Ñandepyʼaguasúramo jepe, ñandepyʼaguapy avei
1 Japredika jave heta oĩ oñeʼẽva ñandéve umi mbaʼe ogueroviávare, péro noĩporãiva Ñandejára Ñeʼẽndi. Ñande katu ñandepyʼaguasuvaʼerã japredika jave, péro avei jaikose “pyʼaguapýpe opavave ndive” ha ñañehaʼã ani hag̃ua ñambopochy rei avavépe (Rom. 12:18; Hech. 4:29). Mbaʼéichapa ikatu ñandepyʼaguasu ha avei ñandepyʼaguapy ñamog̃uahẽ jave pe marandu Rréino rehegua ñande rapichakuérape?
2 Jaheka mbaʼépepa ñapensa joja. Ipyʼaguapýva oñehaʼã ani hag̃ua oiko vai hapicha ndive. Hasyvéta pe óga jára ñanerendu hag̃ua jaʼéramo voi chupekuéra noĩporãiha umi mbaʼe ogueroviáva. Upévare, oĩramo heʼíva ñandéve mbaʼépa oguerovia ha noĩporãiramo pe heʼíva, jahekáta ñañeʼẽ umi mbaʼe mokõivéva jagueroviávare. Jajapóramo upéicha, ndahasyivéta ñañemongeta hag̃ua hendivekuéra ha ñaguahẽvéta ikorasõmekuéra.
3 Pe óga jára heʼíramo ñandéve oroviaha peteĩ mbaʼe noĩporãiva, ha ndajaʼéiramo mbaʼeve, nañañemoĩri piko ñande avei upéicharamo Ñandejára Ñeʼẽre, térã noimoʼãichénepa hikuái la Biblia omboʼeha upéicha avei? Nahániri. Ñande nañaiméi ñambohovái hag̃ua opa mbaʼe oñepensa vaíva. Ñaime japredika hag̃ua pe marandu porã Ñandejára Rréino rehegua (Mat. 24:14). Ojeʼéramo peteĩ mbaʼe noĩporãiva, ñandepochyrangue, jaiporuvaʼerã upéva jaikuaave hag̃ua pe óga jára opensáva (Pro. 16:23).
4 Ñamombaʼe ñande rapichápe. Sapyʼánte ñandepyʼaguasuvaʼerã ha jaʼevaʼerã mbaʼeichaitépa oĩ Ñandejára Ñeʼẽme. Upéicharõ jepe, nañañembohorymoʼãi umi ojavývare, ni umi omboʼe vaívare. Ha ndajaʼemoʼãi avei mbaʼeve ombopochýtava chupekuéra. Ohecháramo hikuái jajejapoha ndaikatumoʼãi ñañemongeta porã. Ñaneumílde ha ñandepyʼaporãramo katu umi ohayhúva pe añeteguáva ñanerendusevéta. Ñamombaʼéramo pe ogueroviáva, ñamombaʼeñaína pe óga járape. Upéva ikatu oipytyvõ chupe oguerohoryve hag̃ua pe marandu jagueraháva.
5 Pablo nomboykéi umi hapichakuéra ogueroviáva. Oheka uvei mbaʼéichapa oñeʼẽta og̃uahẽ hag̃uáicha hapichakuéra korasõme (Hech. 17:22-31). Kyreʼỹme ‘oiko opavave oikoháicha, ikatu hag̃uáicha osalva mbovymímente jepe’ (1 Cor. 9:22). Ñande ikatu avei jajapo haʼe ojapohaguéicha. Ñandepyʼaguasúramo jepe, ñandepyʼaguapyvaʼerã avei japredika jave pe marandu porã.