Ojepreparapahína ne família ojesalva hag̃ua?
1 Umi profesía oñekumplímava ohechauka koʼẽrõitéma oñehunditaha ko múndo aña. Pe Diluvio mboyve ijetuʼuetereivaʼekue opa mbaʼe ha koʼág̃a upeichaiténte avei (Mat. 24:37-39). Noé ningo ‘hembiapo porã opa mbaʼépe ha ojapo Ñandejára rembipota’. Upéva rupi ojesalva oñehundírõ guare umi hénte itiémpope guare (Gén. 6:9). Oiméne omboʼerakaʼe avei upéva ifamíliape, ajeve enterove ojesalva. Mbaʼéichapa ikatu jajapo Noé ojapo haguéicha? Ha mbaʼéichapa ikatu jajeprepara ñane família ndive jajesalva hag̃ua oñehundíta vove ko múndo aña?
2 Oñeʼẽ tekojoja rehe. Noé ningo akóinte oñeʼẽvaʼekue tekojoja rehe, cuarenta térã cincuenta áño rupi (2 Ped. 2:5). Oĩramo jepe ivesinokuéra noĩriva umi demónio poguýpe, oñembohorýnte avei hese opredika haguére. Koʼág̃a rupi avei hetaiterei oĩ nañanerenduséiva ha oñembohorýva ñane predikasiónre. Upéva ohechauka ko múndo aña oñehundipotamaha (2 Ped. 3:3, 4). Péro, koʼág̃a rupi heta oĩ oserviséva Ñandejárape, ndahaʼéi Noé tiémpope guaréicha. Upéicha ningo ñañehaʼã rupi ñaipytyvõ ñande rapichakuérape (Isa. 2:2). Upévare jasegivaʼerã japredika jajesalva hag̃ua ñande ha umi ñanerendúva avei (1 Tim. 4:16). Ha peẽ tuvakuéra pemboʼékena pende raʼykuérape tekotevẽtereiha japredika, tahaʼe jaʼéva térã jajapóva rupive. Upéicharõ ikatúta jasalva ñande rapichakuérape (2 Tim. 4:2).
3 ‘Ojapo opa mbaʼe Ñandejára heʼi hagueichaite.’ Noé ha ifamília ojesalva hag̃ua ojapovaʼerã opa mbaʼe Jehová heʼihaichaite (Gén. 6:22). Ñande avei ñaneñeʼẽrenduvaʼerã opa mbaʼe heʼívape la Biblia ha pe tembiguái jeroviaha ha iñarandúvape (Sant. 3:17). Peteĩ famíliape okakuaapáma hikuái ha imanduʼa gueteri mbaʼéichapa ituvakuéra ojapómi Jehová organisasión heʼiháicha. Pór ehémplo, ostudia ifamília ndive káda semána ha osẽ opredika hendivekuéra káda fín de semána. Oñehaʼã opredika enterove itaʼyrakuéra ndive. Akóintemi haʼe oñehaʼã ‘ojapo Ñandejára heʼihaichaite. Ha upéva tuichaiterei oipytyvõ umi seis ifamíliape. Enterove voi oservihína Jehovápe ipyʼaite guive.
4 Ko múndo ningo oñehundíta oñehaʼarõʼỹve jave (Luc. 12:40). Péro jajeroviavaʼerã Ñandejárare Noé ojapo haguéicha. Upéicharõmante jajepreparáta ñane família ndive jajesalva hag̃ua (Heb. 11:7).