Tekotevẽ ñaaguanta jasegi hag̃ua japredika
1 Apóstol Pablo ovyʼavaʼekue opredikávo, haʼe ningo opredika treinta áño ári. Péro avei heta ohasa asy (2 Cor. 11:23-29). Upéicharamo jepe naikangýi (2 Cor. 4:1). Ojerovia guei Jehová omombaretetaha chupe osegi hag̃ua opredika (Fili. 4:13). Haʼe oikuaavaʼekue omoĩ hague ehémplo porã, upévare ohai: ‘Peiko chéicha, che aiko Cristo oiko haguéicha’ (1 Cor. 11:1, BNP).
2 Mbaʼéichapa jahechauka ñaaguantaha koʼág̃a rupi. Oĩ heta ñane ermáno ohasa asýva oñembohory ha oñemoĩ rupi hesekuéra ifamília, ikompañéro de eskuéla térã itravahohapegua (Mat. 10:35; Juan 15:20). Ikatu nde voi rehasareína koʼã mbaʼe. Pór ehémplo ikatu oime nderasy, térã káda día reñehaʼãmbaite ani hag̃ua rejapo umi mbaʼe ikatúva ndegueraha vai. Opáichavo katuete nepytyvõta rejepyʼamongetáramo Ñandejára siervokuéra ohasavaʼekuére, térã rehecháramo mbaʼépa ojapo heta ñane ermáno ombohovái hag̃ua umi provléma (1 Ped. 5:9).
3 Avei ñanembaretevéta jasegi hag̃ua japredika ‘ñamoĩramo opa mbaʼe Ñandejára omeʼẽva ñandéve ñañorairõ hag̃ua’ (Efe. 6:10-13, 15). Tekotevẽ avei ñañemboʼe meme Ñandejárape jagueropuʼaka hag̃ua oimehaichagua provléma. Haʼe ningo katuete omeʼẽta ñandéve ijespíritu sánto (2 Cor. 6:4-7). Ha jaipotáramo oho porã ñandéve ha ñaime porã Ñandejárandi, ñaneñeʼẽrenduvaʼerã chupe (Sal. 119:24, 85-88). Jaikuaa ningo peteĩ taʼýra katuete olee jey jeytaha pe kárta itúva ohaivaʼekue chupe. Upéicha avei ñande jaleevaʼerã káda día la Biblia ñañemoag̃uive hag̃ua Jehováre. Jastudia meméramo, Iñeʼẽ ñanemoarandúta ha jaikuaáta mbaʼépa jajapovaʼerã jahasa jave peteĩ mbaʼe ijetuʼúva. Upéicha Ñandejára ñanepytyvõta jadesidi porã hag̃ua ha pono ñamboyke chupe (Pro. 2:10, 11).
4 Heta mbaʼe porã jahupyty ñaaguantáramo. Ñaaguanta ha jasegíramo japredika ñambovyʼáta Jehovápe ha jahupytýta heta mbaʼe porã, apóstol Pablo ohupyty haguéicha (Pro. 27:11). Upévare ñaaguantákena ha jasegi japredika. Upéicha jahechaukáta jajerovia mbareteha Ñandejárare ha ‘ñande jerovia iporãiteveha ku óro oñemboykuvaʼekuégui tatápe’ (1 Ped. 1:6, 7).