Ñaipytyvõkena ména térã tembireko ndahaʼéivape Testígo
1. Máva mávapa avei ojepyʼapy peteĩ ména térã tembireko ndahaʼéivare Testígo?
1 Mboýpa oĩ ne kongregasiónpe iména térã hembireko ndahaʼéiva Testígo? Oiméne katuete oipota hikuái hembiayhu oikuaa avei Ñandejárape ha omombaʼeguasu chupe. Péro ndahaʼéi haʼekuéra añónte oipotáva upéva, enterove ñaiméva kongregasiónpe ha Jehová voi “oipota opavave ojesalva ha toikuaa pe añetegua” (1 Tim. 2:4, ÑÑB). Mbaʼépa jajapokuaa ñañemoag̃ui hag̃ua hesekuéra?
2. Mbaʼérepa tekotevẽ ñañemoĩ ñande rapicha lugárpe?
2 Ñepyrũrã ñañehaʼãvaʼerã ñañemoĩ ilugarpekuéra. Heta ningo oĩ ohayhúgui ifamíliape oñehaʼãva oñangareko ha otrata porã chupekuéra, péro ndogueroviáinte umi mbaʼe ñande jagueroviáva. Avei ikatu oime nañandekuaaporãinte, térã iñamigokuéra oñeʼẽ vai ñanderehe ndoikuaáigui heta mbaʼe ỹrõ ndochaʼéi rupi Testigokuérare. Oĩ katu heta ipochýva oimoʼãgui iména térã hembireko oñemeʼẽtereiha “rrelihiónpe” ha nopenaguasuvéi ifamíliare. Upévare tekotevẽ ñañemoĩ ilugarpekuéra ikatu hag̃uáicha jatrata porã ha jarrespeta chupekuéra, péicha ñañemongeta trankilovéta (Pro. 16:20-23).
3. Mbaʼéichapa ikatu ñaipytyvõ pe ména térã tembireko ndahaʼéivape Testígo?
3 Ñamombaʼékena chupekuéra. Koʼãva tapicha oñemeʼẽve jepi ñanendive ñanembaʼeporãramo hendivekuéra, ndahaʼéi katuete ñañemongeta rupi Ñandejára Ñeʼẽre (1 Ped. 3:1, 2). Upévare iñimportanteve jahechauka ñamombaʼe añeteha chupekuéra. Ermanakuéra ikatu oipytyvõ umi ermáno rembirekópe, ha ermanokuéra katu umi ermána ménape. Mbaʼéichapa jajapokuaa upéva?
4. Mbaʼéichapa ikatu jahechauka ñamombaʼe añeteha ñande rapichápe?
4 Oiméramo ndereikuaái gueteri pe ména térã tembirekópe, eñeʼẽ raẽ pe ermáno térã ermánandi ha emombeʼu chupe mbaʼépa rejapose. Ñepyrurã ndahoryguasúiramo ndéve ani reheja upéva nemokangýtei. Retrata porã ha remombaʼéramo chupe ikatu okambia umi mbaʼe opensáva Testigokuérare (Rom. 12:20). Pór ehémplo oĩ ermáno oinvitáva koʼãichagua famíliape osena hag̃ua hendivekuéra, upéicha ojokuaa porãve hikuái ha pe karai térã pe kuñakarai ohechakuaa heta mbaʼe ndahaʼeiha haʼe opensa haguéicha. Ha oñemongeta hikuái umi mbaʼe chupe ogustávare, ndahaʼéi katuete la Biblia omboʼévare. Pe karai térã kuñakarai ojepokuaave vove hesekuéra, ikatu oñeñeʼẽ umi mbaʼére. Upéicha oikuaavévo ermanokuérape, ikatuhína upe rire ohose rreunionhápe ohecha hag̃ua mbaʼépa oaprende hembireko térã iména. Péro oiméramo ndostudiaséi gueteri la Biblia, jaguerohoryntevaʼerã chupe oipytyvõ haguére iména térã hembireko Testígope.
5. Mbaʼépa ikatu ojapo umi ansiáno?
5 Ansianokuéragui oñehaʼarõve oipytyvõ umi ména térã tembireko ndahaʼéivape Testígo. Upévare ojesarekovaʼerã oñepresentárõ g̃uarã peteĩ oportunida oñeʼẽ hag̃ua chupe Jehováre. Péro ndostudiaséiramo jepe, ikatuhína ohendu jaiporúramo Ñandejára Ñeʼẽ ñamokyreʼỹ hag̃ua chupe oúramo hasyete térã oñeinterna jave ospitálpe. Ohasáramo peteĩ mbaʼe ijetuʼúva, pór ehémplo omano chugui peteĩ ifamília, umi ansiáno ikatu oinvita chupe ohendu hag̃ua hogayguakuérandi mbaʼéichapa Ñandejára oporokonsola Iñeʼẽ rupive.
6. Mbaʼérepa ñañemoag̃uivaʼerã umi ména térã tembireko ndahaʼéivare Testígo?
6 Ñapensamíntena mbaʼéichapa ovyʼáta pe ermáno térã ermána, hembireko térã iména oñepyrũramo ostudia la Biblia ha oservi Ñandejárape! Avei Jehová, umi ánhel ha opavavete kongregasiónpe javyʼaitereíta (Luc. 15:7, 10). Péro ñañehaʼãmbaitérõ ha upéicharamo jepe ndopokói ikorasõre, ikatúnte avei javyʼa jaikuaágui Jehová ovyʼaha ohechávo jajapoha ikatúva guive. Haʼe ningo ‘ndoipotái avave oñehundi, oipota guei opavavénte oñembyasy ha ojevy hendápe’ (2 Ped. 3:9, ÑÑB).
[Komentário oĩva páhina 6-pe]
Koʼãva tapicha oñemeʼẽve jepi ñanendive ñanembaʼeporãramo hendivekuéra, ndahaʼéi katuete ñañemongeta rupi Ñandejára Ñeʼẽre