Umi mbaʼe jaikuaaséva

◼ Mbaʼéichapa ñaipytyvõkuaa umi prekursórpe?

Áño de servísio 2009 aja, ko yvy tuichakuére haimete ochocientos mil ermáno ha ermána ojapo iprekursorádo rregulár ha espesiál. Koʼã ermáno ningo omeʼẽ pe iporãvéva Jehovápe, pór ehémplo itiémpo, imbaretekue ha imbaʼerepy opredika hag̃ua pe marandu porã (Pro. 3:9). Aje piko ovyʼaiténe Jehová ohechávo mbaʼeichaitépa oñehaʼã hikuái! Ha ñande, ñamombaʼépa avei ojapóva hikuái? Mbaʼéichapa ikatu ñaipytyvõ chupekuéra ovyʼa ha osegi hag̃ua ojapo iservísio?

Pór ehémplo ikatu ñamokyreʼỹ chupekuéra akóinte ojapo hag̃ua iprekursorádo (Pro. 25:11). Avei ñamohendakuaa ñane tiémpo ikatu hag̃uáicha ñamoirũ peteĩvape jepe predikasiónpe. Ha ikatu voi ñandénte japaga hese ipasáhe, térã orekóramo áuto japaga pe kombustívle (1 Cor. 13:5; Fili. 2:4). Jahechaukáta avei jahayhu ha ñamombaʼeha umi prekursórpe ñanembaʼeporãramo hendivekuéra ha ñainvitáramo sapyʼapyʼa jepe okaru hag̃ua ñanendive (1 Ped. 4:8, 9).

Ñandejára Ñeʼẽ heʼi porã Jehová omeʼẽtaha katuete hemikotevẽ umi omotenondévape Irréino (Sal. 37:25; Mat. 6:33). Ha upearã ikatu ojevale opavave ermáno imbaʼeporãvare, oĩva ko yvy tuichakuére (1 Juan 3:16-18). Jaikuaa porã ningo umi prekursór nohaʼarõiha ótro opagapa chupe igásto, ha oiméramo jepe oikotevẽhína nomombeʼúi avavépe. Upévare iporã ñañatende ha ñanembaʼerechakuaa, ‘ñaimoĩ hag̃ua chupekuéra oguerekoʼỹva’ (2 Cor. 8:14, 15, BNP).

Febe ningo peteĩ kristiána síglo primeropegua ha opredika kyreʼỹ vaʼekue kongregasión Cencréaspe. Haʼe oviahárõ guare Rómape, Pablo heʼi umi ermáno upepeguápe: “Haʼe peẽme [...] pemog̃uahẽ porã chupe Ñandejára rérape, jajapovaʼerãháicha ojoapytépe ñande oñopehẽnguéva [...]. Peipytyvõ chupe opa oikotevẽvape” (Rom. 16:1, 2). Koʼág̃a avei ñande ikatu jahechauka jahayhu ha ñamombaʼeha ñane ermanokuéra opredika kyreʼỹvape kongregasiónpe. Ha koʼýte jahechaukavaʼerã upéva umi prekursór rregulár ha espesiálpe (Hech. 5:42).