Jaiporu memékena

1. Mbaʼépepa ñanepytyvõ pe tratádo Reñeporandúmavapa?

¹ Pe tratádo Ndépa reñeporandúmava koʼã mbaʼe? ñanepytyvõ ñamoñepyrũ hag̃ua estúdio vívliko. Ha ndahaʼéi upearã añónte ñanepytyvõva, síno avei ñamombeʼu hag̃ua opárupi pe marandu porã (Ecl. 11:6). Mbaʼéichapa ikatu jaiporu porã ko tratádo ideprovechoitéva?

2. Mbaʼéichapa ikatu jaiporu pe tratádo ñañepyrũ hag̃ua ñañemongeta?

² Reñepyrũ hag̃ua reñemongeta. Remeʼẽ rire pe tratádo ogajárape ikatu rehechauka chupe umi porandu oĩva páhina únope, ha ere: “Mbaʼépa nde reikuaaseve koʼãva apytégui?”. Upe rire ehechauka chupe pe tratádope mbaʼéichapa la Biblia ombohovái upe porandu ha eheka peteĩ téysto oĩva upépe. Upéi elee térã eñeʼẽ mbykymi páhina 4-pe heʼívare ha eikuaveʼẽ chupe lívro Mbaʼépa omboʼe la Biblia? Ha ndohejáiramo jepe pe lívro, orekótama pe tratádo ikatúva oipytyvõ chupe oikuaa hag̃ua Ñandejárape (Mat. 13:23).

3. Mbaʼépa jajapokuaa pe ogajára hembiapoitereíramo?

³ Ogajára hembiapoitereíramo. Ikatu ere: “Amalisia koʼág̃a ndaikatumoʼãi ñañemongeta porã, upévare ahejasemi ndéve ko tratádo. Ipype oñemyesakãta ndéve seis porandu iñimportánteva la Biblia rupive. Mbaʼépa ere aju jeýramo ótro día ñañemongetave hag̃ua hese”.

4. Mbaʼépa ikatu jaʼe japredikávo kállere?

⁴ Repredikávo kállere. Erekuaa: “Mbaʼéichapa. Ndépa reñeporandúmava koʼã mbaʼe? [Ehaʼarõ tombohovái.] Ko tratádo ohechauka mbaʼéichapa la Biblia omyesakã koʼã porandu oñentende porã hag̃uáicha”. Pe tapicha ndojapuráiramo rehesaʼỹijokuaa hendive peteĩ porandu ha ikatu voi reikuaveʼẽ chupe lívro Mbaʼépa omboʼe la Biblia?

5. Mbaʼéichapa ikatu jaiporu avei pe tratádo ndaipóri jave ogajára?

⁵ Ndaipóri jave ogajára. Heta hendápe ermanokuéra ndotopái jave ogajárare ohejánte chupe peteĩ puvlikasión hokẽ guýpe térã ohechaʼỹ hag̃uáme umi ohasáva. Oiméramo peẽ pejapo jepi voi upéicha pene kongregasiónpe, ikatu reheja avei pe tratádo Reñeporandúmavapa. Ha reho jeývape ikatu ere: “Akokuehe ndorotopái nde rógape ha ahejákuri ndéve ko tratádo. Reipotáramo ikatu amyesakãve ndéve koʼã porandu la Biblia rupive”.

6. Mbaʼérepa jaiporu meme vaʼerã pe tratádo Reñeporandúmavapa?

⁶ Ko tratádo Reñeporandúmavapa omombeʼu pe marandu porã oñentende hag̃uáicha. Ha opaichagua tapicha oleese, tahaʼe haʼéva irrelihión térã hetã. Avei ndahasyiete ojeporu hag̃ua, umi imitãvéva ha opredika ramóva jepe ikatu oiporu. Ha nde, reiporu memépa reína ko tratádo?