva penemanduʼávo cherehe” (Luc. 22:19). Oñemoag̃uívo pe Conmemoración, mbaʼépa ikatu jajapo jahechauka hag̃ua ñande rapichakuérape oĩha pe ‘mbaʼerendy tuicháva’, Ñandejára omoĩvaʼekue ohesape hag̃ua? (Fili. 2:15.)
2. Mbaʼéichapa ikatu jaguerohoryve ñande pyʼaite guive pe sakrifísio Ñandejára ojapovaʼekue ñandepeʼa hag̃ua pe pekádogui, ha mbaʼéichapa upéva ñanepytyvõ?
2 Ñamombaʼeve pe Conmemoración. Pe Conmemoración oñemoag̃uívo jajapo porãta jajepyʼamongetáramo pe mborayhu Jehová ha Jesús ohechaukavaʼekuére, ojapóvo hikuái pe sakrifísio ñandepeʼa hag̃ua pe pekádogui (Juan 3:16; 2 Cor. 5:14, 15). Upéicha jajapóramo katuete jaguerohoryvéta ñande pyʼaite guive upe rreunión. Opavave ñañehaʼãvaʼerã jalee Ñandejára Ñeʼẽme umi kapítulo Conmemoración rehegua ohechaukaháicha ñande folléto Examinando las Escrituras diariamente, ha jajepyʼamongetavaʼerã umi mbaʼére. Ajépa javyʼaite jaservihaguére Ñandejára Jehovápe jahechávo mbaʼeichaitépa imbaʼe porã ñanendive ojapóvo pe sakrifísio ñandepeʼa hag̃ua pe pekádogui. Jajepyʼamongetáramo jahecha hag̃ua mbaʼépa heʼise pe sakrifísio ñandéve g̃uarã, jahayhuvéta Jehová ha itaʼýra Jesucrístope, ha ñanekyreʼỹvéta jajapo hag̃ua ikatuha peve pe Ñandejára oipotáva (Gál. 2:20).
3. Mbaʼéichapa ikatu jahechauka jaguerohoryha pe Conmemoración?
3 Ñamombaʼevéramo pe Jehová ojapovaʼekue ñanderehehápe ñandesalva hag̃ua ñanekyreʼỹta ñañeʼẽ hag̃ua pe Conmemoracióngui ñane estudiántepe, ñande rrevisíta, ñane hentekuéra, ñane vesíno, ñane irũnguéra eskuélape, ñande travahohápe ha opavave ñainvitasévape (Luc. 6:45). Upévare, ñañehaʼãkena ñainvita chupekuéra, ha ñameʼẽ avei pe kuatia oĩháme pe invitasión ikatútava omomanduʼa chupekuéra ou hag̃ua. Ani hag̃ua hesarái ni peteĩgui, oĩ heta puvlikadór omoĩva peteĩ lístape umi oinvitáva jepi, ha káda áño omoĩva pe lístape umi oinvita pyahuséva. Jajeprepara porãramo, ha ñañehaʼãmbaitéramo ñainvita hag̃ua opavavépe jahechaukáta jaguerohoryha pe Ñandejára omeʼẽvaʼekue ñanderehehápe, ‘hetavéva pe ikatúvagui ñamombeʼu’ (2 Cor. 9:15).
4. Mbaʼépa ñanepytyvõta ñasẽve hag̃ua japredika marzo ha abrílpe?
4 Ñasẽve japredika. Ikatútapa resẽve repredika marzo ha abrílpe? Ñañehaʼãramo ñañeʼẽ ñande rapichakuérape ‘Cristo [...] marandu porã hendy jajaipávagui’, Ñandejára katuete ñanevendesíta. Jehovágui osẽ pe ohesapéva jaikuaave hag̃ua ichugui, ha haʼe heʼi ‘pe tesapehára ohesapevaʼerãha pe pytũmbýpe’ (2 Cor. 4:4-6). Umi ansiáno ojapovaʼerã oñekotevẽva oñesẽve hag̃ua ojepredika ha oĩramo umi osẽsevéva haʼekuéra oñehaʼãvaʼerã oipytyvõ chupekuéra. Ou porãtaramo ikatu ojepredika kállepe ha negosioha rupi. Ikatu hag̃uáicha resẽve repredika, reikuaavaʼerã mboy órapa resẽse pe méspe, pe ikatútava rehupyty, ha reñehaʼãvaʼerã rehupyty upéva. Omeʼẽségui Jehovápe ikatúva guive, oĩ heta ojapóva pe precursorado auxiliar (Col. 3:23, 24).
