Umi mbaʼe jaikuaaséva
◼ Mbaʼe mbaʼe rehépa oñeʼẽvaʼerã ansianokuérandi umi omendátava oiporuséramo Salón del Reino?
Peteĩ kasamiénto ojejapóramo Jehovápe ogustaháicha, oñemombaʼehína chupe, koʼýte ojejapóramo Salón del Réinope. Upéicha avei umi vesíno ohechakuaa mbaʼeichaguápa ñande Testigos de Jehová. Upévare umi ansiáno ohechavaʼerã ojejapo hag̃ua opa mbaʼe “hekopete ha hendaitépe” (1 Cor. 14:40, ÑÑB).
Umi omendátavare ojehechavaʼerã hekopotĩha ha oikoha Jehová oipotahaichaite. Avei voi porã reheve, haʼekuéra ohaimavaʼerã comité de servicio-pe peteĩ kárta heʼihápe oiporuseha hikuái Salón del Reino. Pe kártape omombeʼuvaʼerã mbaʼe día ha mbaʼe oraitépa oiporuse. Péro oikuaavaʼerã ansianokuéra nokambiamoʼãiha rreunión día ni óra pe kasamiénto rehehápe.
Umi omendátava omombeʼuvaʼerã comité de servicio-pe mbaʼeichaitépa ojejapotahína pe kasamiénto ikatu hag̃uáicha osẽ porãmba ha upéicha oñemombaʼeguasu Jehovápe. Ansianokuéra ndoikomoʼãihína heʼi ojejapo hag̃ua opa mbaʼe chupekuéra ogustaháichante. Péro ohecháramo oĩha peteĩ mbaʼe noĩporãiva, umi omendátava iñeʼẽrenduvaʼerã chupekuéra. Pór ehémplo, Salón del Réinope oñehenduvaʼerã músika ñande kantikopeguánte. Ojehechavaʼerã avei mbaʼéichapa oñembojeguáta pe Salón ha mbaʼéichapa oñemohendáta sillakuéra. Oñeguenohẽtaramo fóto térã oñefilmátarõ, ojejapovaʼerã hekópe porãnte. Ikatu hína ojejapo peteĩ ensájo Salón del Reino ndojeporúi jave. Noñemoĩmoʼãi mbaʼeveichagua invitasión pe tavléro oñemoĩháme umi marandukuéra. Péro ikatu oñemomarandu ojejapo vove pe Aty Ñanemboʼéva Japredika hag̃ua. Upéicha kongregasiónpe ojekuaáta oĩtaha peteĩ kasamiénto Salón del Réinope.
Oĩtaramo kortého, natekotevẽi ojevautisáva katuete. Péro ndovaléi oĩ ijapytepekuéra peteĩ ndojapói térã nomombaʼéiva Ñandejára ojeruréva. Oĩramo peteĩ ansiáno, haʼe omeʼẽvaʼerã pe diskúrso. Haʼekuéra ningo ikatupyry Ñandejára Ñeʼẽme. Ha hoʼa voi hesekuéra heʼi hag̃ua umi omendávape ha ambue ohendúvape, mbaʼéichapa Ñandejára oipota oiko ména ha tembireko (1 Tim. 3:2).
Pe kasamiénto osẽ porãramo, oñeñeʼẽ porãta avei pe ansiáno omeʼẽvare diskúrso, upévare tekotevẽ umi omendátava omombeʼu porã chupe mbaʼéichapa ojejapóta pe kasamiénto. Og̃uahẽ mboyve pe kasamiénto día, pe ansiáno oñembyatyvaʼerã umi omendátava ndive oporandu hag̃ua chupekuéra hekoporãparaʼe oikóvo. Ha haʼekuéra ndaijapuivaʼerã. Oiméramo peteĩva omendamarakaʼe, ohechaukavaʼerã oĩha omenda jey hag̃ua Jehová ojerureháicha (Mat. 19:9). Upearã ohechaukavaʼerã peteĩ kópia pe áktagui heʼihápe ojedivorsiáma hague.
Umi omendátava oñemongeta porãramo ansianokuéra ndive ha ojapóramo haʼekuéra heʼiháicha, pe kasamiénto osẽ porãta ha opavavénte ovyʼajoáta (Pro. 15:22; Heb. 13:17).