Mbaʼépa remotenonde nde rekovépe?
1 Mbaʼépa nde eréne? Katuete ningo enterovénte ñamoĩse Ñandejára Rréino tenonderã (Mat. 6:33). Péro mbaʼépa ohechauka umi mbaʼe jajapóva? “Pejepyʼamongetána pendejupe”, heʼi Ñandejára Ñeʼẽ (2 Cor. 13:5, BNP). Mbaʼéichapa ikatu jaikuaa porã ñamotenondehañaína Ñandejára Rréino?
2 Mbaʼéichapa jaiporu ñane tiémpo. Ikatu jahecha raẽ mbaʼépepa jaiporuñaína ñane tiémpo (Efe. 5:15, 16). Mboy tiémpopa jaiporu ñaime hag̃ua ñande rapichakuéra ndive, jaha hag̃ua umi vyʼaha rupi, jahecha hag̃ua televisión térã jaiporu hag̃ua Internét? Jaipapáramo mboy tiémpopa jaiporu umi mbaʼépe, ha ñambojojáramo upéva pe tiémpo jaiporúvare Ñandejára servísiope, ikatu ñañemondýi. Ñamboyképa Ñandejára servísio ikatu hag̃uáicha ñambaʼapove japaga hag̃ua umi mbaʼe nañaikotevẽivare? Mboy vésepa ndajahái rreunionhápe térã predikasionhápe jahágui jajepasea sábado ha domingo?
3 Umi mbaʼe ñamotenondéva. Haimete opavave ndaikatúi ojapopa umi mbaʼe ojaposéva. Upévare, ñamotenonde hag̃ua Ñandejára Rréino, jahechavaʼerã mbaʼépa iñimportanteve ñandéve g̃uarã, ha ñameʼẽ tiémpo ‘pe iporãvévape’ (Fili. 1:10). Jastudiavaʼerã Ñandejára Ñeʼẽ, ñasẽvaʼerã japredika, ñañangarekovaʼerã ñande rogayguakuérare ha jahavaʼerã rreunionhápe (Sal. 1:1, 2; Rom. 10:13, 14; 1 Tim. 5:8; Heb. 10:24, 25). Iporã avei jajapomimi ehersísio, ha ñasẽ jepi javyʼa hag̃ua (Mar. 6:31; 1 Tim. 4:8). Péro koʼã mbaʼe naiñimportanteguasúi, ha ñañatendevaʼerã ani hag̃ua ñamotenonde.
4 Peteĩ mitãrusu, ohekarangue umi estúdio ijyvatevéva ombaʼapo porã hag̃ua, ohechauka omotenondeha Ñandejára Rréino ojapo rupi prekursorádo. Ostudia ótro idióma ha ova oñekotevẽhápe. Ko mitãrusu heʼi: “Avyʼaitereive ajapóvo koʼã mbaʼe. Haʼete voi ningo ku ñandepiroʼy asýva ñasẽ jave japredika. Hiʼãite chéve opavave mitãrusu ojapo ko che ajapóva ovyʼa hag̃ua avei hikuái. Jaiporuvaʼerã opa mbaʼe jaguerekóva jaservi hag̃ua Jehovápe. Ndaipóri iporãvéva upévagui.” Ñamotenondéramo Ñandejára Rréino jahupytýta heta mbaʼe porã ha ñambovyʼáta Jehovápe, ñande Ru yvagapegua, ha upévagui ndaipóri iñimportantevéva (Heb. 6:10).