Epredikákena nde koléhiope
1. Mbaʼérepa jaʼekuaa koléhiope ijetuʼuveha eskuélagui, ha mbaʼépa nde ikatu rejapo?
1 Reike ramónte piko koléhiope térãpa areʼíma reike hague? Opáichavo, oiméne reikuaáma koléhiope ijetuʼuveha eskuélagui, koʼýte peteĩ kristiánope g̃uarã. Upépe ningo oĩvétama nepyʼaraʼãva ha nemboligáva rejapo hag̃ua hekopeguaʼỹva. Péro ikatu avei reaprovecha reñemongeta hag̃ua nde rapichakuérandi Ñandejára marandu porãre (Juan 18:37). Ikatúnepa rejapo upéva?
2. Mbaʼérepa nderejepyʼapyivaʼerã nde koléhiore?
2 Epensa porãntena, hetaiterei mbaʼéma rehupyty nembokatupyry rupi Jehová, nde tuvakuéra ha tembiguái jeroviaha. Upévare nderejepyʼapyivaʼerã (Pro. 1:8; 6:20; 23:23-25; Efe. 6:1-4; 2 Tim. 3:16, 17). Oiméne reikuaa porãma mbaʼépa oñehaʼarõ ndehegui reimévo koléhiope. Ha reikuaámane avei mbaʼéichapa ndetratáta ne kompañerokuéra. Upévare eiporupaitékena umi mbaʼe reaprendevaʼekue la Bíbliagui ha epredika kyreʼỹ chupekuéra (Pro. 22:3). Pór ehémplo ikatu reiporu umi konsého oĩva umi mokõi lívrope, Los jóvenes preguntan volúmen 1 ha 2 ha rrevísta ¡Despertad! pe párte osẽva imitãvape g̃uarã.
3. Mbaʼéichapa ikatu remombaʼeguasu Jehovápe nde koléhiope?
3 Nemanduʼavaʼerã koléhiope ikatuha remombaʼeguasu Jehovápe. Mbaʼéichapa rejapokuaa upéva? Pór ehémplo, reñemondévo hekopete, ne nóta porã, naneñeʼẽkyʼái, rejeporta porã ha remombaʼévo ne mboʼehára ha ne kompañerokuérape. Upéicha opavavénte ohechakuaáta ne diferenteha ambuégui. Péro nemanduʼavaʼerã ndofaltamoʼãiha oporandúva ndéve mbaʼéicha rupípa nde upéicha (Mal. 3:18; Juan 15:19). Mbaʼépa rembohovaikuaa chupekuéra? Iporãta remombeʼúramo mbaʼépa reaprende la Bíbliagui (1 Tim. 2:9, 10). Avei ani nderesarái nde koléhiope ojegueromanduʼataha heta arete. Mbaʼépa eréta chupekuéra oporandúramo ndéve mbaʼérepa nderegueromanduʼái umi arete? Eréta piko: “Che rrelihión oproivi rupi”? Térãpa reaprovecha ha repredikáta chupekuéra? Reñembosakoʼi porãramo repredika hag̃ua oimeraẽvape ha oimehápe, Jehová katuete nepytyvõta reñeʼẽkuaa hag̃ua ne mboʼehára ha ne kompañerokuérape (1 Ped. 3:15).
4. Mbaʼérepa nderekyhyjeivaʼerã reike ramóme koléhiope?
4 Umi oike ramóva koléhiope okyhyje ha ipyʼapererepa jepi. Oiméramo rehasareína upéva ani rejepyʼapy, oĩ heta nepytyvõtava rembohovái hag̃ua koʼã mbaʼe. Eaprovechákena ha epredika nde koléhiope. Nderejuhumoʼãi mamove hendápe peichagua oportunida!