Ñaipytyvõ umi imánsovape oguata hag̃ua Ñandejára rapére
1. Mbaʼe mbaʼépa ñamboʼevaʼerã jajapótaramo peteĩ disípulo?
1 Pe primer síglope, umi kristiánore ojeʼevaʼekue oikoha pe ‘Tape Pyahúre’ (Hech. 9:2). Ojekuaavaʼerã opaite ñane rembiapópe ñande kristiáno añeteha (Pro. 3:5, 6). Upévare, jajapóvo peteĩ estúdio vívliko ñamboʼevaʼerã umi mbaʼe añetegua oĩva Ñandejára Ñeʼẽme, péro ndahaʼéi upéva añónte. Ñaipytyvõvaʼerã avei ñane estudiántepe oguata hag̃ua Jehová rapére (Sal. 25:8, 9).
2. Mbaʼépa ikatu omomýi peteĩ estudiántepe ojapo hag̃ua Ñandejára ojeruréva?
2 Ohayhuvaʼerã Jehová ha Jesucrístope. Ajépa heta ombaʼapovaʼerã peteĩ tapicha imperfékto oĩ porã hag̃ua pe opensáva, ilája, iñeʼẽ ha hembiapokuéra Ñandejára oipotaháicha! (Rom. 7:21-23; Efe. 4:22-24.) Upéicharamo jepe, pe tapicha imánsova ohayhu Jehová ha itaʼýra Jesucrístope, ha upéva omomýi chupe oñehaʼã hag̃ua ohupyty umi mbaʼe (Juan 14:15; 1 Juan 5:3). Ha mbaʼéichapa ikatu ñaipytyvõ ñane estudiántepe omombarete hag̃ua koichagua mborayhu?
3. Mbaʼéichapa ikatu ñaipytyvõ ñane estudiántepe ohayhuve hag̃ua Jehová ha Jesucrístope?
3 Eipytyvõ ne estudiántepe oikuaa hag̃ua mbaʼeichaguápa Jehová. Peteĩ ermáno heʼi: “Peteĩ tapicha ndaikatúi ohayhu peteĩ oikuaaʼỹvape. Upévare, amoñepyrũvo peteĩ estúdio ahechaukáma chupe la Bíbliagui mbaʼéichapa héra Ñandejára, ha ija vove ahechauka chupe mbaʼeichaguápa Haʼe”. Ñaipytyvõ ñane estudiántepe jahechauka meméramo chupe pe ehémplo Jesús ohejavaʼekue (Juan 1:14; 14:9). Pe lívro Mbaʼépa omboʼe la Biblia? oguereko opakuévo káda kapítulo umi porandu ojeporúva rrepasorã. Eiporu umíva avei reipytyvõ hag̃ua ne estudiántepe ojepyʼamongeta hag̃ua Ñandejára ha Itaʼýra Jesucrístore, oikuaavévo mbaʼeichaguápa haʼekuéra.
4. a) Mbaʼérepa heta estudiántepe hasy osẽ hag̃ua opredika? b) Mbaʼéichapa ikatu ñaipytyvõ ñane estudiántepe oñepyrũ hag̃ua osẽ predikasionhápe?
4 Emboʼe ne ehémplo rupive. Peteĩ kristiáno omboʼe ha ohechauka pe ojejapovaʼerã. Upévare umi mbaʼe jajapóvare jahechaukavaʼerã mbaʼéichapa ojeguata Ñandejára rapére (1 Cor. 11:1). Pór ehémplo, oĩ heta estudiánte ndojepokuaáiva oñeʼẽ hapichakuéra oikuaaʼỹvape, oñemongeta hag̃uáicha pe ogueroviávagui. Umíva ndive ñanepasiénsia ha ñandekatupyryvaʼerã ñaipytyvõ hag̃ua chupekuéra omombareteve hag̃ua imborayhu ha ijerovia, ipyʼaguasu hag̃uáicha opredika ha ojapo hag̃ua disípulo (2 Cor. 4:13; 1 Tes. 2:2). Ñaipytyvõségui ñane estudiántepe ñaiméta ijykére oñepyrũvo osẽ predikasionhápe.
5. Mbaʼéichapa pe ehémplo remoĩva ikatu ohechauka ne estudiántepe mbaʼéichapa jajapovaʼerã pe Ñandejára ojeruréva?
5 Ne ehémplo rupive ikatu remboʼe ne estudiántepe oñakãrapuʼãve hag̃ua peteĩ kristiánoicha. Reho jave reñandu umi hasývape, térã torýpe remomaitei jave umi ermánope rreunionhápe, ohecha mbaʼéichapa japorohayhuvaʼerã (Juan 15:12). Remopotĩvo ermanokuéra ndive pe Salón del Reino térã reipytyvõ jave oikotevẽvape, remboʼereína mbaʼéichapa japoroservi (Juan 13:12-15). Javyʼáramo pe jaguerekomívare ohecha hikuái mbaʼéichapa ‘ñamotenonde Ñandejára Rréino’ (Mat. 6:33).
6. Mbaʼépa ikatu jahecha ñaipytyvõramo ñande rapichápe oservi hag̃ua Jehovápe?
6 Heta ñañehaʼãvaʼerã ñamboʼe hag̃ua ñande rapichápe Ñandejára Ñeʼẽ ha jajapo hag̃ua disípulo. Péro ajépa javyʼa jahechávo umi imánsova ‘oiko pe añeteguápe’! (3 Juan 4.)