Ñañangarekókena ñandejehe ñasẽ jave japredika
1. ¿Mbaʼérepa ñañangarekovaʼerã ñandejehe ñasẽ jave japredika?
1 Koʼág̃a rupi Ñandejára siervokuéra opredika umi “tekove aña ha mbaʼe vai apoha apytépe”; haʼete ku “ovecha ohoramoguáicha lóvo apytépe” (Mat. 10:16, NM; Fili. 2:15). Opárupi oĩ hénte aty ojapóva sarambi, oñorairõsénteva voi ha oporosekuestráva, koʼã mbaʼe ohechauka porã umi hénte “heko vaiveha ohóvo” (2 Tim. 3:13, NM). La Bíbliape oĩ heta konsého ikatúva ñanepytyvõ “jaikokuaa” ha ñañangareko hag̃ua ñandejehe ñasẽ jave japredika (Mat. 10:16, NM).
2. ¿Mbaʼéicha javépa iporãvéta jahánte ótro lugárpe japredika hag̃ua?
2 Jahechaukákena ñanearanduha. Proverbios 22:3 omyesakã jajehekýiramo umi mbaʼe ikatúvagui ñandeperhudika jahechaukahañaína ñanearanduha. Oĩ lugár ndoikoguasuihápe mbaʼeve ivaíva, péro peteĩ tesapirĩme ikatu okambia upéva. Upéicha rupi tekotevẽ ñañatende porã. Pór ehémplo, peichaháguinte ikatu og̃uahẽ heta polisía térã ijaty hetaiterei hénte pe kállere ỹrõ peteĩ oikóva upérupi heʼi ñandéve jahánte hag̃ua upégui. Umícha jave, japyta rangue jakuriosea, iporãvéta jaháramo ótro lugárpe japredika hag̃ua, péicha jahechaukáta ñanearanduha (Pro. 17:14; Juan 8:59; 1 Tes. 4:11).
3. ¿Mbaʼéichapa ikatu ñanepytyvõ Eclesiastés 4:9 heʼíva japredika jave?
3 Aníkena jaha ñaneaño. Eclesiastés 4:9 heʼi “mokõi iporãveha peteĩgui”. Ikatu ñande territóriope ndoikói gueteri mbaʼeve ivaíva, upévare ndajakyhyjéi japredika hag̃ua ñaneaño. Añetehápe heta hendápe itrankílo gueteri, péro oĩ lugár ipeligrósova, upévare naiporãmoʼãi peteĩ ermána térã peteĩ mitãrusu oho opredika ogahárupi haʼeño, ha koʼýte pyharekue. Heta tapicháre oikovaʼekue ivaíva osẽ rupi haʼeño, ha upéva ohechauka iporãveha ñañomoirũ ñañangareko hag̃ua ojuehe ñasẽ jave japredika (Ecl. 4:10, 12). Enterovénte ñañatendevaʼerã ojuehe predikasiónpe, ha jajepokuaavaʼerã jaavisa peteĩ ermánope japoíta vove.
4. ¿Mbaʼépa ikatu jajapo pono jajeapeligra ñasẽ jave japredika?
4 Umi ansiáno kongregasionpegua ‘oñangareko ñanderehe’, upévare heʼi ñandéve mbaʼépa ikatu jajapo pono jajeapeligra japredika jave ñande territóriope (Heb. 13:17). Ñaneakãguapy, ñaneumílde ha jajapóramo ojeʼéva ñandéve, Jehová katuete ñanderovasáta (Miq. 6:8; 1 Cor. 10:12). Jaikuaa ningo ñande jaservíva Jehovápe kyreʼỹ ha hekoitépe japredikaha ñande territóriope, péro tekotevẽ ñañangareko porã ñandejehe jajapokuévo upéva.