Jasegíkena umi proféta ehémplo: Jonás
1. ¿Mbaʼe iporãvapa ohechauka vaʼekue Jonás?
1 ¿Mbaʼépa nde repensa proféta Jonás rehe? Oĩ heʼíva hese ipyʼaju ha ipyʼahatã hague. Péro ndahaʼeiete upéicha, haʼe iñumílde, ipyʼaguasu ha isakrifikádo vaʼekue. ¿Mbaʼéichapa ñande ikatu jasegi iñehémplo? (Sant. 5:10.)
2. ¿Mbaʼéichapa ikatu jahechauka ñaneumildeha Jonás ojapo haguéicha?
2 Iñumílde. Jehová omeʼẽrõ guare Jonáspe hembiaporã, haʼe osẽ oho ótro ládo. Ha ndareíri ojapo upéva, umi Asiriagua ipyʼahatãiterei vaʼekue. Hiʼarive Nínive rehe ojeʼe voi “pe táva oñohẽha heta tuguy” (Nah. 3:1-3). Péro Jehová okorrehi Jonáspe, ha omeʼẽ jey chupe ótra oportunida iñeʼẽrendu hag̃ua, haʼe oaprovecha upéva, oñemomirĩ ha ojapo ojeʼéva chupe (Prov. 24:32; Jon. 3:1-3). Jonás ningo ñepyrũrã ojehekyise vaʼekue pe tembiapo oñemeʼẽvagui chupe, péro amo ipahápe ojapo Ñandejára rembipota (Mat. 21:28-31). Ha ñande, ¿ñaimépa jasegi hag̃uáicha japredika oĩramo jepe ñandekorrehíva térã nañanerenduséiva predikasiónpe?
3. ¿Mbaʼérepa tekotevẽ ñandepyʼaguasu ha ñandesakrifikádo japredika hag̃ua?
3 Ipyʼaguasu ha isakrifikádo. Jonás ndojaposéi rupi Jehová heʼíva osẽ oho Társispe, upérõ ohechakuaa umi ohóva guive pe várkope ikatuha omano ikáusare, ha ani hag̃ua oiko upéva haʼe ojepoi pe várkogui (Jon. 1:3, 4, 12). Upe rire okumplívo hembiapo Nínivepe, oguata vaʼekue upe siuda sentroite peve otopa hag̃ua peteĩ lugár opyta porãtava omombeʼu hag̃ua pe mensáhe Jehová omeʼẽ vaʼekue chupe. ¿Ojapónepa koʼã mbaʼe peteĩ ipyʼajúva? Ni mbaʼevéicharõ, peteĩ ipyʼaguasúva añoite ojapóta upéva (Jon. 3:3, 4). ¿Mbaʼépa ikatu ñaaprende iñehémplogui? Tekotevẽtereiha jajerure Ñandejárape tañanembopyʼaguasu ikatu hag̃uáicha japredika ko tiémpo ijetuʼuetévape (Hech. 4:29, 31). Avei ñandesakrifikádo vaʼerãha jaiporúvo ñane tiémpo ha umi mbaʼe jarekóva japredika hag̃ua (Hech. 20:24).
4. ¿Mbaʼérepa jajepyʼamongeta vaʼerã umi proféta ehémplore?
4 Jalee jave umi proféta rembiasakue, iporãta ñañemoĩ ilugarpekuéra ha ñañeporandu: “¿Mbaʼépa ajapo vaʼerãmoʼã aimérire upe situasiónpe? ¿Mbaʼéichapa ikatu asegi iñehémplo?” (Heb. 6:11, 12). Koʼág̃a guive Ñane Marandu Porãme oñeguenohẽta jepi umi proféta iñeʼẽrendúva ehémplo ha ikatúta ñaaprende heta mbaʼe iñimportánteva chuguikuéra.