5. Mbaʼéichapa hetápe ou porã oguejy rire pe óra ojapovaʼerã umi precursor auxiliar?
5 Ikatúpa oiko ndehegui peteĩ precursor auxiliar? Ojapóma siete áño rasami oñemboguejyhague pe óra ohupytyvaʼerã umi precursor auxiliar. Upéva ojejapo rire hetaitevégui oiko precursor auxiliar, ha ohupyty hikuái heta mbaʼe porã. Ndépa reñehaʼãma avei rejapo pe precursorado auxiliar? Oĩ umi ojapóva katuete káda áño. Heta kongregasiónpe oĩ umi sapyʼapyʼa ombaʼapóva upéicha oñondivepa, ha upéva haʼe chupekuéra peteĩ més espesiál pe áñope. Ikatúnepa ndehegui avei oiko peteĩ precursor auxiliar, koʼág̃a og̃uahẽmbotávo pe Conmemoración? Hetápe ou porãta abril, oguerekógui cinco sábado ha domingo.
6. Mbaʼe mbaʼe iporãitereívapa oĩ jaaprovecha hag̃ua?
6 Oútapa ne kongregasiónpe superintendénte de sirkuíto marzo térã abrílpe? Upéicharamo ikatu oĩve ndéve peteĩ mbaʼe iporãva. Ojeʼemahaguéicha, ko áño de servísio 2006-pe, umi precursor auxiliar ikatúta oĩ avei pe rreunión superintendénte de sirkuíto ojapóvape prekursorkuérape g̃uarã. Ikatúta oĩ hikuái pe primera pártepe. Pe informasión upépe oñemeʼẽva ha omombaretéva ñande jerovia ikatu oipytyvõ heta precursor auxiliárpe ojapose hag̃ua precursorado regular. Avei, márzope ikatúta ñaipytyvõ heta tapichápe ojehesapeʼa hag̃ua jastudiáramo hendivekuéra pe lívro pyahu Mbaʼépa añetehápe omboʼe la Biblia? Reiporútapa nde avei ko lívro pyahu remoñepyrũ hag̃ua estúdio vívliko?
7, 8. a) Mbaʼépa ñanepytyvõta ikatu hag̃ua jajapo pe precursorado auxiliar? b) Mbaʼéichapa peteĩ famíliape opavave ikatu oñopytyvõ, ha mbaʼéichapa ikatu upéva ojapo porã enterovére?
7 Rejepyʼamongeta aja rehecha hag̃ua rehupytýtapa pe 50 óra ojapóva peteĩ precursor auxiliar, eñehaʼã ehecha mbaʼéichapa reiporúta 12 óra káda semána eheja hag̃ua ohesape Ñandejára Ñeʼẽ. Oĩramo umi ojapomavaʼekue pe precursorado auxiliar, ha osẽ porã vaʼekue, eñemongeta hendivekuéra, ha ótro ermanokuéra ndive avei. Upéva ikatu omokyreʼỹ chupekuéra ha nemoirũ oiko hag̃ua chuguikuéra avei precursor auxiliar. Heta puvlikadór omohenda porãva hembiapokuéra, imitãva ha ijedáva, otopa ndahasyiha. Eñemboʼékena upéva rehupyty hag̃ua. Ha upéi, ikatútaramo, ejeprepara ha toiko vyʼápe ndehegui peteĩ precursor auxiliar (Mal. 3:10).
8 Oĩ heta família ombaʼapóva oñondivepa ikatu hag̃uáicha peteĩ jepe ojapo precursorado auxiliar. Peteĩ famíliape oĩ cinco puvlikadór ojevautisáva, ha peteĩ jevy enterovete ojapo precursorado auxiliar. Mokõi mitãʼi upe famíliape, neʼĩrava ojevautisa, oñehaʼã avei opredika hetave hendivekuéra. Mbaʼéichapa oipytyvõ upéva pe famíliape? Haʼekuéra heʼi: “Hetaiterei rovyʼa, ha enterove rohechakuaa rojogueraha porãveha ore rogapýpe. Roagradeseterei Jehovápe orevendesihaguére upeichaite”.
9. Mbaʼéichapa ikatu jahesape pe Conmemoración og̃uahẽ aja?
9 Ajépa ñanemokyreʼỹta pe predikasión jajapótava marzo ha abrílpe, ha ñanemoag̃uivéta ñande Ru yvagapeguáre. Ñañehaʼãramo enterove ñamombareteve ñane mborayhu Ñandejára ha Itaʼýrare, ha ñasẽvéramo japredika, ikatúta jahupyty umi mbaʼe. Jajapókena ñande avei pe salmísta opuraheihaguéicha: “Sapukái sorópe amombaʼeguasúta Ñandejárape, maymáva apytépe chupe aropurahéita” (Sal. 109:30). Jehová ovendesíta pe predikasión kyreʼỹme jajapóva og̃uahẽ aja pe Conmemoración. Upévare, ñañehaʼãkena tuicha jahesape ikatu hag̃uáicha hetaiteve osẽ pe pytũmbýgui ha ohupyty “pe tesape oporomoingovéva” (Juan 8:12).