Umi mbaʼe jaikuaaséva
◼ ¿Mbaʼe konsého oĩvare la Bíbliapepa tekotevẽ ñanemanduʼa jaiporúvo ñande selulár rreunionhápe ha predikasiónpe?
“Entéro mbaʼépe g̃uarã oĩ peteĩ tiémpo.” (Ecl. 3:1.) Umi teléfono selulár rupive ikatu ñamondo mensáhe térã ñañeʼẽ ñande rapichakuérandi oimeha órape. Upéicharamo jepe, ñande kristiáno ñañatende vaʼerã mbaʼeichahápepa jaiporúta. Por ehémplo, rreunionhápe ningo ñande jaha ñamombaʼeguasu hag̃ua Jehovápe, ñaaprende hag̃ua la Bíbliagui ha ñañomokyreʼỹ hag̃ua, upévare naiporãmoʼãi jaiporu upéicha jave (Deut. 31:12; Sal. 22:22; Rom. 1:11, 12). ¿Ikatúpa rreunión aja ñambogue ñane teléfono ha jalee umi mensáhe oúva ñandéve ñasẽ rire salóngui? Oiméramo ñahaʼarõ peteĩ llamáda iñimportánteva ha ndaikatumoʼãi ñambogue ñande selulár, ñamoĩ vaʼerã silénsiope térã omolestaʼỹ hag̃uáicha avavépe.
Jajapo vaʼerã “opa mbaʼe umi marandu porã rehehápe” (1 Cor. 9:23). Sapyʼánte ndaivaimoʼãi jaiporúramo ñande selulár predikasiónpe. Por ehémplo, pe ermáno omoakãva pe grúpo ikatu oiporu oñeʼẽ hag̃ua umi ermáno opredikávandi mombyryvehápe upe territóriope. Ikatu voi peteĩ maranduhára ohenoise raẽ iñestudiánte térã irrevisítape oho mboyve hendápe, koʼýte oiméramo oiko mombyry. Péro ñañatende vaʼerã ani ñanemolesta japredika jave ñande rapichakuérape (2 Cor. 6:3). Ñahaʼarõramo jepe umi ótro maranduhárape, naiporãmoʼãi ñahenói térã ñamondo mensáhe ñane amígope upe aja. Upéva rangue, iporãvéta ñenemanduʼa ñaimeha predikasiónpe ha ñañatende umi maranduhára oĩvare ñanendive.
Ñanembaʼerechakuaa vaʼerã (1 Cor. 10:24; Filip. 2:4). Arakaʼeve ndajaʼéi vaʼerã natekotevẽiha voi ñag̃uahẽ órape pe aty ojejapóvape oñesẽ mboyve ojepredika, ñapenságui ikatuha ñahenói térã ñamondo mensáhe peteĩ maranduhárape jaikuaa hag̃ua moõpa ojepredika. Avei tekotevẽ ñanemanduʼa ñag̃uahẽramo tárde, pe ermáno omoakãva pe grúpo oasigna jey vaʼerãha umi maranduhárape. Jaikuaa ningo sapyʼánte ikatuha oñepresenta ñandéve peteĩ situasión ñahaʼarõʼỹva ha upévare ñag̃uahẽ tárde. Péro ñañehaʼãmbaitéramo ñag̃uahẽ órape, jahechaukáta jarrespetaha Jehovápe, ñanembaʼerechakuaaha pe ermáno omoakãvandi predikasión ha umi ótro maranduhárandi.