Jarekovéta oportunida ñamombaʼeguasu hag̃ua Jehovápe
1. ¿Mbaʼe oportunidápa jarekove koʼág̃a ñamombaʼeguasu hag̃ua Jehovápe?
1 Koʼág̃a káda áño opavave maranduhára ojaposéva iprekursorádo auxiliár ikatúta ojapo treinta órante marzo ha abrílpe, ha avei superintendénte de sirkuíto ovisita jave kongregasión. Ko mbaʼe pyahu oñepyrũ marzo 2013 guive. Sapyʼánte ningo pe visíta oñepyrũ jepi opakuetévo peteĩ mes ha oñemohuʼã oñepyrũvo pe mes oúvape, upéicha jave umi maranduhára ikatu oiporavo mbaʼe méspepa ojapose iprekursorádo de treinta óra. Enterove umi prekursór auxiliár ikatu oĩ opa peve pe rreunión superintendénte orekóva umi prekursór rregulár ha espesiál ndive. Jahechaháicha, ndaikatúiramo jepe jajapo ñande prekursorádo de cincuenta óra, jarekóta cuatro oportunida káda áño ñamombaʼeguasu hag̃ua Jehovápe jajapóvo ñande prekursorádo auxiliár de treinta óra (Sal. 109:30; 119:171).
2. ¿Mbaʼépa ohupytýta umi ojapóva iprekursorádo auxiliár superintendénte de sirkuíto ovisita jave kongregasión?
2 Ñandevisita jave superintendénte. Koʼág̃a pe superintendénte de sirkuíto oporovisita jave hetave maranduhára ikatúta ojapo iprekursorádo auxiliar, péicha “ñañomokyreʼỹvéta” ñasẽvo japredika oñondivepa (Rom. 1:11, 12). Umi prekursór auxiliár ombaʼapóva ikatu ojerure un día lívre itraváhope osẽ hag̃ua opredika pe superintendéntendi. Ha umi ombaʼapóva éntre semanakue ojerurekuaa pe superintendéntepe osẽ hag̃ua hendive sábado térã domingo. Umi prekursór auxiliárpe tuicha omokyreʼỹta oĩ haguére avei pe rreunión superintendénte ojapóvape umi prekursór rregulár ha espesiál ndive.
3. ¿Mbaʼérepa Conmemoración tiémpope opyta porãiterei jajapo hag̃ua ñande prekursorádo auxiliár?
3 Marzo ha abrílpe. Heta ermáno ojapo kuri iprekursorádo auxiliár Conmemoración tiémpope ikatu rupi oiporavo ojapo hag̃ua treinta órante, koʼág̃a katu jarekovéta oportunida ñamombaʼeguasu hag̃ua Jehovápe (Heb. 13:15). Marzo ha abrílpe ningo ñainvita jepi Conmemoracionrã umi hénte oikóvape ñande territóriope, upéicha rupi opyta porãiterei ñambaʼapove hag̃ua Ñandejára servísiope jajapóvo ñande prekursorádo auxiliár. Upe tiémpope umi maranduhára osẽve rupi predikasiónpe, oĩve ermáno ñanemoirũ vaʼerã territóriope. Conmemoración rire katu, javisita jey vaʼerã umi hénte ou vaʼekuépe ha ñainvita chupekuéra ou hag̃ua ohendu pe diskúrso espesiál. Añetehápe koʼág̃a jarekovéta oportunida ñamombaʼeguasu hag̃ua Jehovápe jajapóvo ñande prekursorádo auxiliár. ¿Ñanemomýitapa ñane korasõ jaaprovecha hag̃ua ko oportunida porãite? (Luc. 6:45.)