Ikatu oiko ñandehegui mboʼehára katupyry
1. Mbaʼe ijojahaʼỹvapa ikatu jajapo enterovéva?
1 Tuichaiterei mbaʼe ningo ñandéve g̃uarã ñamboʼe ñande rapichakuérape Ñandejára Ñeʼẽ. Ñanembovyʼaiterei jahecháramo mbaʼéichapa umi mbaʼe oaprendéva oipytyvõ chupekuéra oñemoag̃uive hag̃ua pe Mburuvicha Guasúre. Javyʼa avei jahechávo mbaʼéichapa okambia hikuái heta mbaʼépe (Sant. 4:8). Hiʼãite ningo enterovéva ñaipytyvõ péicha ñande rapichakuérape (Mat. 28:18, 20).
2. Mbaʼérepa sapyʼánte ikatu ñapensa ndaikatumoʼãiha jajapo peteĩ estúdio vívliko? Ha mávapa ñanepytyvõta?
2 Jajerurékena Jehovápe tañanepytyvõ. Oĩvaʼekue Ñandejára siérvo ymaguare ndojeroviái rupi ijehe, oimoʼãva ndaikatumoʼãiha ojapo Ñandejára ojeruréva. Upéicharamo jepe ojapo hikuái heta mbaʼe iñimportánteva Jehová oipytyvõ rupi chupekuéra. Umíva apytépe oĩ Moisés, Jeremías ha Amós (Éxo. 4:10-12; Jer. 1:6, 7; Amós 7:14, 15). Avei apóstol Pablo heʼivaʼekue ijehe ha iñirũnguérare opredika hague hikuái “pyʼaguasúpe”. Mbaʼéicha rupípa ipyʼaguasu hikuái? Pablo heʼi: ‘Ñandejára orepytyvõ’ (1 Tes. 2:2). Upéicha avei Jehová ñanepytyvõ, ñanemoarandu ha ñanembopyʼaguasúta ikatu hag̃uáicha jajapo hekópe porã peteĩ estúdio vívliko (Isa. 41:10; 1 Cor. 1:26, 27; 1 Ped. 4:11).
3, 4. Mbaʼe mbaʼépa ñanembokatupyrýta ñaporomboʼekuaa hag̃ua?
3 Jahejákena Jehovápe tañanemboʼe. Jehová ningo ñane Mboʼehára Ijojahaʼỹva, ha oikuaa mbaʼéichapa ñanepytyvõta oiko hag̃ua ñandehegui mboʼehára katupyry (Isa. 54:13; 2 Tim. 3:16, 17). Jahejákena chupe tañanemboʼe ha ñañehaʼã jaikuaa hetave mbaʼe oĩva la Bíbliape. Upéicha avei ñañehaʼãvaʼerã ñamboʼe porãve ñande rapichakuérape. Entéro umi rreunión ojejapóva ningo ñanepytyvõ ñandekatupyryve hag̃ua. Péro pe Eskuéla Jaiporukuaa hag̃ua la Biblia ha Aty Ñanemboʼéva Japredika hag̃ua, ojejapo voi upearãite.
4 Jahechákena mbaʼéichapa ñaporomboʼéta oñentende porã hag̃ua umi mbaʼe hypyʼũvéva jepe. Upearã iporãta jajapóramo heʼíva lívro Benefíciese páhina 227-pe: ‘Reipotáramo oñentende upe téma, nde voi rentende porã vaʼerã’. Ha avei ñakomentáramo rreunionhápe, ñanepytyvõta ñanemanduʼa meme hag̃ua umi mbaʼe iñimportántevare ikatúva jaiporu upe rire. Upévare jajeprepara porãkena ikatu hag̃uáicha ñaporomboʼe porãve.
5. Mbaʼépa ikatu ñanepytyvõ avei ñandekatupyryve hag̃ua ñamboʼévo Ñandejára Ñeʼẽ?
5 Katuete oiméne umi kristiáno ypykue oaprendemivaʼekue ojoehegui oporomboʼe jave (Luc. 10:1). Ñande avei ikatu jajapo upéicha, upearã ñasẽvaʼerã jajapo estúdio vívliko umi ikatupyryvéva ndive. Pór ehémplo umi prekursór, ansiáno ha superintendénte de sirkuíto ndive. Ñañatende porã vaʼerã mbaʼéichapa haʼekuéra omyesakã porã Ñandejára Ñeʼẽ ojevalévo ehémplo ndahasýivare oñentende hag̃ua ha hetave mbaʼére oĩva ñane puvlikasionkuérape. Jajerurevaʼerã chupekuéra teʼi ñandéve mbaʼe mbaʼépa ikatu jajapo ñandekatupyryve hag̃ua (Pro. 1:5; 27:17). Jahechakuaákena koʼã mbaʼe ñanepytyvõva ouha Ñandejáragui (2 Cor. 3:5).
6. Mbaʼépa jajapovaʼerã oiko hag̃ua ñandehegui peteĩ mboʼehára katupyry?
6 Jahejákena Jehovápe tañanepytyvõ ha ñamombeʼu chupe ñandekatupyryseveha (Sal. 25:4, 5). Upéicha ikatúta ñaipytyvõ ñande rapichápe oiko hag̃ua avei chugui peteĩ mboʼehára katupyry.