Tekotevẽterei jajepyʼamongeta akóinte ñanekyreʼỹ hag̃ua

1. Mbaʼépa oipytyvõ Jesúspe ojesareko hag̃ua hembiapóre?

¹ Peteĩ jey Jesús omonguera hasývape ha omosẽ demoniokuéra umi héntegui, kaʼaruete guive pyhare peve. Koʼẽ rire hemimboʼekuéra heta oheka chupe umi hénte oipotágui ojapove milágro, ha otopámarõ hese heʼi hikuái: ‘Opavave ningo ndereka oikóvo’. Péro Jesús oikuaa porã ou hague opredika pe marandu porã, ha ndoipotáigui mbaʼeve ohesarea chupe heʼi: ‘Jaha katu ambue tavakuéra rupi, apredika hag̃ua avei upépe. Upearã ningo ajuvaʼekue’. Mbaʼépa oipytyvõ Jesúspe ojesareko hag̃ua hembiapóre? Haʼe opuʼã voi porã ojepyʼamongeta ha oñemboʼe hag̃ua (Mar. 1:32-39, NM). Ha ñandéve, mbaʼéichapa ikatu ñanepytyvõ jajepyʼamongetáramo?

2. Mbaʼe rehépa jajepyʼamongetavaʼerã akóinte ñanekyreʼỹ hag̃ua predikasiónpe?

² Mbaʼe rehépa jajepyʼamongetavaʼerã? Jesús ohechakuaavaʼekue umi hénte ‘oiko asyha ha isarambipa umi ovecha herekuaʼỹvaicha’ (Mat. 9:36, NM). Péicha avei ñande jajepyʼamongetáramo jahechakuaáta ñaimemaha ára pahápe ha umi hénte tekotevẽtereiha ohendu pe marandu porã (1 Cor. 7:29). Avei jajepyʼamongetavaʼerã mbaʼéichapa Jehová ñandetrata, hembiapokuére, oheja haguére jaservi chupe ha umi mbaʼe porã ñaaprendevaʼekue la Bíbliagui. Koʼã mbaʼe ningo heta hénte ndoikuaái gueteri ñande territóriope (Sal. 77:11-13; Isa. 43:10-12; Mat. 13:52).

3. Mbaʼéicha javépa ikatu jajepyʼamongeta?

³ Mbaʼéicha javépa? Enterove ningo ñane rembiapo heta, upéicharamo jepe ñañehaʼãvaʼerã ñañemotiémpo jajepyʼamongeta hag̃ua. Pór ehémplo oĩ heta opuʼãva voi porã, Jesús ojapo haguéicha. Ótro katu ojepyʼamongeta pyharekue, oñeno mboyve (Gén. 24:63). Oĩ avei oaprovecháva oviaha jave kolektívope ha ambue katu okarupa rire. Heta ermáno ojepyʼamongeta osẽ mboyve opredika, ha ohechakuaa upéva oipytyvõha chupekuéra ikyreʼỹ ha oñeʼẽ hag̃ua kyhyjeʼỹme.

4. Mbaʼérepa tekotevẽ jajepyʼamongeta?

⁴ Jajepyʼamongeta ha ñañemboʼe meméramo ñanekyreʼỹvéta jaservi hag̃ua Jehovápe, avei ñanepytyvõta jahechakuaa hag̃ua mbaʼépa jahupytyse ha ñanemombaretevéta jasegi hag̃ua japredika. Jesús ojepyʼamongeta meme rupi ojapo porã pe tembiapo Ñandejára omeʼẽvaʼekue chupe. Ha ñande katu koʼýte tekotevẽ jajepyʼamongeta!